“Ia e āva i lou tamā ma lou tinā ina ia faaumiumi ai ou aso i le laueleele o le a foaʻi atu e Ieova lou Atua iā te oe.”—Esoto 20:12, Faaliliuga a le Lalolagi Fou.

 “Ia e ava i lou tamā ma lou tinā, ina ia faalevaleva ai ou aso i le nuu o le a foaiina mai e le ALII lou Atua ia te oe.”—Esoto 20:12, Tusi Paia Samoa-Lomiga 1969.

 Na faatonuina e le Atua tagata Isaraelu anamua ia āva i o latou mātua. Ina ua faaopoopo atu e le Atua se folafolaga i lenā faatonuga, ua ia tuuina atu ai se isi māfuaaga e tatau ai ona latou usiusitaʻi. E ui e lē o toe ola Kerisiano i lalo o le Tulafono a le Atua po o le Tulafono a Mose lea na tuuina atu i le nuu o Isaraelu, ae e leʻi suia ai tapulaa a le Atua. O mataupu silisili na faavae ai na Tulafono a le Atua, o loo aogā pea i aso nei ma e tāua i Kerisiano.—Kolose 3:20.

 E āva fanau i mātua pe a faaaloalo ma usiusitaʻi iā i latou. (Levitiko 19:3; Faataoto 1:8) E tusa pe ua faaipoipo ma fai aiga o a latou fanau, ae e faaauau pea ona alolofa ma tausia e fanau o latou mātua. O se faataʻitaʻiga, e faamautinoa e fanau e tausia lelei o latou mātua ua matutua, ma avatu i ai le fesoasoani tau tupe pe a latou manaʻomia.—Mataio 15:4-6; 1 Timoteo 5:4, 8.

 Mātau, na tatau i fanau a tagata Isaraelu ona āva i o latou tamā ma o latou tinā. O le faia faapea, e faaalia ai lo latou amanaʻiaina o le matafaioi tāua a o latou tinā i totonu o le aiga. (Faataoto 6:20; 19:26) E tatau foʻi i fanau i aso nei ona faia faapea.

 O le faatonuga ia āva i mātua e iai ona tapulaa. E lē usitaʻi fanau Isaraelu i o latou mātua po o se isi lava tagata, pe afai e solia ai tulafono a le Atua. (Teuteronome 13:6-8) E faapena foʻi Kerisiano i aso nei, e latou te “usiusitaʻi i le Atua o le pule, nai lo o tagata.”—Galuega 5:29.

 I le tulafono na tuu atu e le Atua i le nuu o Isaraelu na ia folafola atu ai, o fanau e āva i o latou mātua o le a ‘⁠faaumiumi o latou aso ma manuia’ i le laueleele na foaʻiina atu e le Atua iā i latou. (Teuteronome 5:16) O le a lē faasalaina i latou e pei ona faasalaina o fanau e tetee i tulafono a le Atua ma fouvale i o latou mātua. (Teuteronome 21:18-21) E ui ua leva na tulafono, ae e lē o suia ai mataupu silisili na faavae ai. (Efeso 6:1-3) Pe tatou te lāiti pe matutua, e tatou te tali uma i Lē na foafoaina i tatou. O le a faataunuu e le Atua lana folafolaga i fanau e usiusitaʻi iā te ia ma o latou mātua, o le a faaumiumi o latou ola. O le mea moni, ua iā i latou le faamoemoe o le ola e faavavau.—1 Timoteo 4:8; 6:18, 19.

 E tāua le tulafono o loo i le Esoto 20:12, o se vaega o Tulafono e Sefulu. (Esoto 20:1-17) O loo faamatalaina i tulafono o loo muamua atu le matafaioi a tagata Isaraelu i le Atua, e latou te tapuaʻi tau lava o ia. Ae o loo faamatalaina i tulafono o loo i tua atu le matafaioi a tagata Isaraelu i o latou uso, e aofia ai ma le tulafono ina ia faamaoni i a latou paaga faaipoipo ma aua le gaoi. O lea la, o le tulafono “ia e āva i lou tamā ma lou tinā,” e fesootaʻi lelei ai tulafono o loo i luma atu ma tua mai o lenā tulafono.