Ho Rava va zao Tontolo Zao? Ino ty atao hoe Apokalypsy?
Ino ty avy an-tsainao ao laha vo maharè ty safà hoe “apokalypsy”? Mety hieritseritsy loza bevata raiky mandrava ty raha iaby miay an-tany etoa iha. Mino ty olo sisany hoe hisy loza raiky hahazo ani-zao tontolo zao, sirtò lafa mamaky vaovao manahaky ani-retoa rozy:
“Tena posibla mihintsy ty hisiani-aly nikleèra. Mety tsy hampoizy ty fanombohany, mety hoe nisy hadisoa natao, na hoe hevitsy tsy nifankahazo.”—Bulletin of the Atomic Scientists.
“Tanatini-folo tao farany rezay, le nisy siklony be namotiky raha maro, ala may, hain-tany, fiofohani-vatohara, fiakarani-hafanà, noho ranobe amy tany toy iaby.”—National Geographic.
“Mihamanjeky ty fandripahani-valala an’Afriky ao, laha ampitovizy tamy folo tao lasa rezay.”—The Associated Press.
Ho rava va tany toy le tsy ho azo ipetraha sasy? Ino ty raha volanini-Baiboly?
Ho rava va tany toy?
Aha. Manome toky antsika ty Safà-Ndranahary amy Baiboly ao fa ho eo avao zisiky farany tany toy. (Mpitoriteny 1:4) Tsy handrava ani-tany namboariny toy Ndranahary, fa ‘ze olo mpanimba ani-tany toy ro haripakiny.’—Apokalypsy 11:18.
Ho rava va zao tontolo zao?
Mivola ty Baiboly fa ho tampitsy “zao tontolo zao”, fe zao tontolo zao volaniny io, le manondro ani-ze olo tsy midary ty fitsipiki-Ndranahary sady manao ze teany hatao avao rey. Nitamperi-Ndranahary ty ‘tontolon’olo tsy matahotsy azy’ tamy androni-Noa, le ho zay koa ty hataony amy hoavy.—2 Petera 2:5; 3:7.
Hoy ty 1 Jaona 2:17: “Mandalo zao tontolo zao noho ty faniriany.” Hita amy andinin-teny io, fa tsy handrava ani-tany toy Ndranahary, fa ty olo tsy manoriky ty fitsipikiny sady manao ze teany hatao avao ro haripakiny.
Ombia vo ho avy ty farany?
Tsy volanini-Baiboly mivanta hoe ombia ty hiaviani-farany. (Matio 24:36) Fe misy famantara ameany ahità hoe fa marìny ty farany. Fa nivolanini-Baiboly mialoha raha manaraky retoa:
Anisani-raha hiseho “amy pilasy samby hafa any”, ty aly, ty mosary, ty arety mandripaky, noho ty horohorontany mahery.—Matio 24:3, 7, 14; Lioka 21:10, 11; Apokalypsy 6:1-8.
Tea tena ty ankamaroan’olo amy ankapobeny. Misy zao ohatsy, “tea drala,” “tsy mahay misaotsy,” noho “tsy mahatanjaky ty ainy.”—2 Timoty 3:1-5.
Maneky ty ankamaroan’olo hoe nanomboky tamy 1914, le hita tamy ty raha niseho amy tontolo toy eto ty porofo nivolanini-Baiboly mialoha mikasiky hoe fa mariny ty farany. Laha teanao ty hahazo fanazavà fanampiny, le henteo ty lahatsoratsy hoe “Inona no Asehon’ny Fanisan-taonan’ny Baiboly Momba ny Taona 1914?” noho ty “Inona avy ny Famantarana ny ‘Andro Farany’?”
Ino ty dikani-hoe “apokalypsy” amy Baiboly ao?
Ty safà-Grika tam-boalohany any nadika hoe “apokalypsy” amy Baiboly ao io, le midika hoe “tsy misaro” na “tsy mivony.” Matetiky safà zay ro ampiasà mba hivolana hoe natoro ty fanazavà raiky sekirè. Resahini-Baiboly koa “ty fanatoroa [na apokalypsy] ani-Jesosy Tompo.” Sahala hoe atoro zany Jesosy lafa hiseho amy ty heriny mba handripaky ty raha raty iaby an-tany etoa sady hanome valisoa ani-ze manompo a-Ndranahary.—2 Tesalonianina 1:6, 7; 1 Petera 1:7, 13.
Kaihy hoe Apokalypsy ty boky farany amy Baiboly ao satria mampitoro ty raha hiseho amy hoavy. (Apokalypsy 1:1) Miresaky vaovao soa boky io sady misy hafatsy mahavelom-panantenà. (Apokalypsy 1:3) Hita ao fa handrava ty tsy rariny iaby Ndranahary sady hampimpoly ani-tany toy ho lasa paradisa. Amy fotoa zay, le tsy hisy sasy ty raha mampararirary noho mampijaly ty olombelo. Ndre ty fahafatesa aza tsy hisy.—Apokalypsy 21:3, 4.
Teanao va ty hianatsy raha maro mikasiky raha soasoa ampitamanini-Baiboly rezay? Afaky manampy anao hianatsy Baiboly tsy andoava drala ty Vavolombeloni-Jehovah. Mampirisiky anao zahay mba hifandramby amin-drozy.