Midary ty Olo Mareny va Ndranahary?
Fa ho 70 tapitrisa henanizao ty olo mareny amy tany toy iaby. Mampiasa safà atao amy tana fa mandilatsin’ny 200 rozy lafa hifampiresaky amin’olo. Mampalahelo fa ampijalin’olo ty mareny sisany. Henteo ohatsy retoa:
“Amy tany toy iaby, le matetiky tsy hajàn’olo ty zon’ny mareny noho azy tsy de maharè soa rey.”—National Association of the Deaf (U.S.).
“Amy tany vo mihamandroso rey any, le ty olo mareny ro tena farany mahantra, satria rozy tsy mana fahafaha hianatsy, hiasa, na hahazo fanazavà.”—World Federation of the Deaf.
Ka manao akory ty fihevera-Ndranahary an’olo mareny rey? Ino ty raha volanin’ny Baiboly mikasiky ty olo mareny? Le akory ty ataon’ny Vavolombelon’i Jehovah henanizao mba hanampea an-drozy?
Ty Fahità-Ndranahary ty Olo Mareny
Mivola ty Baiboly fa tena midary ty olo mareny Jehovah a Ndranahary. Teany laha tsy misy mampijaly rozy sady mahazo soa ty fampianara baka aminy.
Andinin-teny: “Ka manozo ty mareny.”—Levitikosy 19:14.
Ty teany hambara: Niaro ty zon’ny mareny ty Lalànan’i Jehovah tamy andron’Israely.
Andinin-teny: “Tsy mitingy volon’olo Ndranahary.”—Asan’ny Apostoly 10:34.
Ty teany hambara: Midary ty olo iaby Jehovah, ndre ino ndre ino ty kolontsainy, ty nitezà azy, ty fivolanany, le anatini-zay koa ty mareny.
Andinin-teny: “Nandeha Jesosy nitety ty tanà iaby. . . , nitory ty vaovao soan’ny Fanjakà iny.”—Matio 9:35.
Ty teany hambara: Ty hampianatsy ty olo mikasiky ty Fanjakà Ndranahary noho ty raha hataony ho ahi-ty olo iaby, anatini-zay ty mareny, ro anton-dian’i Jesosy tan-tany etoy.—Matio 6:10.
Andinin-teny: Nataon’i Jesosy “maharè ty mareny, le mivola ty moa.”—Marka 7:37.
Ty teany hambara: Nasehon’i Jesosy tamy raha nataony hoe lafa manday ty Fanjakà-Ndranahary, le haharè noho hahay hivola ty mareny. Talohan’ny hanaovany fahagagà mba hahavy an-drozy haharè noho hahay hivola, le nampiasa fihetsiky tse Jesosy lafa niresaky amin-drozy.—Marka 7:31-35.
Andinin-teny: “Hatao maharè ty sofini-mareny.”—Isaia 35:5.
Ty teany hambara: Fa nivola mialoha Jehovah hoe haharè ty mareny.—Isaia 29:18.
Ty Fomba Anampean’ny Vavolombelon’i Jehovah ty Mareny Henanizao
Mizara ty hafatsy manome fanantenà baka amy Ndranahary amy ty olo mareny amy tany toy iaby ty Vavolombelon’i Jehovah. Ino ty ataonay mba hahavità ani-zay? Fa nampiboaky Baiboly noho video fianara Baiboly amy safà atao amy tana 100 mahery zahay. Mandamy fianara Baiboly noho fivoria Kristiana amy safà atao amy tana koa zahay. Afaky mandramby soa amy raha reo iaby ze maniry hahazo ty fanampea-Ndranahary, satria tsy andoava drala raha reo. Fa manino zahay ro manao ani-zay? Satria nandidy Jesosy hoe: “Nahazo maimaim-poana nareo, le manomeza maimaim-poana.”—Matio 10:8.
Azonao atao ty manenty ani-fitaova reo amy internet ao na mangalaky azy ho amy fitaovanao ao, amy alalan’ny retoa:
JW.ORG. Kiboho ze sary mitovy amin’io hitanao ambonin’ny pejy amy tranonkala toy ato, laha teanao ty hahita fanazavà amy safà atao amy tana raiky.
Application JW Library Sign Language. Ampiliro amy fitaovanao ao application tsy andoava drala io, le ho afaky hangalaky na hanenty video amy safà atao amy tana iha.
Ino Iaby ty Fitaova Fampianara Baiboly Anananay?
Baiboly amy safà atao amy tana. Ty Soratsy Masy Fandikan-tenin’ny Tontolo Vaovao amy safà atao amy tana Amerikein ro Baiboly voalohany nadika amy safà atao amy tana amy tany toy iaby. Fa misy amy safà atao amy tana maro henanizao Baiboly io na ty tampany aminy, sady mbo miampy fivolana maro avao santao. (Laha teanao ho hita ty listan’ny fivolana nandikà azy na teanao ty hanenty an’ny Baiboly io amy internet ato, le henteo ty efajoro hoe “ Ty Baiboly Fandikan-tenin’ny Tontolo Vaovao amy Safà Atao amy Tana.”)
Henteo ty video hoe Fa Misy amy Safà Atao amy Tana Amerikein ty Fandikan-tenin’ny Tontolo Vaovao, laha teanao ho hay ty asa mafy natao mba hampiboaha an’ny Baiboly io amy safà atao amy tana.
Laha teanao ty handramby soa baka amy famakia Baiboly, le ampiliro amy fitaovanao ao ty application hoe JW Library Sign Language. Afaky mifily andininy raiky amy safà atao amy tana mihintsy iha lafa mampiasa an’ny fitaova io.
Samby mareny Dmytro noho Vita, fe maharè soa ty anakin-drozy. Henteo moa ty soa rambesin’ny fianakavian-drozy lafa manenty ty Baiboly amy safà atao amy tana rozy sanandro.
Video fampianara Baiboly. Mampiboaky video amy safà atao amy tana ty Vavolombelon’i Jehovah mba hanampea ty olo hahatakatsy noho hanoriky ty torohevitsin’ny Baiboly ho ahi-ty. . .
Fianara Baiboly miaraky amy mpampianatsy. Afaky mianatsy Baiboly amy safà atao amy tana iha. Hisy mpampianatsy Baiboly hanampy anao, le iha avao ro mametraky ty halavan’ny fotoa teanao hianara. Mba anoharo moa fianara Baiboly tsy andoava drala io.
Mipetraky a Philippines any Jeson Senajonon. Henteo moa fa tena nanampy azy hifandramby mariny amy Ndranahary ty fianara Baiboly miaraky aminay.
Pasiteran’ny fiangona raiky ta Honduras any Mario Antúnez. Nanampy azy hahita ty valin’ny fanontanea nanahira azy ty fianara Baiboly. Vakio ty lahatsoratsy hoe ‘Be dia Be ny Fanontaniako Mbola Tsy Voavaly’, fa hohazavàny amy tantaram-piainany io ao raha zay.
Fivoria noho fotoa bevata. Mana fiangona noho antokom-pitory manao safà atao amy tana zahay amy tany toy iaby. Miaraky mivory rozy sankerinandro mba hianatsy noho hanompo a Ndranahary. Misy fotoa bevata natao hianara Baiboly koa alaminay santao, le misy natoka ho an’olo manao safà atao amy tana koa. Amy fivoria noho fotoa bevata alaminay rey koa, le misy olo mandika teny ho ahin’olo sady jiky no mareny rey. Mampiboaky boky noho gazety amy soratsy braille koa zahay, le tsy vilin-drala raha reo.
Hila ty fiangona mariny anao.
Ta hahay misimisy mikasiky ty fivoriamben’ny vondrom-paritsy noho fivoriamben’ny faritsy alaminay.
Hanatriky ty Fahatiarova ty Nahafatesan’i Jesosy, azy fotoa farani-ze bevata ho anay iny.
Mipetraky a Meksiky any José Luis Ayala. Vo nateraky ie le fa nareny, fe bakeo lasa nijiky koa. Henteo ty fomba nanampea azy mba ho lasa mpampianatsy Baiboly mahay.
a Anara-Ndranahary Jehovah zao. (Salamo 83:18) Henteo ty lahatsoratsy hoe “Iza moa i Jehovah?”