MIAMBENA AVAO!
Tao 2022: Tao Nanahira—Ino ty Volanini-Baiboly?
Nahare vaovao maro mikasiky aly, problemo toe-karena noho loza aterakini-natiora tsika tamy tao 2022 iny. Ty Baiboly avao ro manazava amintsika ty tena dikani-raha rey.
Ino ty tena dikani-raha niseho tamy 2022 rey?
Raha niseho tamy 2022 rey, le vomaiky manaporofo hoe miay amy fotoa kaihini-Baiboly hoe “andro farany” tsika. (2 Timoty 3:1) Nanomboky tamy 1914 andro farany io. Fa nivolanini-Baiboly sandrany hoe ino iaby ty raha hiseho. Mba henteo moa fa nihitantsika mihintsy raha reo tato ho ato.
“Aly.”—Matio 24:6.
Niay Tanatini-Aly Ndraiky ty Vahoakini-Eropy Tamy 2022 Iny.” a
Henteo ty lahatsoratsy hoe “Tafihin’i Rosia i Ukraine.”
“Mosary.”—Matio 24:7.
2022: Mbo Tsy Nisy Mosary ho toy Ndraiky!” b
Henteo ty lahatsoratsy hoe “Mampitombo ny Mosary Maneran-tany ny Ady any Ukraine.”
“Arety mandripaky.”—Lioka 21:11.
“Nimpoly ndraiky polio iny, maro ty voani-variole du singe, kanefa COVID-19 mbo mandravarava. Mikai-doza vatany aloha ty arety mifindra sady malemy ty olombelo.” c
Henteo ty lahatsoratsy hoe “6 Tapitrisa no Matin’ny COVID.”
“Raha mampatahotsy.”—Lioka 21:11.
“Lafa mandiniky ani-tao 2022 iny iha, le ho tiaronao hafanà nanjeky iny, baintao rey, afo nandravarava rey, noho ranobe rey. Nanimba raha maro raha rey, namono olo maro, sady an-tapitrisany ty olo tsy nanan-trano hialofa.” d
Henteo ty lahatsoratsy hoe “Lasa Mafana Be Tsy Hoatran’ny Mahazatra ny Mari-panan’ny Tany.”
“Koronta [na, “rotaky; fizizoa,” f.a.p.].”—Lioka 21:9.
“Nimaro biby ty olo nanao grevy hanohera fanjakà tamy tao 2022 toy. Tsy zay fa nampeloky olo marè ty problemo amy toe-karena, sirtò ty fiakarani-vilim-piaina.” e
Henteo ty lahatsoratsy hoe “Mihamidangana ny Vidim-piainana Maneran-tany.”
Vasa hanao akory 2023 toy?
Samby tsy mahay ze tena raha hiseho amy 2023 toy tsika. Fa ty haintsika avao le hoe kely sisa ty Fanjakà-Ndranahary, azy fanjakà an-danitsy any iny, le hanova tanteraky ty fiaina an-tany etoa. (Daniela 2:44) Halàni-fanjakà io ze raha iaby mahavy ty olombelo hijaly, le hataony koa ze hahatanteraky ty sitrapo-Ndranahary an-tany etoa.—Matio 6:9, 10.
Oriho torohevitsini-Jesosy Kristy iny hoe “miambena avao”, le henteo soa fa manatanteraky ty faminaniani-Baiboly ty raha miseho amy tany toy iaby. (Marka 13:37) Misy raha maro afaky manampy anao noho ty fianakavianao amy Baiboly ao. Mifandrambesa aminay laha mila fanazavà fanampiny mikasiky ani-zay.
a AP News, “2022 Was Year the Horror of War Returned to Europe,” nisoratini-Jill Lawless, 8 Desambra 2022.
b Programme Alimentaire Mondiale (PAM), “A Global Food Crises.”
c JAMA Health Forum, “Living in an Age of Pandemics—From COVID-19 to Monkeypox, Polio, and Disease X,” nisoratini-Lawrence O. Gostin, JD, Septembra 22, 2022.
d Earth.Org, “What’s Behind the Record-Breaking Extreme Weather Events of Summer 2022?” nisoratini-Martina Igini, 24 Oktobra 2022.
e Carnegie Endowment for International Peace, “Economic Anger Dominated Global Protests in 2022,” nisoratini-Thomas Carothers noho Benjamin Feldman, 8 Desambra 2022.