Afaky Manampy Anao tsy Hahatsapa Mangiky ty Baiboly
Nihitan’ny manam-pahaiza, tamy 2023 iny, fa problemo bevata atahora hanimba fahasalamà ty fahatsapà hoe mangiky. Ka ino ty azo atao mba hialia aminy?
“Nivola ho zao Dr. Vivek Murthy, manamboninahitsy amy resaky fahasalamà a Etazinỳ any: “Lafa mahatsapa mangiky noho tsy misy olo mifandramby aminy ty olo raiky, le mety hisy vokany amy fahasalamàny raha zay sady hahavy azy tsy ho falifaly sasy.” Fe nivola avao koa ie hoe: “Misy azontsika atao.” Ino zay? “Ty fanaova raha malinidiniky sanandro, mba hanasoava ty finamàntsika amy ty hafa.” a
Mety hahatsapa mangiky avao tsika ndre misy olo maro aza manodidy antsika. Fe ndre ino ndre ino ty antony mahavy antsika mahatsapa hozay, le afaky manampy antsika handresy azy ty Baiboly. Misy torohevitsy hanampy antsika hinama amy ty hafa ty ao, ka ho afaky hialy amy raha zay tsika.
Torolalan’ny Baiboly afaky manampy
Miezaha hahay hiresaky amin’olo. Tsy hoe lafa miresaky ty fihetseham-ponao avao iha le mahay miresaky amy ty hafa zay, fa tafilitsy amy fahaiza miresaky amy ty hafa avao koa ty fiezahanao hijanjy an-drozy. Arakaraky ty ampisehoanao hoe midary azy iha, le vomaiky nareo ho mpinama.
Torolalan’ny Baiboly: “Soa ty kiraidraiky aminareo laha mba mieritseritsy ze hahasoa ty hafa, fa tsy ze hahasoa ty vatany avao.”—Filipianina 2:4.
Minamà amin’olo sankarazany. Miezaha hinama amin’olo fa zokinao na mbo zainao, na tsy mitovy kolontsay na fiavia aminao.
Torolalan’ny Baiboly: “Sokafo midanadana ty fonareo.”—2 Korintianina 6:13.
Laha ta hahay misimisy mikasiky ty fomba hanasoavanao ty fifandrambesanao amy ty hafa iha, le vakio ty lahatsoratsy hoe “Te Hahazo Namana Tsara ve Ianao?”
a Our Epidemic of Loneliness and Isolation: The U.S. Surgeon General’s Advisory on the Healing Effects of Social Connection and Community, 2023.