“Ia tuuina atu iā Ieova mea uma e te faia, ona taulau manuia ai lea o au fuafuaga.”—Faataoto 16:3, O le Faaliliuga a le Lalolagi Fou.

 “Ia e tuuina atu i le ALII o au galuega; ona ia faatumauina ai lea o au fuafuaga.”—Faataoto 16:3, New International Version.

 Ua faamautinoa mai e lenei faataoto i ē e tapuaʻi i le Atua moni, o le a taulau manuia a latou fuafuaga pe afai e faalagolago iā te ia, e ala i le saʻili ma mulimuli i lana taʻitaʻiga.

 “Ia tuuina atu iā Ieova mea uma e te faia.” A o leʻi faia se filifiliga, e faaalia e tagata tapuaʻi o Ieova a le lotomaulalo e ala i le saʻili atu iā te ia mo se taʻitaʻiga. (Iakopo 1:5) Aiseā? O se tasi o māfuaaga, ona e tele ina lē mafai e tagata ona pulea mea e tutupu i o latou olaga. (Failauga 9:11; Iakopo 4:13-15) E lē gata i lea, e lē iai i tagata le atamai e faia ai mea latou te mananaʻo ai. O māfuaaga nei ua filifili ai ma le atamai nisi e tuuina atu i le Atua a latou fuafuaga, e ala i le tatalo atu iā te ia mo lana taʻitaʻiga, ma gaoioi e ōgatusa ma lona finagalo o loo faailoa mai i lana Afioga le Tusi Paia.—Faataoto 3:5, 6; 2 Timoteo 3:16, 17.

 O le faaupuga “ia e tuuina atu i le ALII b au galuega,” e mafai ona faaliliuina saʻo e faapea “ia faataavalevale atu au galuega i le ALII.” Ua faamatalaina i se tasi o tusitusiga, o lenei faaupuga e faaata mai ai se “tagata o loo lafo atu sana avega sa amoina, ina ia amo e se isi tagata e sili atu ona malosi.” Pe afai e faalagolago ma le lotomaulalo se tasi i le Atua, e mautinoa o le a fesoasoani le Atua e faatumauina o ia.—Salamo 37:5; 55:22.

 O le faaupuga “mea uma e te faia,” e lē faapea ai o le a talia pe faamanuia e le Atua so o se fuafuaga a se tasi. Ina ia maua faamanuiaga a Ieova, e tatau ona ōgatusa a tatou fuafuaga ma tapulaa faapea le finagalo o Ieova. (Salamo 127:1; 1 Ioane 5:14) E lē faamanuia le Atua i ē e lē usiusitaʻi, ma “e na te faalēaogāina fuafuaga a lē e amioleaga.” (Salamo 146:9) Ae i le isi itu, e fesoasoani mai o ia i ē e gauaʻi atu iā te ia e ala i le amanaʻia o ana tapulaa o loo taʻua i le Tusi Paia.—Salamo 37:23.

 “Ona taulau manuia ai lea o au fuafuaga.” I nisi faaliliuga o le Tusi Paia, o loo faaliliuina ai lenei faaupuga e faapea, “o le a faatumauina au fuafuaga.” I Tusitusiga Paia Eperu lea e masani ona taʻua o le Feagaiga Tuai, o le upu ua faaliliuina i le faa-Peretania i le “faatumauina,” e maua ai le manatu o le faataatiaina o le faavae o se fale, ma e masani ona faasino atu i le tumau o foafoaga a le Atua. (Faataoto 3:19; Ieremia 10:12) O le a faatumauina foʻi e le Atua fuafuaga a i latou e faia le mea tonu i lana silafaga, ma fesoasoani iā i latou ia maua ni olaga malupuipuia, taulau manuia ma fiafia.—Salamo 20:4; Faataoto 12:3.

 Na tusia lenei faataoto e le tupu o Solomona, o lē na tusia le tele o tusi o le Faataoto. Na mafai ona ia tuufaatasia pe tautala i le faitau afe o faataoto, ona o le atamai na ia maua mai i le Atua.—1 Tupu 4:29, 32; 10:23, 24.

 O loo amata le mataupu e 16 i le viiviia e Solomona o le atamai o le Atua, ma taʻua ai le matuā inosia e Ieova o ē faamaualuluga. (Faataoto 16:1-5) O loo taʻua atili foʻi i lenei mataupu se upu moni tāua, lea e tele ina taʻua i le tusi o Faataoto e faapea: E faatoʻā mafai ona taulau manuia moni ma maua e se tasi le atamai, pe afai e lotomaulalo ma faalagolago i le Atua e taʻitaʻia ona ala. (Faataoto 16:3, 6-8, 18-23) E masani ona taʻua lenei upu moni faavae i le Tusi Paia.—Salamo 1:1-3; Isaia 26:3; Ieremia 17:7, 8; 1 Ioane 3:22.

 Ia matamata i lenei vitiō puupuu o loo aumaia ai se aotelega o le tusi o Faataoto.