Vo tsiela zay, le nisy fanadihadia natao tamy faritsy sankarazany amy tany toy iaby. Araky ty nihita tamy tatitsy io, a le olo raiky anatin’ny efatsy ro mahatiaro mangiky.

•   “Samby mety hahazo ty olo iaby ty fahatsapà hoe tsy mana nama na tsy misy olo iresaha, fa tsy mifily tao na pilasy.”​—Chido Mpemba, Sampana Mikasiky ty Fifandrambesa Amy Fiaraha-monina, amy Fikambana Iraisam-pirenena Mikasiky Fahasalamà ao.

 Mieritseritsy ty ankamaroan’olo hoe olo fa antitsy noho tsy de mifandramby amin’olo rey avao ro mety hahatiaro mangiky. Fe mifanohitsy amy zay, fa mety ho voany koa ndre ty tanora, ndre ty olo salama soa, ndre ty olo manan-draha, ndre ty olo manambaly. Mety hisy vokany amy fahasalamà ara-bata noho ara-pihetseham-pon’olo raiky ty tsy fifandrambesa amin’olo noho ty fahatiarova mangiky.

•   Nivola ho zao Dr. Vivek Murthy, manam-boninahitsy amy resaky fahasalamà a Etazinỳ any: “Tsy hoe fihetseham-po raty avao ty fahatiarova ho mangiky. Atahora ho maty malaky manahaky olo mitroky sigara 15 sanandro io koa ty olo tratsiny.”

 Tsy tean’ny Mpamoro antsika iny hahatiaro ho raiky tsika. Fa nitea-Ndranahary hana nama soa avao tsika bakany bakany zay.

•   Torolalan’ny Baiboly: “Nivola Ndranahary hoe: ‘Tsy soa laha raiky avao zisiky farany lahilahy io.’”​—Genesisy 2:18.

 Tea-Ndranahary hinama aminy tsika. Mampitamà ie hoe hamonjy antsika laha mamonjy azy tsika.​—Jakoba 4:8.

•   Torolalan’ny Baiboly: “Sambatsy ze mahatsapa hoe mila a-Ndranahary, fa azy ty Fanjakàn’ny lanitsy.”​—Matio 5:3.

 Tea-Ndranahary hanompo azy miaraky amin’olo hafa tsika. Lasa falifaly tsika lafa manao ani-zay.

•   Torolalan’ny Baiboly: “Ndao koa tsika hifampidary mba hifandrisiky hampiseho fitiava noho hanao asa soa, ka tsy hahafoy ty fiarahantsika mivory, . . . fa hifampahery.”​—Hebreo 10:24, 25.

 Laha teanao ho hay hoe manino ro tena ilà ty mialy amy fahatiarova ho mangiky, le vakio ty lahatsoratsy hoe “Manirery Nefa Betsaka ny Fitaovam-pifandraisana.”