Maro ty olo ta hanoriky ty fomba fiaina vegan amy tany toy iaby.

•   “Fomba fiaina noho fomba fanenty ty hoe vegan. Ty olo manoriky an’ny fomba fiaina io, le manao ze hahavy ty biby tsy hijaly. Tsy mihina raha baka amy biby na mampiasa biby mba hahazoa hany rozy, sady tsy manao siky na raha hafa baka amy biby.”​—The Vegan Society.

 Tsy hoe ty fitiavan-drozy ty biby avao ro mahavy an-drozy manao ani-zay, fa misy olo sisany manao ani-zay satria ta hiaro ty tontolo iaina, ta ho salama soa, na zay ty takin’ny fivavahany.

•   “Tsy resaky hany avao ro tafilitsy amy fomba fiaina vegan io. Ampifandrambesin’olo amy resaky finoa, safidy mikasiky ty mety noho ty tsy mety, voho fomba hanasoava an’ny zao tontolo zao raha io matetiky.”​—Britannica Academic.

 Manafaky ty raha manahira amy tany toy iaby va ty fomba fiaina vegan? Ino ty raha volanin’ny Baiboly?

 Lafa namoro ty kila raha iaby azy Mpamoro antsika iny, zany hoe Jehovah Ndranahary, a le nataony ambony noho ty biby ty olombelo sady nameany fahefà aminy. (Genesisy 1:27, 28) Nengàny hihina biby mihintsy aza ty olombelo tafara tatoy. (Genesisy 9:3) Fe ndre zay, le tsy teany hampijaly biby tsika.​—Ohabolana 12:10.

 Mivola ty Baiboly fa anjaran’ny kiraidraiky ty mifily hoe hihina hena ie sa tsy hihina. b Fe tsy mianky amy zay ty hahazoantsika hatò amy Ndranahary. (1 Korintianina 8:8) Tsy tokony hitsaratsara ty hafa amy resaky hany zany tsika.​—Romanina 14:3.

 Mivola ty Baiboly hoe tsy ty fomba fiaina arahintsika ro hahafaky ty raha manahira amy tany toy iaby. Ty ankamaroan’ny problemo rey misy ifandrambesany amy politiky, sosialy, noho rafitsy ekonomiky, ka tsy ho vitan’olombelo mihintsy ty hanafaky azy. Mivola ty Baiboly hoe:

•   “Ty fa mengoky tsy hay ampahitỳ.”​—Mpitoriteny 1:15.

 Azy Mpamoro antsika iny ro hanafaky ty raha manahira antsika. Mampiasa sarin-teny ty Baiboly mba hanazavà ty raha hataony.

•   “Le nahita lanitsy vaovao noho tany vaovao aho, fa fa lasa ty lanitsy taloha noho ty tany taloha, sady fa tsy nisy riaky sasy.”​—Apokalypsy 21:1.

 Halà-Ndranahary tsy hoe “ty lanitsy taloha,” zany hoe ty fanjakàn’olombelo, le hosoloany “lanitsy vaovao,” zany hoe hosoloany amy Fanjakàny an-danitsy any iny. Fanjakàny io amy zay koa hangalaky “ty tany taloha,” zany hoe handripaky ty raty fanahy, ka hanjaka amy “ty tany vaovao,” na ze olo maneky ty fahefàny avao.

 Lafa manjaka ty Fanjakà-Ndranahary vo ho hain’olo ty hiaraky hiay amy biby noho hikarakara ty tontolo iaina.​—Isaia 11:6-9.