Tamy sabotsy 5 Oktobra 2013, le nisy olo 257294 tamy firenena 21 nanatriky ty fivoria faha-129 natao ty fikambana Watch Tower Bible and Tract Society of Pennsylvania. Ty sisany nanatriky mivanta, fa nisy nanaraky tamy video nalefa tamy Internet. Nampoly ndraiky video io hamaray iny, le nisy Vavolombelo hafa koa nanenty. Laha atambatsy ty mpanatriky amy firenena 31 reo, le nisy 1413676. Iny ty fivoria be mpanatriky marè tamy ty fivoria iaby nalamy ty Vavolombelo Jehovah bakany zay. Mbo maro zay laha ohary amy ty mpanatriky tamy fandahara manoka natao ta Meksika noho Amerika Anivo tany, tamy 28 Aprily 2013. Nisy mpanatriky 1327704 tamy zay.

Nandefa mivanta ty fivoriamben-drozy tamy telefony noho radio ty Vavolombelo Jehovah nanomboky tamy 1920, ka afaky nanaraky ty olo maro amy tany toy iaby. Fa mandroso henanizao ty Internet, ka afaky mahita noho maharè ty fandahara iaby ndre ty olo amy pilasy mitoka any. Vavolombelo Jehovah mipetraky a Etazonia any William. Nisy fivoriambe nalamy ta Richmond any, tamy 1942. Afaky nanaraky fandahara iny tamy telefony ie. Nampitoviziny tamy fivoria fatao santao tamy 2013 iny raha zay, ka hoy ty asany: “Mandramby soa maro iha lafa mahita fandahara iny. Mbo tsy nisy manahaky iny bakany zay.”

Niasa mafy ty Vavolombelo baka amy sampa maromaro mba hanomàna ty fandefasa video. Niasa tanaty ty tao raiky mahery rozy, sady nandany lera anarivony maro. Ta Brooklyn, a Etazonia any ro nandamina ty fandefasa mivanta. Tamy farany herinandro nandefasa video iny, le niasa avao ty teknisiany tany ndre haly, satria tsy mitovy ty lera amy tany 31 reo. Nanampy tamy fanomàna fandefasa video io sady nanara-maso azy Ryan. Hoy ty asany: “Zara laha niroro zahay, fe tsy nampanino anay satria hainay hoe maro ty olo handramby soa amy fandahara io.”