•   “Nanao tatitsy Chine hoe tamy tao toy ro nisy hafanà noho bain-tao marè mandilatsy ani-azy telo voasoratsy tamy tatitsy bakany zay rey.”​—The Guardian, 7 Septambra 2022 iny.

•   “Fa ho efatsy tao zay ro nijaly vokatsini-bain-tao ty faritsy sisany an’Afriky ao, le mbo hitohy raha zay amy tao toy.”​—UN News, 26 Oòh 2022.

•   “Atahora ho voani-bain-tao ty roe ampahateloni-faritsini-Eropy sady zay ty tena hanjeky mare laha ohary amy fa nisy tanatini-500 tao lasa.”​—BBC News, 23 Oòh 2022.

 Maro ty manampahaiza mivola fa mbo hitohy avao bain-tao rey sady vomaiky hanjeky. Afaky mitamà va tsika hoe mbo hihasoa raha zay amy hoavy? Ino ty volanini-Baiboly?

 Ho zao ty nivolanini-Baiboly mialoha mikasiky ani-androntsika zao:

•   “Hisy mosary . . . amy pilasy samby hafa any.”​—Lioka 21:11.

 Miteraky mosary matetiky ty bain-tao. Manatanteraky ty faminania amy Baiboly ao ty fisiani-mosary, ty fijalea noho ty fahafatesa vokatsini-bain-tao.​—Apokalypsy 6:6, 8.

 Resahini-Baiboly ty tena antony mahavy ani-raha zay. Ho zao ty volaniny:

•   “Tsy natao handay raiky ty fiainany ... ty olo.”​—Jeremia 10:23.

 Midika zay fa tsy hahavita “handay raiky ty fiainany” mihintsy ty olombelo. Tsy mahay manapa-kevitsy ty olombelo, le zay matetiky ro mampisy ty bain-tao noho ty tsy fahampeani-rano.

•   Maro ty manampahaiza mieky hoe vokatsini-raha ataon’olombelo avao ro mahavy fiakarani-hafana io, le matetiky raha zay mampisy bain-tao noho tsy fahampian-drano amy tany toy iaby.

•   Tea tena ty olo sady hita amy ty raha ataony hoe tsy mitsinjo lavitsy rozy, ka zay mahavy ty ala ho ripaky, ty tontolo iaina ho simba, le ty harena an-kiboni-tany ho lanilany fahatany. Vokany, le atahora ho ritsy tanteraky ty vavarano noho ty loharano mpanome rano antsika.

 Fe soa avao fa mampitama raha antsika ty Baiboly.

 Mampitamà ty Baiboly fa hamaha ty problemo amy resaky tsy fahampiani-rano Ndranahary. Amy fomba akory?

1.  1. ‘Handripaky ze olo manimba ani-tany toy’ Ndranahary. (Apokalypsy 11:18) Halàny ty antony raiky mahavy ty tsy fahampiani-rano, tsy ino zay fa ty olo raty fanahy noho tea tena mpanimba ty tontolo iaina.​—2 Timoty 3:1, 2.

2.  2.  “Hanjary ranovory itiriani-bararata ty tany henta.” (Isaia 35:1, 6, 7) Hampoli-Ndranahary amy pilasiny ty raha simba vokatsini-bain-tao, le hataony lasa paradisa azon-drano soa tany toy.

3.  3. “Mikarakara ani-tany toy iha, le ataonao mahavokatsy maro noho mahavano ie.” (Salamo 65:9) Mitahy Ndranahary, ka ho feno sakafo mahasalama noho rano malio ampy ho an’olo iaby tany toy.