“O lea, ia iā te ia o lē na te mafaia ona fai o mea e matuā sili atu i lo o mea e tatou te talosaga atu ai pe e mafaufau i ai, e tusa ai ma lona mana lea e galue iā i tatou, ia iā te ia le mamalu.”—Efeso 3:20, 21, O le Faaliliuga a le Lalolagi Fou.

 “O lenei, ia ia te ia o le na te mafaia ona faia o mea uma e faasilisili lava i mea tatou te ole atu ai ma mafaufau i ai, e tusa ma le mana o loo matuā galue i totonu ia te i tatou, ia ia te ia le viiga.”—Efeso 3:20, 21, Tusi Paia Samoa—Lomiga 1969.

 Na faailoa mai e le aposetolo o Paulo lona mautinoa e mafai e le Atua ona tali tatalo, ma faataunuu mea e mananaʻo ai ona tagata tapuaʻi i auala e latou te leʻi faatalitalia. E ono tali mai foʻi o ia i a latou tatalo i se auala e sili atu nai lo o le mea na latou mafaufauina.

 “O lea, ia iā te ia o lē na te mafaia ona fai o mea . . . e tusa ai ma lona mana lea e galue iā i tatou.” Ua faailoa mai i le fuaiupu e 21, o le faaupuga “iā te ia” e faasino atu iā Ieova le Atua. a Na tusi Paulo i lenā fuaiupu: “Ia iā te ia le mamalu e ala i le faapotopotoga, ma e ala iā Keriso Iesu.” E lē gata i lea, e mafai e le Atua ona foaʻi mai le mana po o le malosi lea e tatou te manaʻomia, ina ia faia ai lona finagalo.—Filipi 4:13.

 I le fuaiupu e 20, na faamatilatila mai ai e le aposetolo o Paulo se vala faapitoa e faatatau i le mana o Ieova e fesoasoani ai i ona tagata tapuaʻi. E tusa ai o le faaupuga “o lē na te mafaia ona fai o mea,” ua taʻua i se tasi o tusi: “E lē o tau ina faapea mai le mau e mafai e le Atua ona faia se mea. Ae e uiga atu i le iai iā te ia o le mana e faia ai lenā mea.” E lē pei Ieova o sa tatou uō faaletagata, lea e manaʻo e fesoasoani mai, ae e lē o taimi uma e mafai ai ona ia faia faapea. Nai lo o lea, e mafai e Ieova ona faia i taimi uma so o se mea e manaʻomia, ina ia tausia ai ona tagata tapuaʻi ma tali ai a latou tatalo. E na o ia e iai le mana ma le pule e lē gata mai.—Isaia 40:26.

 “[O le Atua] na te mafaia ona fai o mea e matuā sili atu i lo o mea e tatou te talosaga atu ai pe e mafaufau i ai.” E mafai e Ieova ona faia le tele o mea, po o mea e “matuā sili atu” mo ona tagata tapuaʻi. E mafai foʻi ona ia fesoasoani mai iā i latou, i se auala e sili atu nai lo o se mea na latou mafaufauina.

 E iai foʻi se isi mea e tatou te aʻoaʻoina mai i le faaupuga “e matuā sili atu i lo o mea e tatou te talosaga atu ai pe e mafaufau i ai.” O le taʻua e le aposetolo o le faaupuga “e matuā sili atu i lo o mea e tatou te talosaga atu ai pe e mafaufau i ai,” e iloa ai na manaʻo o ia i Kerisiano uma ina ia iloa, e mafai e le Atua ona fesoasoani iā i latou i auala e sili atu nai lo o se mea na latou faatalitalia. Ua faaliliuina i le Tusi Paia o le New International Version le amataga o le fuaiupu e 20 e faapea: “O lenei ia iā te ia o lē na te mafaia ona faia o mea e lē mafaatusalia e sili atu i mea e tatou te ole atu ai ma mafaufau i ai.” E iai taimi e ono manatu ai se Kerisiano ua faigatā tele ona faafitauli ma ua lē mafai ona foʻia, ma lē iloa ai po o le ā le mea e tatalo atu ai. Peitaʻi, e silafia lelei e Ieova o tatou tulaga, ma e lē gata mai lona mana e fesoasoani mai ai iā i tatou. E mafai ona ia foʻia so o se faafitauli i lana taimi talafeagai, ma e na te faia faapea i se auala atonu e tatou te leʻi mafaufauina pe manatu e mafai ona faia ai faapea. (Iopu 42:2; Ieremia 32:17) Ae a o leʻi oo i lana taimi e foʻia ai le faafitauli, e na te foaʻi mai le malosi e tumau ai ma maua ai pea le olioli!—Iakopo 1:2, 3.

 O le tusi o Efeso, na tusia e le aposetolo o Paulo ina ia avatu i Kerisiano na nonofo i le aai o Efeso i Asia Itiiti, lea ua avea nei o se vaega o le atunuu o Take. I lenā tusi, na faamauina ai e Paulo manatu na ia taʻua i sana tatalo na faia mo Kerisiano i Efeso. (Efeso 3:14-21) Na ia tatalo mo na Kerisiano, faapea isi Kerisiano uma, ina ia taumafai e faaaʻoaʻo i le auala alofa na mafaufau ma gaoioi ai Iesu, ma latou iloa ai le alofa o Keriso. Na faaiʻu le tatalo a Paulo i lona viiaina o le Atua, ma taʻua ai upu o loo i le Efeso 3:20, 21.

 Ia matamata i lenei vitiō puupuu o loo aumaia ai se aotelega o le tusi o Efeso.