MIAMBENA AVAO!
Koronta Ara-politiky—Ino ty Volanin’ny Baiboly?
Maro ty olo miasa loha henanizao satria manjeky ty hasatà ataon’olo ta hanova ty rafitsy politiky.
Manahaky ta Meksiky tany zao, tamy fifidiana 2023-2024 iny, le nahatratsy 39 ty kandidà nisy namono. Nisy koronta hafa koa niseho tafarani-zay, ka lasa tsy nifantoky tamy fifidiana iny ty olo.
Nisy hasatà maro koa niseho ta Eropy any, anatini-zay ty tetiky ho namonoa an’ny praiminisitran’ny Slovakỳ iny, tamy 15 Mey 2024.
Fa ho nisy namono Donald Trump, azy prezidàn’ny Etazinỳ taloha iny, tamy 13 Ziè 2024 teo. Lasa natahotsy amy zay ty olo.
Fa manino ro manjeky marè ty hasatà mifandramby amy politiky henanizao? Mbo ho tampitsy avao va raha io ndraiky andro any? Ino ty volanin’ny Baiboly?
Fa nambara mialoha hoe hisy ty fisaratsaraha ara-politiky
Fa nivola mialoha ty Baiboly hoe ho maro ty olo hana toetsy mampisy koronta noho tsy fifanaraha amy “andro farany,” zany hoe amy androntsika zao.
“Amy andro farany, le hisy fotoa sarotsy tsy mora atrehy. Fa ty olo . . . tsy hahay hisaotsy, ho mora mivaliky, . . . tsy ho azo ifanaraha, . . . hasiaky marè, . . . ho mpamadiky, hahery loha, hirengirengy.”—2 Timoty 3:1-4.
Fa nivola mialoha koa ty Baiboly hoe hisy koronta amy tany toy iaby, anatini-zay ty fizizoan’olo amy fanjakà noho ty koronta ara-politiky. (Lioka 21:9, fanamariha ambany pejy) Fe ndre zay, le tsy haharitsy zisiky farany raha rey.
Kely sisa le ho tampitsy ty koronta ara-politiky
Hazavanin’ny Baiboly fa hosoloa-Ndranahary amy ty Fanjakàny lafa atao fanjakàn’olombelo iaby.
“Hanory fanjakà tsy ho rava zisiky farany [azy Ndranaharini-lanitsy iny] . . . Hotorotoroeny noho haravany fanjakà [hafa] iaby reo, fa ie ho eo avao zisiky amy fotoa tsy voafaritsy.”—Daniela 2:44.
Tsy hisy sasy ty koronta sady hiharo raiky ty olo iaby lafa manday ty Fanjakà-Ndranahary.
Kaihy hoe “Anakini-Mpanjakani-Fiadana” Jesosy Kristy, azy Mpanjakan’ny fanjakà io iny. ‘Tsy hisy farany ty fiadana’ lafa ie manday.—Isaia 9:6, 7.
Ndre henanizao, le fa mianatsy hiay anatin’ny filamina ty olo fehezin’ny Fanjakà-Ndranahary. Vokatsin’ny zay, le zao ty volanin’ny Baiboly: “Le hanefy ty sabatsin-drozy ho sarỳ rozy, le ty lefon-drozy ho meso fandrantsanam-boaloboky. Tsy hampiranga sabatsy hifamangoa ty firenena, sady tsy hianatsy aly sasy.”—Isaia 2:3, 4.
Laha mila fanazavà fanampiny iha, le vakio ty lahatsoratsy hoe “Inona no Hataon’ny Fanjakan’Andriamanitra?” le henteo koa ty video hoe Ino Fanjakà-Ndranahary Zao?