O uō moni e faatuatuaina ma faamoemoeina. E pei o se fanauga e māfana a latou faiā, o uō moni e faamaoni ma lotoalofa aemaise pe a tulaʻi mai faafitauli.

 “O le uō moni e alofa i taimi uma.” E mafai ona faaliliuina lenei fuaiupu e faapea “e faaalia pea e uō lo latou alofa.” O le upu Eperu o loo faaaogā i lenei fuaiupu mo le “alofa,” e sili atu nai lo o se lagona po o ni faalogona mo se isi tagata. E faasino atu i le alofa lē manatu faapito lea e faaalia e ala i gaoioiga. (1 Korinito 13:4-7) O uō e iai lenā alofa e pipii le tasi i le isi pe a tulaʻi mai ni tulaga e tofotofoina ai le la faauōga, atonu o ni mea e lē femalamalamaaʻi ai po o luʻi o le olaga. E fefaamagaloaʻi foʻi ma le lotoatoa. (Faataoto 10:12) E lē matauʻa se uō pe a tutupu ni mea lelei i le olaga o lana uō, ae e olioli faatasi ma ia.—Roma 12:15.

 “O le uō moni . . . o se uso ua fanau mo taimi o puapuaga.” O loo faavae lenei faataoto i le faiā a se fanauga, lea e mafai ona matuā māfana. O lea, pe a tatou faia le mea sili e fesoasoani ai i se uō o loo mafatia, e tusa lenā ua tatou gaoioi e pei o se uso po o se tuafafine moni. E lē mafai foʻi e tofotofoga ona faavaivaia le fusi o le alofa i le vā o ni uō moni. Nai lo o lea, e faamalosia lenā fusi a o faatuputeleina le alofa ma le faaaloalo o le tasi i le isi.

 O loo iai i le tusi o Faataoto le tele o manatu ma fautuaga atamai e pupuu ma faaoso naunau. Na tusia e le tupu o Solomona le tele o vaega o lenei tusi o le Tusi Paia. Na ia tusia o ni solo i le gagana faafatusolo Eperu, lea e masani ona faatulaga i se auala e faatutusa pe faaeseese ai manatu, e lē pei o solo ia e tutusa faaleoga o upu i faaiʻuga o laina. O se faaaʻoaʻoga o se solo e tai uiga tutusa, o le Faataoto 17:17 lea e lagolagoina e le vaega lona lua o le fuaiupu le vaega muamua. Ae o se faaaʻoaʻoga o se solo e faaeseese ai manatu o le Faataoto 18:24, lea e faapea mai: “E iai aumea e toe lavea le tasi i le isi, ae e iai le uō e sili ona alofa faamaoni nai lo o le uso.”

 A o tusia e Solomona le Faataoto 17:17, atonu na ia mafaufau i le faauōga māfana a lona tamā o Tavita ma Ionatana le atalii o le tupu o Saulo. (1 Samuelu 13:16; 18:1; 19:1-3; 20:30-34, 41, 42; 23:16-18) E ui e lē aiga Tavita ma Ionatana, ae na sili atu ona māfana le la faiā nai lo o se ʻauso. Na lotomalie foʻi Ionatana e lamatia lona ola mo lana uō talavou o Tavita. a

 “O le uō e alofa i taimi uma, ma o ia o se uso i taimi o faafitauli.”—The Bible in Basic English.

 “O le uō e faaauau ona avea ma uō, ma o ia o se uso ua fanau mo puapuaga.”—The Moffatt Translation of the Bible.

 “O le uō e tumau lana faauōga i taimi uma, ma o puapuaga ua māfua ai ona fanau mai lenā uso.”—The Complete Jewish Study Bible.

 Ia matamata i lenei vitiō puupuu o loo aumaia ai se aotelega o le tusi o Faataoto.