Tamy Tinainy maray 10 Oktobra 2022, le nandefa bomba tamy tanà maromaro ta Ukraine any ty Russie mba hamalia ty bomba nipoaky nanimba ty pont nampitohy ani-Crimea noho Russie, roe andro talohani-zay. Nampitandrina ty mpanao politiky sisany tafara kelikelini-raha niseho zay hoe hoavy tsy ho ela ty Aramagedona.

•   “Mbo tsy niay tamy raha mety hitariky ho amy Aramagedona mihintsy tsika liany tamy androni-Prezidàni-Etazony John F. Kennedy noho ty aly kaihy hoe Cuban Missile Crisis. . . . Tsy mino mihintsy aho hoe tsy hiafara amy Aramagedona ty aly ampiasà fialia nikleera,” hoy Joe Biden Prezidàni-Etazony tamy 6 Oktobra 2022.

•   “Mieky aho hoe hiatriky Aramagedona tsika tsy ho ela. Handay loza amy tany toy iaby raha zay,” hoy Volodymyr Zelensky Prezidàni-Ukraine, lafa nanontany azy mikasiky ty ho vokatsini-fampiasà fialia nikleera ty mpanao gazety baka amy BBC News tamy 8 Oktobra 2022.

 Hitariky ho amy Aramagedona vatany va ty fialia nikleera? Ino ty volanini-Baiboly?

 Aha. Miseho indraiky avao ty safà hoe “Aramagedona” amy Baiboly ao. Hita amy Apokalypsy 16:16 ao raha zay. Tsy miresaky aly ifanaovani-firenena samby firenana raha io fa aly hatao-Ndranahary noho “ty mpanjakani-tany iabiaby.” (Apokalypsy 16:14) Hampiasa ty aly Aramagedona Ndranahary mba hanampera ty fandaisan’olombelo.​—Daniela 2:44.

 Laha teanao ty hahazo fanazavà fanampiny mikasiky ty ho vokatsini-Aramagedona amy tany toy, le vakio ty lahatsoratsy hoe Inona no Atao hoe Ady Hara-magedona?

 Aha. Ndre hampiasa fialia nikleera aza ty mpanday olombelo amy ho avy, le tsy hengà-Ndranahary ho rava mihintsy tany toy. Hoy ty Baiboly:

•   “Fa ty tany ho eo avao mandrakizay.”​—Mpitoriteny 1:4.

•   “Ty olo marina ro handova ty tany, ka hipetraky eo mandrakizay.”​—Salamo 37:29.

 Fa ty faminaniani-Baiboly noho ty raha miseho, le midika hoe fa mariny hisy fiovà bevata amy ty tantaran’olombelo an-tany etoa. (Matio 24:3-7; 2 Timoty 3:1-5) Ianaro ty raha volanini-Baiboly mikasiky ty ho avy amy alalani- fianara Baiboly tsy andoava drala.