“Ona ou iloa lea o le lagi fou ma le lalolagi fou; auā ua mavae atu le uluaʻi lagi ma le uluaʻi lalolagi, ua lē toe iai foʻi se sami.”—Faaaliga 21:1, Faaliliuga a le Lalolagi Fou.

 “Ona aʻu iloa lea o le lagi fou ma le lalolagi fou; auā ua mavae atu le uluai lagi, ma le uluai lalolagi, ua leai foi se toe sami.”—Faaaliga 21:1, Tusi Paia Samoa—Lomiga 1969.

 O loo faaaogā i lenei fuaiupu se gagana faafaatusa, e faailoa mai ai o le a aveesea e le Malo o le Atua i le lagi malo uma faaletagata. O le a aveesea e lenei Malo tagata amioleaga, ae o le a pule i tagata e lotomalilie e gauaʻi i le pulega a lenei Malo.

 O loo tusia le tusi o Faaaliga i se gagana faafaatusa. (Faaaliga 1:1) O lea la, e talafeagai ona faapea atu o le lagi ma le lalolagi o loo talanoa i ai lenei fuaiupu, e lē o uiga atu i se tulaga moni ae e faafaatusa. E lē gata i lea, o loo taʻua foʻi i isi mau le “lagi fou” ma le “lalolagi fou” faafaatusa. (Isaia 65:17; 66:22; 2 Peteru 3:13) O le iloiloina o lenei mau ma isi mau, e fesoasoani iā i tatou e malamalama ai i le uiga moni.

 “Le lagi fou.” E iai taimi e faaaogā ai i le Tusi Paia le upu “lagi” e faaata mai ai se pulega po o se malo. (Isaia 14:12-14; Tanielu 4:25, 26) Ua taʻua i se tasi o lomiga e faatatau i se faaaliga faavaloaga, “o le lagi o loo faaata faafaatusa mai ai se pulega malosi po o se malo.” a I le Faaaliga 21:1, o le “lagi fou” o loo faaata mai ai le Malo o le Atua. O lenei Malo e taʻua foʻi o le “Malo o le lagi” lea e faamauina i le tusi o Faaaliga ma isi tusi o le Tusi Paia. (Mataio 4:17; Galuega 19:8; 2 Timoteo 4:18; Faaaliga 1:9; 5:10; 11:15; 12:10) O le a faaumatia e le Malo o le Atua lea ua avea ai Iesu ma Tupu “le uluaʻi lagi,” lea e faasino atu i malo na faatūina e tagata.—Tanielu 2:44; Luka 1:31-33; Faaaliga 19:11-18.

 “Le lalolagi fou.” O loo taʻua i le Tusi Paia o le a lē faaumatia pe suia le lalolagi. (Salamo 104:5; Failauga 1:4) O le ā la le lalolagi faafaatusa? E masani ona faaaogā i le Tusi Paia le upu “lalolagi” e faasino atu ai i tagata. (Kenese 11:1; 1 Nofoaiga a Tupu 16:31; Salamo 66:4; 96:1) O lea la, e talafeagai ona faapea atu o “le lalolagi fou,” e faasino atu i tagata e lotomalilie e gauaʻi i le Malo o le Atua i le lagi. O le a mavae atu “le uluaʻi lalolagi” po o tagata e tetee atu i le Malo o le Atua.

 “Ua lē toe iai foʻi se sami.” E faafaatusa foʻi “le sami” o loo taʻua i le Faaaliga 21:1. O loo faaata mai e le fesouaʻiina o le sami le toʻatele o tagata ua fulitua i le Atua. (Isaia 17:12, 13; 57:20; Faaaliga 17:1, 15) O le a faaumatia foʻi i latou. Ua taʻua i le Salamo 37:10: “Ua toeitiiti lava ona lē toe iai lea o le tagata amioleaga; e te vaai atu i le mea sa iai o ia, ae ua leai lava.”

 Ua valoia mai i le tusi o Faaaliga le mea o le a tupu a o faagasolo “le aso o le Alii.” (Faaaliga 1:10) E tusa ai ma le valoaga a le Tusi Paia, na amata lenā aso i le 1914 ina ua amata ona pule Iesu o le Tupu i le Malo o le Atua. b Peitaʻi, e leʻi oo i le taimi e na te pulea atoatoa ai le lalolagi. O loo faamatala i isi valoaga le matuā faaleagaina o le tulaga o le lalolagi, a o faagasolo le vaega muamua o “le aso o le Alii.” E taʻua lenā taimi “o aso e gata ai.” (2 Timoteo 3:1-5, 13; Mataio 24:3, 7; Faaaliga 6:1-8; 12:12) Pe a faaiʻuina na aso e sili ona leaga ma tumu i mafatiaga, o le a aveesea e le Malo o le Atua le uluaʻi lagi ma le lalolagi faafaatusa, ae aumaia le filemu ma le autasi. I le “lalolagi fou,” o le a olioli tagatānuu o le Malo i se olaga na latou moomoo i ai, ma se soifua mālōlōina lelei atoatoa.—Faaaliga 21:3, 4.

 Ia matamata i lenei vitiō puupuu o loo aumai ai se aotelega o le tusi o Faaaliga.