FESOASOANI MO LE AIGA | FAAIPOIPOGA

Pe e Tatau Ona Nonofo ae e Leʻi Faaipoipo?

PLAY

E toʻatele ulugalii ua nonofo ae e leʻi faaipoipo. O nisi ua latou faia faapea ina ia iloa ai pe e fetaui lelei le tasi i le isi, ma sauniunia ai mo se faaipoipoga e taulau manuia. Ae po o se gaoioiga atamai le nonofo ae e leʻi faaipoipo?

I lenei mataupu

O le ā le manatu o le Tusi Paia?

E taʻusalaina i le Tusi Paia le faia o feusuaʻiga a o leʻi faaipoipo. O se faataʻitaʻiga, o loo faapea mai le Tusi Paia: ʻIa faamamao mai i amioga lē mamā taufeusuaʻiga.’ (1 Tesalonia 4:3; 1 Korinito 6:18) E aofia ai feusuaʻiga i le vā o se ulugalii o loo nonofo faapouliuli, e tusa lava po o fuafua e faaipoipo i se taimi i le lumanaʻi. a O tapulaa a le Tusi Paia e puipuia ai mai i se maʻitaga e leʻi faatalitalia, ma isi āuga leaga o le nonofo ae e leʻi faaipoipo.
O le faatulagaga o le faaipoipoga e mai i le Atua. Ina ua ia faavaeina lenei faatulagaga, na ia fetalai mai: ʻE tuua e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.’ (Kenese 2:24) O le tautoga o le faaipoipoga, o se faavae lelei lea mo se aiga e iai le alofa ma e tumau.

Po o le a fesoasoani le nonofo faatasi e sauniunia ai mo le faaipoipoga?

E ioe nisi i lenā manatu. E latou te manatu e maua ai e se alii ma se tamaʻitaʻi aogā, a o la faia faatasi feʻau i le fale, ma mātau e le tasi mea e fiafia i ai le isi. Peitaʻi, o se tasi o vala tāua mo se faaipoipoga e taulau manuia, o le tausisi lea i se tautoga ua faia.

E faapefea ona toleniina se ulugalii ina ia nonofo faatasi i taimi e sologa lelei ai ma taimi e lē sologa lelei ai? E lē mafai ona toleniina e ala i le “nonofo mo sina taimi” ina ia iloa ai pe faaipoipo, ona e mafai lava ona faamuta e se tasi o i laʻua i lenā lava taimi pe a manaʻo i ai. Nai lo o lea, e taulau se faigāuō pe a tausisi i laʻua uma i se tautoga ua faia, ma galulue faatasi e foʻia faafitauli.

Le manatu tāua: O le nonofo ae e leʻi faaipoipo, ua sauniunia ai se alii ma se tamaʻitaʻi e teteʻa, nai lo o le sauniunia ai mo le faaipoipoga.

Mataupu silisili o le Tusi Paia: “O le mea e lūlūina e le tagata, o le mea lava lea e na te seleseleina mai.”—Kalatia 6:7.

Po o le a fesoasoani le nonofo faatasi i le itu tau tupe?

E ioe nisi i lenā manatu. E tusa ai ma se suʻesuʻega na faia e le Pew Research Center i le Iunaite Setete, na iloa ai e pe ā ma le toʻafā mai i le toʻasefulu tagata e nonofo ae e leʻi faaipoipo, ona o māfuaaga tau tupe. Peitaʻi, pe a mavae se taimi o nonofo faatasi, e toʻatele e faapea mai o se tasi o māfuaaga autū e latou te leʻi sauni ai e faaipoipo, o faafitauli tau tupe.

E iai foʻi isi faafitauli e tutupu mai i le nonofo ae e leʻi faaipoipo, aemaise lava i fafine. O se faataʻitaʻiga, pe a teteʻa, e masani lava o fafine e gafa ma le tiute tauave o le tausia aʻe o le fanau.

Le manatu tāua: E matuā tele atu āuga leaga o le nonofo ae e leʻi faaipoipo, nai lo o aogā na manatu e maua mai ai.

Mataupu silisili o le Tusi Paia: “O aʻu o Ieova, o lou Atua, o Lē o loo aʻoaʻo oe i mea e aogā iā te oe.”—Isaia 48:17.

Po o le a fesoasoani le nonofo faatasi e ʻalofia ai le sesē o le tagata e faaipoipo i ai?

E ioe nisi i lenā manatu. Peitaʻi, ua taʻua i le tusi Fighting for Your Marriage: “O tagata e nonofo faapouliuli ae e leʻi faaipoipo, e masani lava e latou te lē iloaina, o le nonofo faatasi e matuā faigatā ai ona teteʻa.” Aiseā? Atonu e iloa ane e nisi ulugalii e nonofo faapouliuli, e matuā lē talafeagai lava le tasi mo le isi. Ae ona o loo la tausia faatasi se fagafao, totogiina faatasi se lisi, po ua maua foʻi i se maʻitaga e leʻi faatalitalia, ua faapea mai tagata suʻesuʻe, ua nonofo faatasi ai pea nei tagata ona ua masani ai, ae lē mafai ona la faia se suiga e lelei mo i laʻua. b Ua taʻua atili i le tusi Fighting for Your Marriage: “O nisi tagata, e ono faauma le faigāuō a o leʻi faaipoipo, ae e iʻu lava ina faaipoipo ona ua leai se isi filifiliga, ae e faigofie atu le nonofo faatasi pea.”

Le manatu tāua: O le nonofo ae e leʻi faaipoipo, e matuā faigatā ai ona faauma se faigāuō e lē o maua ai le fiafia, nai lo o le fesoasoani iā te oe e faia se filifiliga lelei.

Mataupu silisili o le Tusi Paia: “O lē ua iai le utaga mamao e na te iloa atu le lamatiaga ma lafi ai, a o lē ua leai se poto masani e alu atu pea o ia ma mafatia ai i āuga.”—Faataoto 22:3.

Pe e iai se isi auala e sili atu?

E telē le avanoa e maua ai se faaipoipoga e taulau manuia, ae ʻalofia faafitauli e tutupu ona o le nonofo ae e leʻi faaipoipo. E faapefea? E ala i le tausisi i tapulaa a le Tusi Paia mo faaipoipoga. Ia tele se taimi e faaalu e iloa lelei ai le tagata ua e mafaufau e faaipoipo i ai, a o leʻi amata ona lua nonofo faatasi o se tane ma se avā. E sili atu ona lelei pe a filifili se paaga e fua i mea e te lua faatāuaina, ma o oulua talitonuga. O na mea e sili atu ona tāua nai lo o le tosina i faalogona tau feusuaʻiga.

O loo i le Tusi Paia fautuaga e fesoasoani iā te oe e maua ai se faaipoipoga fiafia ma tumau. c O se faataʻitaʻiga, o loo i le Tusi Paia mataupu silisili e fesoasoani iā te oe e . . .

ʻalofia ai le lē faamaoni
atiaʻe uiga e avea ai o se paaga faaipoipo lelei
iloa ai ni lapataʻiga a o tuutala

Ina ia iloa atili e faatatau i nei mataupu, tagaʻi i le vaega “Faaipoipoga ma le Aiga” i le jw.org.

Mataupu silisili o le Tusi Paia: “O Tusitusiga Paia uma e mai i le agaga o le Atua, ma e aogā e aʻoaʻo ai.”—2 Timoteo 3:16.

a Tagaʻi i le mataupu “Pe Moni, Afai e Iai le Alofa, e Lē Leaga le Feusuaʻi a o Leʻi Faaipoipo?”

b Mai i le mataupu “Sliding Versus Deciding: Inertia and the Premarital Cohabitation Effect,” na tusia e Scott M. Stanley, Galena Kline Rhoades, ma Howard J. Markman, ma lomia i le tusi Family Relations.

c I nisi aganuu, e masani ona fesoasoani mātua i le filifilia o paaga faaipoipo mo a latou fanau. Pe afai o le tulaga lenā, e mafai ona fesoasoani le Tusi Paia i mātua ina ia iloa uiga e ao ona uaʻi i ai.