Mampisaratsaraky firenena maro maneran-tany ty politiky. Mivola ty Foibem-pikarohani-Pew fa “65% amin’olo ampy tao amy tany 19 nanaova fanadihadia ro mivola hoe tena tsy mifanaraky hevitsy mihintsy ty olo samby hafa antoko politiky amin-drozy any.”

 Ambinao va hoe vomaiky mihamanjeky ty fisaratsarahan’olo aminareo any vokatsini-politiky? Ino ty mahavy ani-zay? Mety hisy vahaolana avao va? Diniho ty raha volanini-Baiboly.

 Fa nivolanini-Baiboly mialoha hoe ho raty ty toe-tsain’olo amy “andro farany” misy antsika toy. Sarotsy ty mifanaraky hevitsy vokatsini-raha zay.

•   “Amy andro farany, le hisy fotoa sarotsy tsy mora atrehy. Fa ty olo ho tea tena, . . . tsy ho azo ifanaraha.”​—2 Timoty 3:1-3.

 Maro ty olo miezaky mafy mba hahavy ty fitondram-panjakà hahita vokatsy soa, fe tsy mandaitsy ty ezakin-drozy. Lasa sarotsy amy fanjakà na tsy vitany ty miaraky miasa mba hamaha problemo lafa tsy mitovy hevitsy ty olo. Fa ela ty Baiboly ro nivola hoe ino ty vokatsini-raha zay.

•   “Olombelo ro nanjaka tamin’olombelo ka nijaly ty vahoaky.”​—Mpitoriteny 8:9.

 Fe toy misy vahaolana resahini-Baiboly. Fitondram-panjakà raiky, andesini-mpanday raiky afaky mamaha ty problemo iaby mahavy ty olombelo mijaly.

 Mivola ty Baiboly fa Jesosy raiky avao ro mpitariky afaky mamaha ty problemo sankarazany. Nanino? Satria ta hampiada noho hampiharo raiky ty olombelo ie, sady mana hery noho fahefà hanaova ani-zay.

•   “Amy andro anjakany, le ho maro biby ty olo marina, sady ho maro ty fiadana.”​—Salamo 72:7.

•   “Hanompo azy ty firenena iaby.”​—Salamo 72:11.

 Mpitariky tena soa Jesosy satria tea olo sady ta hanampy olo, sirto ty olo nitratsini-tsy rariny.

•   “Havotany ty mahantra mikoiky vonjy, noho ty maliniky, voho ze olo iaby tsy misy mpanampy. Hoferinesany ty maliniky noho ty mahantra, le havotany ty mahantra. Hanafaky an-drozy amy fampijalea noho faneriserea ie.”​—Salamo 72:12-14.

 Mianara raha maro mikasiky ty Fanjakà Ndranahary, zany hoe fitondram-panjakà an-danitsy any handesini-Jesosy iny. Henteo hoe ino ty soa ho azonao baka amy fanjakà io, le akory ty hanohananao azy.

•   Henteo ty video hoe Ino Fanjakà-Ndranahary Zao?

•   Vakio ty lahatsoratsy hoe “Tsy Manao Kolikoly ny Fanjakan’Andriamanitra.”