“Ia aʻoaʻo le tama i le ala e tatau ona ui ai o ia; a oo ina toeaina lava e lē liliuese ai o ia.”—Faataoto 22:6, Faaliliuga a le Lalolagi Fou.

 “Aʻoaʻo ia i le tama i le ala e tatau ona ui ai o ia; e tusa lava pe e matua e lē teʻa ese ai.”—Faataoto 22:6, English Standard Version.

 O mātua o loo aʻoaʻoina a latou fanau e alolofa i le Atua ma usitaʻia ana tulafono, e latou te faatalitalia o le a iai ni aogā tumau o na aʻoaʻoga i a latou fanau.

 “Ia aʻoaʻo le tama i le ala e tatau ona ui ai o ia.” O nei upu e mafai foʻi ona faaliliuina e faapea “ia amata le tamaitiiti i le ala saʻo.” E tele taimi o loo faalaeiauina ai e le tusi o Faataoto mātua, ina ia aʻoaʻo a latou fanau ia iloa le ala saʻo mai i le ala sesē, mai lava a o lāiti. (Faataoto 19:18; 22:15; 29:15) Peitaʻi, o mātua alolofa, e latou te iloa e iai foʻi i a latou fanau le saʻolotoga e filifili ai, e pei o tagata matutua. O lea, nai lo o le tau ina taʻu atu i a latou fanau o le mea e fai, e latou te faamalamalama atu le māfuaaga e faia ai se mea, ma fesoasoani i ai ina ia faatagata matua, ma avea o ni tagata maufaatuatuaina e mafai ona faia ni filifiliga lelei.—Teuteronome 6:6, 7; Kolose 3:21.

 Ua faapea mai nisi o faitofā o le Tusi Paia, e uiga atu lenei faaupuga i le “aʻoaʻo o se tamaitiiti e fua i lona tulaga,” pe ia aʻoaʻo le tamaitiiti e fua i ona uiga masani. O lenā manatu e foliga mai e saʻo. Ae o le faaupuga Eperu lea ua faaliliuina “i le ala e tatau ona ui ai o ia,” atonu e faasino atu i le ola i se olaga lelei ma amiotonu. O loo faamatilatila mai i le tusi o Faataoto ni auala se lua, e ono mafai ona uia e se tasi. O le auala muamua e taʻua o le “ala o tagata lelei,” “le ala o le atamai” po o le “ala sao.” (Faataoto 2:20; 4:11; 23:19) O le isi ala e taʻua o le “ala o tagata e faia mea leaga,” ala o le “tagata valea” po o le “ala sesē.” (Faataoto 4:14; 12:15; 16:29) O le ala la e “tatau ona ui ai” le tamaitiiti, e faasino atu i le “ala saʻo” po o le ala lea e aʻoaʻoina mai i le Afioga a le Atua, le Tusi Paia.—Salamo 119:105.

 “A oo ina toeaina lava e lē liliuese ai o ia.” Pe a aʻoaʻo e mātua a latou fanau i tapulaa tauamio a le Atua, e telē la le avanoa e mafai ai ona latou uia le ala saʻo i o latou olaga. Peitaʻi, e lē o le uiga o lenei manatu e faapea, pe a lelei ona aʻoaʻoina se tamaitiiti, o le a lē taitai ona “liliuese” mai i le ala saʻo po o tulafono a le Atua. O se faataʻitaʻiga, pe a faifaimea se tasi ma tagata e faia mea leaga, e ono iʻu la ina ia tuua “ala saʻo” ae faia mea sesē. (Faataoto 2:12-16; 1 Korinito 15:33) E tusa po o le tulaga lenā, ae pe a aʻoaʻo e mātua a latou fanau i tapulaa a le Atua, ua latou tuuina la iā i latou le avanoa sili e taulau manuia ai i le olaga.—Faataoto 2:1, 11.

 O loo faia aʻe le Faataoto 22 i fuaitau pupuu, lea e fesoasoani iā i tatou e iloa ai le auala e faatatau ai le atamai mai i le Atua, i vala eseese o le olaga. O nei fasi fuaitau e faamatilatila mai ai le tāua o le iai o se faiā lelei ma Ieova, a o se mea e mafai ona atiaʻe e se tasi pe a lotomaulalo, limafoaʻi, ma galue malosi. (Faataoto 22:1, 4, 9, 29) Ae i isi fuaiupu, o loo faaalia ai iʻuga leaga e oo iā i latou e lē amanaʻia tapulaa a le Atua ma sauāina tagata matitiva.—Faataoto 22:8, 16, 22-27.

 E ui e lē o fuaiupu uma o le Faataoto mataupu 22 e faasino atu i le aʻoaʻoina o fanau, ae o loo faamatalaina ai le ituaiga o olaga lea e maua ai le fiafia moni ma le finagalo malie o le Atua. (Faataoto 22:17-19) O le aʻoaʻoina o fanau e ōgatusa ma lenā ituaiga o olaga, e faaalia ai e mananaʻo mātua e maua e a latou fanau se olaga e sili ona lelei.—Efeso 6:1-3.

 Ia matamata i lenei vitiō puupuu o loo aumai ai se aotelega o le tusi o Faataoto.