MIAMBENA AVAO!
Manino ro Manjeky ty Fankalaina?—Ino ty Volanin’ny Baiboly?
Le fa resaky fanabokà, famonoa olo vokatsin’ny fankalaina, fampijalea miharo fanavakavaha, noho aly, reo avao ro hitanao amy vaovao henanizao.
“Mihamanjeky henanizao ty safà feno fankalaina amy tranonkala fifandrambesa ao. Vomaiky nampanjeky azy marè alin’Israely noho Gaza io. Mampirisiky ty olo hialy koa azy mieritseritsy handay fanovà reo.”—The New York Times, 15 Novambra 2023.
“Mampatahotsy ty raha niseho nanomboky tamy 7 Oktobra iny, satria nitombo tampoky ty fankalaina, ty safà feno fanabokà noho ty famonoa olo miharo fanavakavaha.”—Dennis Francis, prezidàn’ny Fivoriamben’ny Firenena Mikambana, tamy 3 Novambra 2023.
Tsy vo zao ro nampisy ty safà feno fankalaina, ty hasatà, voho ty aly. Mivola ty Baiboly hoe fa nisy olo ‘nanao safà mitsiboky manahaky bala kititsy io,’ noho tea aly voho tea hasatà koa taloha. (Salamo 64:3; 120:7; 140:1) Fe mivola ty Baiboly hoe misy dikany bevata fankalaina miseho henanizao io.
Fankalaina—Famantara amy androntsika zao
Miresaky antony roe mampanjeky ty fankalaina amy androntsika zao ty Baiboly.
1. Fa nivola ie hoe hisy fotoa “hihamanìntsy ty fitiavan’olo maro.” (Matio 24:12) Tsy manam-pitiava ty ankamaroan’olo, fa mana toe-tsay mampitombo ty fankalaina.—2 Timoty 3:1-5.
2. Manjeky ty fankalaina henanizao satria raty toetsy noho raty fanahy azy mifehy an’ny zao tontolo zao iny, zany hoe Satana Devoly. Resahin’ny Baiboly fa “zao tontolo zao iaby, le ambany fahefani-azy raty iny eo.”—1 Jaona 5:19; Apokalypsy 12:9, 12.
Fe ndre zay, le mbo mivola koa ty Baiboly hoe kely sisa le hafahi-Ndranahary ty fototsy mampisy fankalaina io. Tsy zay avao, fa hafahiny iaby koa ty voka-dratin’ny fankalaina rey. Zao ty raha ampitamanin’ny Baiboly:
“Hofafàny [Ndranahary] ty ranomaso iaby amy ty mason-drozy, ka tsy hisy sasy ty fahafatesa, sady tsy hisy sasy ty alahelo na ty fitaraina na ty raha mahararirary, fa fa lasa ty raha taloha.”—Apokalypsy 21:4.