“Ua ia faia mea uma ina ia matagofie i lona lava taimi. Ua ia tuu foʻi le faavavau i o latou loto; ae e lē iloa atoatoa e tagata galuega na faia e le Atua moni mai i le amataga e oo i le iʻuga.”—Failauga 3:11, Faaliliuga a le Lalolagi Fou.

 “Ua faia e ia mea uma lava e matagofie i o latou lava taimi. Ua tuuina foʻi e ia le faavavau i loto o tagata; ae e lē iloa e le tagata le galuega ua faia e le Atua mai i le amataga e oo i le gataaga.”—Failauga 3:11, New International Version.

 “Ua ia faia mea uma ina ia matagofie i lona lava taimi.” O le upu Eperu o loo faaliliuina i le “matagofie,” e tele atu mea e uiga i ai nai lo o le aulelei po o le manaia i le vaai. E mafai foʻi ona faaliliuina i le “maopoopo” po o le “talafeagai.” (Failauga 3:11, fpl.) O galuega matagofie a le Atua, e aofia ai mea uma na ia foafoaina ma mea uma o loo ia faia ina ia faataunuu ai lona finagalo.—Tanielu 2:21; 2 Peteru 3:8; Faaaliga 4:11.

 “Ua ia tuu foʻi le faavavau i o latou loto.” Na foafoaina e le Atua tagata ina ia ola e faavavau. (Salamo 37:29) O lona uiga, na tuu foʻi e le Atua lenā faanaunauga i le tagata. Peitaʻi, e leʻi usiusitaʻi le uluaʻi ulugalii o Atamu ma Eva i le Atua, ma iʻu ai ina la feoti ma tuufaasolo mai i a la fanau. (Kenese 3:17-19; Roma 5:12) Ae ua folafola mai e le Atua o le a ia “faamalie le manaʻo o meafaiola uma lava,” e aofia ai ma le faanaunauga o le tagata ina ia ola e faavavau. (Salamo 145:16) Ua faamatala mai i le Tusi Paia le auala ua saunia e Ieova ina ia toe maua ai e tagata le faamoemoe o le ola e faavavau.—Roma 6:23.

 “E lē iloa atoatoa e tagata galuega na faia e le Atua moni mai i le amataga e oo i le iʻuga.” E loloto ma e lē gata mai le atamai o le Atua, ma o loo taʻua i le Tusi Paia “e lē mafai ona malamalama atoatoa” i ai. (Roma 11:33) Peitaʻi, e finagalo malie le Atua e faailoa mai lona finagalo i ē e mananaʻo e faafiafia o ia.—Amosa 3:7.

 Na tusia le tusi o Failauga e le tupu o Solomona mai i Isaraelu anamua, o se tane ua lauiloa i lona atamai mai i le Atua. O loo iai fautuaga aogā i mea e tāua moni i le olaga, ma mea e lē aogā. (Failauga 1:2, 3; 2:1, 17; 7:1; 12:1, 13) I le mataupu e 3, o loo faamatala ai e Solomona nisi o mea e masani ona tutupu i le olaga. O loo taʻua ai le tele o gaoioiga ma galuega. (Failauga 3:1-8, 10) Ua tuu e le Atua i tagata le saʻolotoga e filifili ai po o lē fea o na mea e mananaʻo e fai, ma le taimi e fai ai. (Teuteronome 30:19, 20; Iosua 24:15) Na faamatala mai e Solomona, e na o le pau le auala e maua ai e le tagata le fiafia moni i ana galuega, o le galulue e ōgatusa ma le finagalo o le Atua, ma amanaʻia lana “taimi atofaina.” Na taʻua e Solomona lenā mea, o le ʻmeaalofa mai i le Atua.’—Failauga 3:1, 12, 13.

 Ia matamata i lenei vitiō puupuu o loo aumaia ai se aotelega o le tusi o Mataio.