“O le faatuatua, o le faatalitali lea ma le mautinoa i mea ua faamoemoe i ai, o le faamaoniga manino lea o mea moni e ui ina e lē o vaaia.”—Eperu 11:1, Faaliliuga a le Lalolagi Fou.

 “A o le faatuatua, o le faalagolago lea i mea ua faamoemoe i ai, o le mautinoa lea o mea e le o vaaia.”—Eperu 11:1, Tusi Paia Samoa—Lomiga 1969.

 O loo maua i lenei mau se faamatalaga puupuu a le Tusi Paia i le uiga o le faatuatua, ma faaalia ai e tele mea e aofia i le faatuatua nai lo o le tau ina talitonu.

 “O le faatuatua, o le faatalitali lea ma le mautinoa i mea ua faamoemoe i ai.” I uluaʻi gagana o le Eperu 11:1, o le upu Eleni ua faaliliuina i le “faatuatua” e faatatau atu lea i le mautinoa, o le maufaatuatuaina, po o le talitonuina atoatoa o se mea. O lenā faatuatua e lē faavae i ni moomooga faivavale, ae “o le faatalitali lea ma le mautinoa.” O le faaupuga Eleni ua faaliliuina i ʻle faatalitali ma le mautinoa,’ a e mafai foʻi ona faaliliuina i se “pepa e faamaonia ai,” lea e faamautinoa atu ai i se tasi o ia e ana se meatotino.

 ʻO le faatuatua, o le faamaoniga manino lea o mea moni e ui ina e lē o vaaia.’ O le faatuatua e faavae i faamaoniga maumaututū. Ona o le malolosi o na faamaoniga, e faatalitonuina ai se tagata i le moni o se mea e ui lava e lē o mafai ona vaaia lenā mea.

 Na tusi e le aposetolo o Paulo le tusi o le Tusi Paia o Eperu i Kerisiano i le uluaʻi senituri sa nonofo i Ierusalema ma ona nuu tuaoi. Sa talanoa Paulo e faatatau i le tāua o le faatuatua i le vaega lenei o lana tusi. O se faataʻitaʻiga, na tusi o ia: “A aunoa ma le faatuatua e lē mafai ona faafiafiaina [le Atua], auā o lē e faalatalata atu i le Atua, e tatau ona ia talitonu o loo soifua o ia, ma e na te tauia ē e matuā saʻili iā te ia.” (Eperu 11:6) Ina ua uma ona ia faamatala le uiga o le faatuatua i le Eperu 11:1, na taʻua ai e Paulo faaaʻoaʻoga o tane ma fafine i le Tusi Paia o ē na faaalia lenei uiga. Na taʻua e Paulo le auala na latou faaalia ai le faatuatua, e ala i le gaoioi e ōgatusa ma le finagalo o le Atua.—Eperu 11:4-38.