“Aua neʻi popole i se mea, ae ia faailoa atu o outou manaʻoga i mea uma lava i le Atua, i le tatalo ma le faatoga, atoa ma le faafetai; ona leoleoina ai lea o o outou loto ma mafaufau i le filemu mai i le Atua, e silisili i mea uma lava e manatu i ai, e ala iā Keriso Iesu.”—Filipi 4:6, 7, Faaliliuga a le Lalolagi Fou.

 “Aua neʻi popole outou i se mea e tasi, a ia faailoa atu o outou manao i mea uma lava i le Atua, i le tatalo, ma le faatoga, atoa ma le faafetai. O le manuia foi mai le Atua, o loo silisili lava i mea uma e manatu i ai, e leoleoina ai o outou loto atoa ma o outou mafaufau ia Keriso Iesu.”—Filipi 4:6, 7, Tusi Paia Samoa—Lomiga 1969.

 E mafai e tagata tapuaʻi o le Atua ona tuuitiitia le soona popole e ala i le tatalo atu iā te ia. Ua ia folafola mai o le a ia foaʻi mai le filemu o le loto, lea e fesoasoani e feagai ai ma o latou popolega, ma faapea ona puipuia ai o latou mafaufau ma faalogona. O loo taʻua i le fuaiupu e 6 ituaiga eseese o tatalo lea e fesoasoani iā i latou e maua ai lenā filemu.

 O faatoga o tatalo faatauanau. E mafai e se tagata ona faatoga atu i le Atua i taimi o mafatiaga po o lamatiaga, e pei ona sa faia e Iesu. (Eperu 5:7) O nei tatalo e lē faatasi ona fai ae e faifai pea.

 O isi tatalo e faailoa atu ai o tatou manaʻoga patino i le Atua. E mafai e tagata tapuaʻi o le Atua ona faailoa atu o latou manaʻoga “i mea uma lava” po o so o se tulaga. Peitaʻi, e tatau ona ōgatusa na tatalo ma le finagalo o le Atua o loo faailoa mai i le Tusi Paia.—1 Ioane 5:14.

 O tatalo o le faafetai i le Atua e faailoa atu ai lo tatou lototalisapaia o mea na ia faia ma mea o le a ia faia mo i tatou. Pe a tatou taulaʻi i māfuaaga e tatou te faafetai ai i le Atua, e fesoasoani iā i tatou e faaalia ai pea le fiafia.—1 Tesalonia 5:16-18.

 E tali mai le Atua i tatalo e ala i le foaʻi mai o le filemu i ona tagata tapuaʻi. O “le filemu mai i le Atua” e faamatala ai le toʻafilemu o le loto ona o le iai o se faiā lelei ma ia. (Roma 15:13; Filipi 4:9) O lenei filemu “e silisili i mea uma lava e manatu i ai,” auā e mai i le Atua ma e mafai ona fesoasoani iā i tatou e sili atu i lo o mea na tatou faatalitalia.

 O loo fai mai le mau o le Tusi Paia o le filemu mai i le Atua e mafai ona leoleoina ai o tatou loto. O le upu Eleni ua faaliliuina “leoleoina,” e fesootaʻi atu i se faaupuga faavaegāʻau e faamatala ai gaoioiga e faia e fitafita ina ia leoleoina ai se aai malupuipuia. E faapena foʻi ona leoleoina e le filemu mai i le Atua faalogona ma le mafaufau o se tagata. E fesoasoani iā te ia ina ia lē lofitūina ai i faalogona popole ona o ni faafitauli ogaoga.

 O le filemu mai i le Atua e puipuia ai i tatou “e ala iā Keriso Iesu,” auā ua mafai ona maua se tatou faiā lelei ma le Atua e ala iā Iesu. Na foaʻi mai e Iesu lona ola e fai ma taulaga togiola mo a tatou agasala. Pe a tatou faatuatua iā te ia, e tatou te maua faamanuiaga a le Atua. (Eperu 11:6) O Iesu foʻi o le ala e tatou te faalatalata atu ai i le Atua. Na fetalai Iesu: “E leai se tasi e alu atu i le Tamā pe a lē ui mai iā te aʻu.”—Ioane 14:6; 16:23.

 Na tusia e le aposetolo o Paulo le tusi o le Tusi Paia o Filipi mo Kerisiano sa nonofo i le aai o Filipi. a I le mataupu e 4 o le Filipi, na faalaeiau ai e Paulo le faapotopotoga ina ia olioli, ma na ia faafetaia i latou i lo latou limafoaʻi lea na faafiafiaina ai o ia. (Filipi 4:4, 10, 18) Na taʻua e Paulo le auala e maua ai le filemu o le Atua e ala i le tatalo, ma na ia taʻua foʻi mafaufauga lelei ma gaoioiga lelei e latou te faia, ina ia maua ai le fesoasoani mai i “le Atua o le filemu.”—Filipi 4:8, 9.