Tena drala be ty lany amy aly rey.

•   “Tamy taon-dasa, le nandany 2,2 tapitrisa tapitrisa dolara amerikein ty firenena amy tany toy iaby mba hanohana aly. Mbo tsy nisy fandania drala amy aly hozay ndraiky bakany zay.”​—The Washington Post, 13 Fevriè 2024.

 Fe tsy drala avao ty lany amy aly rey. Mba eritsereto avao, ohatsy, ty voka-draty hafa aterakin’ny aly a Ukraine any io.

•   Maramila. Laha araky ty kalikily nataon’olo sisany, le eo hoe amy 500 000 eo ty maramila nimaty na naratsy, liany nanombohan’ny aly io roe tao lasa zay.

•   Olo tsotra. Fa mandilatsin’ny 28 000 ro nimaty na naratsy, araky ty tatitsy nataon’ny Firenena Mikambana. Nivola hozao manamboninahitsy amy ONU ao zay: “Fa tsy ho hay isahy sasy hoe firy ty fiainan’olo simba vokatsin’ny aly io.” a

 Tena maro ty olo mijaly vokatsin’ny aly amy tany toy iaby.

•   114 tapitrisa. Io ty isakin’ny olo nafindra pilasy vokatsin’ny aly noho koronta, zisiky tamy Septambra 2023 teo.

•   783 tapitrisa. Io ty isakin’olo mijaly tratsin’ny kerè. “Ty aly ro anisan’ny tena mampisy kerè io. Ty 70 sanjato amin’olo tratsin’ny kerè amy tany toy iaby zao, le mipetraky amy tany misy aly noho koronta rey any.”​— Fandaharan’asan’ny Firenena Mikambana Mikasiky Sakafo Eran-tany.

 Mbo ho tampitsy avao va ty aly ndraiky andro any? Mbo tamàny hisy avao va ty filamina? Mba ho afaky haharè tavy ty vokatsy an-tany etoy avao va ty olo, ndraiky andro any, ka tsy hisy sasy ty hahantra noho tratsin’ny kerè? Ino ty raha volanin’ny Baiboly?

 Fa nivola mialoha ty Baiboly fa hisy aly amy tany toy iaby. Ohariny amy mpitikitsy sovaly raha io.

•   “Nisy sovaly hafa koa niboaky, le sovaly mena manahaky afo io. Namea sabatsy bevata azy mitikitsy azy iny, le nengà hanafaky ty filamina an-tany etoy, amy zay hifamono ty olo.”​—Apokalypsy 6:4.

 Mbo nisy sovaly roe koa nanaraky an’ny mpitikitsy sovaly raiky io. Ty raiky mampiseho ty fiparitahan’ny kerè, le ty raiky mampiseho ty fahafatesa vokatsin’ny arety na antony hafa. (Apokalypsy 6:5-8) Laha teanao ho hay soa ty mikasiky an’ny faminanian’ny Baiboly io noho ty antony mahavy antsika mahazo antoky hoe tanteraky amy androntsika henanizao raha io, le vakio ty lahatsoratsy hoe “Iza Ireo Mpitangin-tsoavaly Efatra?”

 Kely sisa le tsy hampiasà amy aly sasy ty raha an-tany etoy. Fe tsy ty ezaky ataon’olombelo ro hampisy ani-raha zay. Mivola ty Baiboly hoe:

•   Hatao-Ndranahary “tsy misy aly sasy ty amy tany toy iaby.”​—Salamo 46:9.

•   Halàny teo koa ty voka-dratin’ny aly. “Hofafàny ty ranomaso iaby amy ty mason-drozy, ka tsy hisy sasy ty fahafatesa, sady tsy hisy sasy ty alahelo na ty fitaraina na ty raha mahararirary, fa fa lasa ty raha taloha.”​—Apokalypsy 21:4.

•   Hatao-Ndranahary ze hampiada ty olo iaby. “Ty oloko hipetraky amy pilasy anjakan’ny fiadana, noho pilasy voaaro soa, voho pilasy fialà havozaha tsy misy mpanabataba.”​—Isaia 32:18.

 Araky ty faminania amy Baiboly ao, le mampiseho aly noho raha miseho sankarazany amy androntsika zao reo fa fa marìny ty fotoa hisian’ny fiadana.

 Ino ty hatao-Ndranahary mba hampisy an’ny fiadana zay? Hampiasa ty Fanjakàny an-danitsy any ie. (Matio 6:10) Laha teanao ho hay ty mikasiky an’ny Fanjakà io noho ty raha hataony, le henteo video boribory toy: Ino Fanjakà-Ndranahary Zao?