“Ua lava le agalelei faifua ua ou faaali atu iā te oe, auā ua faaatoaina loʻu mana i le mea e vaivai ai.”—2 Korinito 12:9, Faaliliuga a le Lalolagi Fou.

 “O loʻu nei alofa tunoa, e lava lea e fesoasoani iā te oe; auā o le vaivai e faaatoaina ai loʻu mana.”—2 Korinito 12:9, Tusi Paia Samoa—Lomiga 1969.

 Na folafola mai e le Atua o le a ia foaʻi i le aposetolo o Paulo le malosi e na te manaʻomia, ina ia fesagaʻia ai luʻi ma mea e lē mafai ona ia faia.

 “Ua lava le agalelei faifua ua ou faaali atu iā te oe.” O le tali a le Atua i tatalo faatauanau a Paulo, e mafai foʻi ona faaliliuina e faapea, “e na o loʻu agalelei faifua lava e te manaʻomia.” I nisi faaupuga, e na o le agalelei faifua o le Atua e manaʻomia e Paulo ina ia fesagaʻia ai luʻi. E faapefea? O le upu ua faaliliuina i le “agalelei faifua” po o le “alofa tunoa,” e faamatala ai se meaalofa foaʻifua mai i le Atua, e lē tatau ona tatou mauaina. Ua faailoa mai i tusi a Paulo le tele o aogā na ia maua ona o le agalelei faifua o le Atua. E ui na sauāina muamua e Paulo Kerisiano, ae na foaʻi atu e le Atua le malosi na ia manaʻomia e suia ai ona uiga, ma fesoasoani i isi ina ia avea ma Kerisiano. (1 Korinito 15:9, 10; 1 Timoteo 1:12-14) Na matuā mautinoa Paulo e mafai ona ia faalagolago i le fesoasoani a le Atua, e foʻia ai so o se faafitauli po o se luʻi e tulaʻi mai.

 “Auā ua faaatoaina loʻu mana i le mea e vaivai ai.” Na faamanatu atu e le Alii o Ieova a iā Paulo, e matuā iloagofie le malosi o Lona mana, pe a faaaogā e fesoasoani ai i tagata lē lelei atoatoa ma vaivai. (2 Korinito 4:7; 12:8) Pe a iloa e Kerisiano le mea e gata mai ai lo latou malosi ma saʻili atu mo le fesoasoani a Ieova, e tusa lenā ua latou faataga le mana o le Atua e fesoasoani iā i latou. (Efeso 3:16; Filipi 4:13) O le auala lenā e faaatoaina ai le mana o le Atua i le mea e vaivai ai le tagata.

 Na avatu e Paulo se tusi faagaeeina i Kerisiano i Korinito i le pe ā o le 55 T.A. I le vaega faaiʻu o lenā tusi, na ia tali atu ai i faitioga e ala i le taʻua o le tuuina atu iā te ia o le pule e avea ai ma aposetolo. Na uunaʻia o ia e faia faapea, ona e iai nisi na faapea mai o i latou o ni faiaʻoga, ma na latou faitioina ma faamasinoina Paulo i ona foliga vaaia ma le leai o se tomai e tautala ai.—2 Korinito 10:7-10; 11:5, 6, 13; 12:11.

 I lana tali atu, na taʻua ai e Paulo e lē o lona lava malosi na mafai ai ona faataunuuina lana faiva, ma onosaia le tele o tofotofoga. (2 Korinito 6:4; 11:23-27; 12:12) I le mataupu e 12, na ia taʻua ai i se auala faafaatusa se “mea matuitui i le tino,” lea atonu e faasino atu i se faafitauli na aafia ai o ia i le itu faaletino po o le itu tau faalogona. (2 Korinito 12:7) E ui e leʻi faamatalaina e Paulo le faafitauli na ia fesagaʻia, ae na maumauaʻi o ia e tumau ona o le fesoasoani a le Atua.

 E ono fesagaʻia foʻi e Kerisiano i aso nei faigatā ma sauāga. E ono faamāfanafanaina i latou i le iloaina, e mafai ona fesoasoani le mana o le Atua iā i latou e onosaia so o se luʻi e tulaʻi mai. I le pei o Paulo, e mafai ona latou faapea mai ma le mautinoa: “Pe a ou vaivai, ona ou malosi ai lea.”—2 Korinito 12:10.

 Ia matamata i lenei vitiō puupuu o loo aumai ai se aotelega o le tusi o 2 Korinito.