E iai le taimi o le a feagai ai lau fanau ma ni tulaga e lē taulau ai. E faapefea ona e fesoasoani iā i latou i na tulaga?

•  Mea e tatau ona e iloa

•  Mea e mafai ona e faia

 O se mea masani le feagai ma tulaga e lē taulau ai. Ua faapea mai le Tusi Paia, e “sesē i tatou uma.” (Iakopo 3:2) E oo fo‘i i fanau e iai mea e sesē pe e lē taulau ai. Ae o le itu e lelei ai, e maua ai e fanau le avanoa e a‘oa‘oina ai le auala e feagai ai ma tulaga faigatā. E lē fananau mai tamaiti ma lenei tomai, ma e mana‘omia ona latou a‘oa‘oina. Ua faapea mai se tinā e igoa iā Laura: “Ua ma mātauina ma la‘u tane, e sili atu ona lelei pe a a‘oa‘oina e tamaiti le auala e feagai ai ma tulaga e le‘i taulau ai, nai lo o le faafoliga atu e pei e leai se mea na tupu. E latou te a‘oa‘oina ai le auala e finafinau ai pea pe a latou lē taulau.”

 O le to‘atele o tamaiti e lē lelei le auala e feagai ai ma tulaga e lē taulau ai. O nisi tamaiti e le‘i a‘oa‘oina le auala e feagai ai ma tulaga e lē taulau ai, ona e taumafai o latou mātua e puni puni i latou mai i mea sesē na latou faia. O se faata‘ita‘iga, pe a leaga togi o se tamaitiiti i le a‘oga, e tuua‘ia e nisi mātua le faia‘oga. Pe a misa fo‘i se tamaitiiti ma sana uō, e tuua‘ia e mātua e sesē le uō a le tamaitiiti.

 Ae po o le a faapefea ona iloa e le tamaitiiti ta‘utino mai ua ia faia se mea sesē, pe afai e taumafai mātua e puni puni o ia mai i āuga o ana mea sesē?

•   A‘oa‘o lau fanau e iai aafiaga o a latou gaoioiga.

   Mataupu silisili faale-Tusi Paia: “O le mea e lūlūina e le tagata, o le mea lava lea e na te seleseleina mai.”—Kalatia 6:7.

   E iai i‘uga o gaoioiga. E iai le tau e totogi pe a faaleagaina se mea. E iai āuga o mea sesē. E ao ona iloa e tamaiti, o so o se mea e latou te faia e mafai ona faapogaia ai se isi mea e tupu. O lea, aua le tuua‘ia isi pe faia faamolemolega pe a faia e lau fanau se mea sesē. Nai lo lea, e ao ona tofo le tamaitiiti i āuga o ana gaoioiga, ma avatu i ai se faasalaga e talafeagai ma lona matua. I le taimi e tasi, e tatau ona malamalama lelei le tamaitiiti o ana gaoioiga sesē ua māfua ai ona faasala o ia.

•   Fesoasoani i lau fanau e iloa auala e feagai ai ma nei tulaga.

   Mataupu silisili faale-Tusi Paia: “E faafitu ona pa‘ū o lē e amiotonu ma o le a toe tula‘i o ia.”—Faataoto 24:16.

   E leai se isi e fiafia pe a lē taulau, ae e lē faapea ai ua leai se faamoemoe. Nai lo o le mafaufau i le māfuaaga e foliga mai ai e lē fetaui se mea na tupu, ia fesoasoani i lau fanau e iloa le auala e feagai ai ma tulaga ua lē taulau ai. O se faata‘ita‘iga, pe a lē pasi su‘ega a lou atalii i le a‘oga, ia fesoasoani iā te ia e iloa le auala e faaleleia ai lenā tulaga, e ala i le to‘aga e su‘esu‘e ma toe taumafai atili. (Faataoto 20:4) Pe afai na tauupu lau tama teine ma sana uō, ia fesoasoani iā te ia e iloa le auala e tausolomua ai e toe faalelei ma lana uō, e tusa lava po o ai e sesē.—Roma 12:18; 2 Timoteo 2:24.

•   A‘oa‘o lau fanau ia lotomaulalo.

   Mataupu silisili faale-Tusi Paia: “Ou te fai atu . . . iā te outou ta‘ito‘atasi, ina ia aua ne‘i faasili le manatu o se tasi iā te ia lava, i lo o le mea e tatau ona manatu i ai.”—Roma 12:3.

   E lē moni ma e lē fesoasoani i lau tama lou fai atu i ai e sili o ia i mea uma. O le mea moni, e oo lava i tamaiti e matuā atamamai i le a‘oga, e lē o taimi uma e latou te maua ai ni togi atoatoa. E lē manumalo fo‘i i taimi uma ni tamaiti e matuā lelei i taaloga. O tamaiti e lotomaulalo ma iloa le mea e gata ai lo latou mafai, e sili atu ona lelei le auala e latou te feagai ai ma tulaga e lē taulau ai.

   Ua ta‘ua i le Tusi Paia e faapea o tulaga faigatā e faamalosia ai i tatou ma fesoasoani e atia‘e ai le tumau. (Iakopo 1:2-4) E ui lava la e lē o se mea e fiafia ai pe a lē taulau i se mea, ae e ao ona e fesoasoani i lau fanau ina ia sa‘o la latou vaai e tusa ai o na tulaga.

   E pei lava ona mana‘omia le taimi ma taumafaiga ina ia a‘oa‘oina ai so o se tomai, e faapena fo‘i le a‘oa‘oina o fanau i le auala e feagai ai ma tulaga faigatā. E ui i lea, o le a tele aogā e maua ai e le tamaitiiti a o faasolo ina matua. Ua ta‘ua i le tusi Letting Go With Love and Confidence: “O talavou e iloa le auala e feagai ai ma faafitauli, e telē le avanoa e latou te lē faia ai se gaoioiga lē atamai pe e lamatia ai fo‘i, pe a oo ina lofitūina i faafitauli. Ae o le a lelei le auala e latou te tali atu ai pe a tula‘i mai se faafitauli e fou ma e le‘i faatalitalia.” O le mea moni, o le tomai e fesaga‘ia ai ma tulaga faigatā, e mafai fo‘i ona fesoasoani i fanau pe a avea ma tagata matutua.

 Fesoasoani: Ia faataatia se faaa‘oa‘oga mo lau fanau. Ia manatua, o le auala e te taulimaina ai tulaga e te lē taulau ai, o le a fesoasoani e toleni ai lau fanau i le auala e taulima ai fo‘i tulaga e latou te lē taulau ai.