“E na te soloiesea foʻi loimata uma i o latou mata, e lē toe iai se oti, po o se faanoanoa, po o se tagiauē, e lē toe iai foʻi se tigā. Auā ua mavae atu mea muamua.”—Faaaliga 21:4, Faaliliuga a le Lalolagi Fou.

 “E sōloiesea foi e le Atua loimata uma i o latou mata; e leai foi se toe oti, po o se faanoanoa, po o se aue, e leai foi se toe puapuaga; auā ua mavae atu mea muamua.”—Faaaliga 21:4, Tusi Paia Samoa—Lomiga 1969.

 Ua folafola e le Atua o le a ia tafiesea tigā ma mafatiaga o tagata i aso nei, ma le pogai o na faafitauli uma.

 “E na te soloiesea foʻi loimata uma i o latou mata.” Ua faamatilatila i nei upu le folafolaga a Ieova a na faamauina e le perofeta o Isaia ʻo le a Ia soloiesea loimata mai i mata uma.’ (Isaia 25:8; Faaaliga 7:17) Ua atagia mai i nei upu le alofa faapelepele o Ieova i ē e fetagisi ona o le maliu o sē e pele iā i latou, po o se isi foʻi mafatiaga.

 “E lē toe iai se oti.” Ua folafola e le Atua o le a ia tafiesea le oti ma faalogona faavauvau ona o le oti. E lē gata i lea, o le a toe faatutūina foʻi ē ua maliliu. (1 Korinito 15:21, 22) O lea, o le a “faaumatia” le oti.—1 Korinito 15:26.

 “Po o se faanoanoa, po o se tagiauē, e lē toe iai foʻi se tigā.” E lē uiga atu le folafolaga a le Atua o le a lē toe lagona lava e tagata se tigā e pei o le tigā o o tatou tino, pe a fetaiaʻi ma se tulaga e lamatia pe faamanuʻalia ai i tatou. Peitaʻi, o loo uiga atu i le lē toe tigā o o tatou mafaufau, faalogona, ma tino, ona o le agasala b ma le tulaga lē lelei atoatoa.—Roma 8:21, 22.

 “Auā ua mavae atu mea muamua.” O nei upu faaiʻu e taaofaʻi ai suiga tetele o le a tofo i ai tagata. Ua taʻua i se tasi tusi: “O le olaga tuai lea na aafia uma ai tagata i le oti, faavauvau, tagi, ma tigā, o le a suia i se olaga fou.” O le a maua e tagata se olaga fiafia e faavavau i luga o le lalolagi i tulaga lelei atoatoa, e pei ona finagalo i ai le Atua i le amataga.—Kenese 1:27, 28.

 I le amataga o le mataupu e 21, o loo faamatala ai e le aposetolo o Ioane mea na ia vaaia i se faaaliga: “Ona ou iloa lea o le lagi fou ma le lalolagi fou.” (Faaaliga 21:1) O loo ia faamatalaina i se gagana faafaatusa suiga tetele o loo valoia foʻi i isi mau o le Tusi Paia. (Isaia 65:17; 66:22; 2 Peteru 3:13) O le a suia e le Malo o le Atua i le lagi po o le “lagi fou,” ia malo faaletagata uma ma pulea le “lalolagi fou” po o tagata o le a ola i luga o le lalolagi.—Isaia 65:21-23.

 E faapefea ona iloa o loo faasino atu le faaaliga i le olaga i le lalolagi? Muamua, o loo amata le folafolaga a le Atua i le faapea mai: “Ua iai i tagata le faleʻie o le Atua.” (Faaaliga 21:3) E lē o faatatau atu la lenei folafolaga i agelu i le lagi, ae o tagata i le lalolagi. Lona lua, o loo faamatalaina i le faaaliga se lalolagi “e lē toe iai se oti.” (Faaaliga 21:4) E leʻi iai lava se oti i le lagi, ae e na o tagata i le lalolagi o loo aafia ai. (Roma 5:14) E talafeagai la le faapea atu o lenei mau o loo faamatalaina ai le tulaga o le lalolagi o le a iai i le lumanaʻi.

 Ia matamata i lenei vitiō puupuu o loo aumai ai se aotelega o le tusi o Faaaliga.