Ino ty Raha Volanin’ny Baiboly Mikasiky tsy Fisian-drano Io?
Samby mila rano malio tsika iaby mba ho velo. Fe “mitombo avao ty rano ilà amy tany toy iaby sady mihasarotsy ty ahità azy,” hoy António Guterres, Sekretera Zeneralin’ny Firenena Mikambana. Amy tany toy iaby, le olo an-tapitrisany ro fa tsy mana fahafaha hino rano malio.
Strdel/AFP via Getty Images
Mbo hahita rano malio ampy ho antsika avao tsika? Sa mbo hitohy avao va tsy fisian-drano toy? Ino ty raha volanin’ny Baiboly?
Ty raha ampitamanin’ny Baiboly mikasiky ty rano
Mampitamà ty Baiboly fa tsy hisy sasy ty tsy fisian-drano amy hoavy. Ho atsiky rano malio noho soasoa amy tany toy iaby.
“Hisy rano hiboiboiky an-diomonto any, le hisy rano hitosaky amy sakasaka maty any. Hanjary ranovory itirian’ny bararata ty tany tsy misy raha mitiry, le hanjary tany ipoiran-drano ty tany maiky.”—Isaia 35:6, 7.
Azo inoa vatany va raha ampitamanin’ny Baiboly io? Diniho avao moa ty raha resahin’ny Baiboly mikasiky ty fomba nanamboara an’ny tanintsika toy.
Ty raha resahin’ny Baiboly mikasiky ty tany noho ty tsingerin’ny rano
“Tsy hoe tsy misy antony ty namoronany [namorona-Ndranahary] azy [ty tany], fa nataony hipetraha.”—Isaia 45:18.
Satria natao-Ndranahary hiaina tany toy, le nataony koa ze fomba hahavy azy hisy rano avao.
“Ampiakariny [Ndranahary] ty piti-drano. Lasa zevoky raha rey, le manjary ora. Le ararakin’ny rahona raha zay, ka mirotsaky amin’olombelo.”—Joba 36:27, 28.
Resahin’ny andininy io ty raha natao-Ndranahary mba hahazoantsika rano noho tsy hahalany azy. Manjary zevoky ty rano an-tany etoy noho an-driaky any, bakeo mitambatsy, le lasa ora. Natao-Ndranahary raha zay mba hahazoa ty olombelo noho ty biby rano malio avao.—Mpitoriteny 1:7; Amosa 5:8.
“Hameako ranonora amy fotoany nareo, ka hamokatsy ty tany, le hamoa ty hazo am-baìbo eny.”—Levitikosy 26:4.
Nampitamàni-Ndranahary ty Israelita hoe tsy maintsy hamokatsy ty fambolean-drozy satria handatsahany ora. Hainy fa mianky amy ty fisian’ny ora ro hampamokatsy ty fambolean’ny Israelita reo noho hahitàn-drozy hany.
Mitovy amy ty raha natao-Ndranahary tamy Israelita reo avao koa ty raha hataony tsy ho ela. (Isaia 30:23) Fe henanizao mbo mihamanjeky avao ty tsy fisian-drano amy tany maro, le anisan’ny antony mahavy ani-zay ty tsy fiavian’ora. Ino koa ty hevitsy hafa resahin’ny Baiboly mba hamahà an’ny problemo mikasiky rano io?
Ty hiafaran’ny tsy fisian-drano io
Resahin’ny Baiboly fa tsy ho ela le hafaha-Ndranahary iaby ty problemo amy tanintsika toy, anatini-zay ty tsy fisian-drano. Ty Fanjakà-Ndranahary ro hampiasàny. (Matio 6:9, 10) Fanjakà io ro handay an’ny tany toy iaby. (Daniela 2:44; Apokalypsy 11:15) Mbo tsy nisy fanjakà nahavita nanafaky ty fototsin’ny tsy fisian-drano io. Ty Fanjakà-Ndranahary avao ro hahavita hanafaky ani-raha retoa.
Problemo: Anisan’ny mahavy tsy fisian-drano io ty fiovaovan’ny toetsandro. Vokatsin’ny fiovaovan’ny toetsandro le tsy avy ty ora, na miakatsy ty rano vokatsin’ny oram-be, na miakatsy ty riaky.
Ty raha hataony: Hampolin’ny Fanjakà-Ndranahary amy pilasiny ndraiky ty tontolo iaina, le tsy hikoronta sasy ty toetsandro. Fa nampitamà moa Ndranahary hoe: “Ataoko vaovao ty raha iaby.” (Apokalypsy 21:5) Amy fotoa zay, le ho atsiky rano ndre amy tany maiky rey any aza. Hisy raha mitiry noho raha miay iaby ndre amy tany tsy hay ipetraha amy zao rey. (Isaia 41:17-20) Jesosy Kristy ro mpanjakan’ny Fanjakà-Ndranahary, le hofeheziny ty herin’ny natiora.
Fa nasehon’i Jesosy tamy ie tan-tany etoy hoe vitany raha zay. Nisy fotoa zao ie nampieny tsioky be, le nampieny riaky mitavoaly. (Marka 4:39, 41) Hita baka amy zay, fa tsy hisy sasy ty loza baka amy natiora lafa manjaka an-tany etoy ty Fanjakà-Ndranahary. Hiada noho hilamy ty olo, le fa tsy hatahotsy loza sasy.
Problemo: Anisan’ny mahavy tsy fisian’ny rano malio io koa ty raha ataon’olombelo. Misy olo noho orinasa tea tena mandoto an’ny vavarano rey, ty ranovory, voho ty mpisy rano ambany tany any.
Ty raha hataony: Hodiovi-Ndranahary ty tany, le hampoliny amy pilasiny ndraiky ty vavarano, ty ranovory, voho ty mpisy rano ambany tany any. Ho lasa paradisa tany toy. Zao ty raha resahin’ny Baiboly fa hiseho amy fotoa zay: “Ho falifaly ty liomonto noho ty tany maiky, le ty sakasaka maty hanitranitra sady ho atsiky folera.”—Isaia 35:1.
Ka hanao akory azy mpanimba tontolo iaina noho tsy midary ty hafa rey? Mampitamà Ndranahary fa ‘handripaky ani-ze manimba ty tany ie.’—Apokalypsy 11:18; Ohabolana 2:21, 22.
Problemo: Ampiseranin’olo avao ty rano, ka ty ahalaniany koa ro malaky marè tany ty hamoria azy.
Ty raha hataony: Lafa ty Fanjakà-Ndranahary ro manday, le ty sitrapo-Ndranahary ro “hatao an-tany etoy,” fa tsy ty ahin’olo tea tena reo sasy. (Matio 6:9, 10) Hampianarin’ny Fanjakà-Ndranahary soa koa ty olo ho ambany fahefàny eo. “Ho atsiky ty fahaiza ani-Jehovah ty tany,” hoy ty Isaia 11:9. a Ka lafa mahay soa a Ndranahary ty olombelo, sady tea azy noho ty zavaboariny, le hikarakara soa an’ny tany toy noho ty raha aminy eo.
Laha teanao ho hay ty raha hafa hataon’ny Fanjakà-Ndranahary, le henteo ty lahatsoratsy hoe “Inona no Hataon’ny Fanjakan’Andriamanitra?”
Laha teanao ho hay hoe akory ty hahavy an’ny tany toy ho lasa paradisa, le vakio amy Baiboly ao ty Isaia toko faha-35.
Henteo ty video hoe Nanino Ndranahary ro Namoro Tany Toy?, laha teanao ho hay ty antony namorona-Ndranahary ty tany noho ty olombelo.
a Anara-Ndranahary Jehovah zao. (Salamo 83:18) Henteo ty lahatsoratsy hoe “Iza moa i Jehovah?”
Mety ho Teanao Koa
MIAMBENA AVAO!
Bain-tao—Ino ty Volanini-Baiboly?
Ho afaky avao va problemo maneran-tany toy? Mbo misy fanantenà va amy ho avy?
FAMPIANARAN'NY BAIBOLY TENA ILÀ
Ino Fanjakà-Ndranahary Zao?
Ty mikasiky ty Fanjakà-Ndranahary ro tena nampianarin-Jesosy, ndre maro ty raha nivolaniny. Fa an-jatony tao maro ty mpanori-dia azy no nivavaky mba hiaviani-Fanjakà io.
MIKASIKY ANAY
Mangataky Hotsidihy
Hiresaky fanontanea ara-Baiboly, na hianatsy marerè mikasiky ty Vavolombeloni-Jehovah.
