“O faaosoosoga e oo iā te outou, e oo foʻi i tagata uma. Ae e faamaoni le Atua, ma e na te lē tuua outou i se faaosoosoga e sili atu nai lo o le mea tou te lavātia, ae pe a oo mai le faaosoosoga, e saunia e ia se auala e sao ai outou, ina ia outou tumau ai.”—1 Korinito 10:13, Faaliliuga a le Lalolagi Fou.

 “Ua lē maua outou e se faaosoosoga e ese i lo tagata; a ua faamaoni le Atua, o lē na te lē tuuina atu outou i le faaosoosoga e sili i se mea ua outou lavātia, a e sauni foʻi faatasi ma le faaosoosoga se mea e sao ai, ina ia outou lavā oono.”—1 Korinito 10:13, Tusi Paia Samoa—Lomiga 1969.

 O loo faamatilatila i lenei fuaiupu se uiga o le Atua lea e tatou te tosina atu ai iā te ia, o le faamaoni. E talitonu tagata tapuaʻi o le Atua, o le a fesoasoani mai o ia iā i latou, aemaise lava pe a fesagaʻia luʻi po o faaosoosoga.

 “O faaosoosoga e oo iā te outou, e oo foʻi i tagata uma.” E ono faaosoosoina tagata tapuaʻi o le Atua e faia se mea e lē fiafia i ai lona finagalo. E ui o nei faaosoosoga e faigatā, ae e oo uma lava i le toʻatele o tagata. a O lea, e tatau i tagata o le Atua ona mautinoa, e mafai foʻi ona latou onosaia na faaosoosoga.

 “E faamaoni le Atua.” E maufaatuatuaina Ieova b le Atua. Na ia folafola mai e na te lē tuulafoaʻia i latou e alolofa, tumau faamaoni, ma usiusitaʻi iā te ia, ma o loo ia tausia pea lenā folafolaga. (Teuteronome 7:9; Salamo 9:10; 37:28) O lea, e mafai foʻi ona mautinoa i latou o loo tapuaʻi iā te ia, o le a ia tausia isi ana folafolaga e lua o loo taʻua i lenei fuaiupu.

 “E na te lē tuua outou i se faaosoosoga e sili atu nai lo o le mea tou te lavātia.” E faaalia e le Atua lona faamaoni, e ala i lona lē faatagaina o se tofotofoga e sili atu ona faigatā nai lo o le mea e mafai ona lavātia e se tasi. E na te silafia le mea e gata ai le malosi o ana auauna taʻitoʻatasi.—Salamo 94:14.

 “Pe a oo mai le faaosoosoga, e saunia e ia se auala e sao ai outou, ina ia outou tumau ai.” E mafai ona aveesea e le Atua se tofotofoga, pe saunia le fesoasoani e manaʻomia e ana auauna ina ia tumau ai. O se faataʻitaʻiga, e na te saunia le taʻitaʻiga e ala mai i le agaga paia, o faamāfanafanaga mai i le Tusi Paia, po o fesoasoani aogā e ala mai i isi uso tapuaʻi.—Ioane 14:26; 2 Korinito 1:3, 4; Kolose 4:11.

 O lenei fuaiupu, e mai i le tusi a le aposetolo o Paulo na avatu i Kerisiano i le faapotopotoga i Korinito. I lenei vaega o lana tusi, na faaaogā ai e Paulo mea na tutupu i tagata Isaraelu anamua e fai ma faaaʻoaʻoga lapataʻi mo Kerisiano i Korinito. (1 Korinito 10:11) Na taʻua e Paulo le tele o luʻi ma faaosoosoga na fesagaʻia e tagata Isaraelu, e aofia ai le ifo i tupua ma amioga lē mamā taufeusuaʻiga. (1 Korinito 10:6-10) O nisi o i latou na lolo atu i na faaosoosoga. O la latou faaaʻoaʻoga, na faamanatu atu ai e Paulo i Kerisiano, e lē tatau ona latou soona mautinoa naʻuā pe mafaufau e lē taitai ona latou lolo atu i faaosoosoga. (1 Korinito 10:12) Peitaʻi, na ia avatu se faamautinoaga iā i latou e ala i upu o loo i le 1 Korinito 10:13. E mafai e tagata tapuaʻi faamaoni o le Atua ona manumalo mai i so o se luʻi e latou te fesagaʻia.

 Ia matamata i lenei vitiō puupuu o loo aumai ai se aotelega o le tusi o 1 Korinito.