Tanatin’ny 30 tao faramparany, le nahatsapa ty olo fa ho raha nilamy ty fifandrambesan’ny firenena amy tany toy iaby sady vomaiky nihasoa avao. Fe diso raha zay laha hentea ty raha niseho vo tsiela.

•   “Matahotsy ty olo hoe hisy vokany amy firenena manodidy an’ny Gaza aly any io. Fa mialy amy sisin-tanin’ny Liban eo koa ty Hezbollah.”​—Reuters, 6 Zanviè 2024.

•   “Manafiky amy faritsy sisany ty maramila fehezin’ny Iran. Tampotampoky eo koa, le nanomboky namokatsy fitaovam-pialia nikleera ndraiky ie. Miaraky miasa amy Russie noho Chine koa ie, ka tena hanahira an’ny firenena andrefa any reo raha zay.”​—The New York Times, 7 Zanviè 2024.

•   “Mbo manimba raha maro avao ty fanafihan’ny Russie an’ny Ukraine.”​—UN News, 11 Zanviè 2024.

•   “Mihamatanjaky amy resaky ara-toekarena noho ara-tafiky avao Chine. Mandrengy ty firenenany avao Taiwan. Mihamitombo avao ty tsy fifanarahan’ny Chine noho Etazinỳ. Samby atahora hampisy aly tampoky raha reo.”​—The Japan Times, 9 Zanviè 2024.

 Fa niresaky mialoha mikasiky tsy fifanarahan’ny firenena reo io va ty Baiboly? Mety hiteraky aly amy tany toy iaby va raha zay?

 Tsy niresaky manoka mikasiky aly raiky miseho henanizao ty Baiboly. Fe fa voaresaky ao hoe “hanafaky ty filamina an-tany etoy” ty aly miseho amy androntsika zao.​—Apokalypsy 6:4.

 Fa voaresaky mialoha amy bokin’i Daniela ao koa fa “amy fotoan’ny farany,” le hifanao kirebaky ty firenena matanjaky ka “hifanosiky,” na samby hanao ze hifeheza an’ny tany toy. Tafilitsy amy kirebaky ataon-drozy io ty fandrengea tafiky noho ty fandania “hanana” na drala amy raha zay.​—Daniela 11:40, 42, 43.

 Mivola ty Baiboly hoe hiharaty tse ty fiaina an-tany etoy zay vo hihasoa. Nivola Jesosy hoe “hisy fijalea bevata mbo tsy nisy tetoy ndraiky, liany nampisy ani-zao tontolo zao.” (Matio 24:21) Hitariky amy aly kaihy hoe Aramagedona na “alin’ny andro bevatan’ny Ndranahary Farani-ze Mahery iny” “fijalea bevata” io.​—Apokalypsy 16:14, 16.

 Fe hanavotsy ty olombelo Aramagedona io fa tsy handripaky azy. Hotamperi-Ndranahary amy aly io ty fandaisan’olombelo, satria rozy avao nahavy aly mandravarava rey io. Laha teanao ho hay hoe manino ro handay filamina Aramagedona io, le vakio lahatsoratsy retoa:

•   “Inona no Atao hoe Ady Hara-magedona?”

•   “Vaovao Tsara ny Hara-magedona!”