“O le mea lea le ʻauuso e, o mea uma ua moni, o mea uma ua matuā tāua, o mea uma ua tonu, o mea uma ua mamā, o mea uma e faatupu ai le alofa, o mea uma ua taʻuleleia, o amioga lelei uma lava ma mea e viia ai se tasi, ia faaauau ona manatunatu i nei mea.”—Filipi 4:8, Faaliliuga a le Lalolagi Fou.

 “Le au uso e, o le toe upu lenei; o mea uma ua moni, o mea uma ua taʻuleleia, o mea uma ua tonu, o mea uma ua mamā, o mea uma ua matagofie, ma mea uma ua logoleleia, afai foi o se isi amio lelei, po o se tasi mea e viia, ia outou manatunatu i ia lava mea.”—Filipi 4:8, Tusi Paia Samoa—Lomiga 1969.

 E naunau le Atua i mea e tatou te mafaufau i ai, ona e iai le aafiaga o mea e tatou te mafaufau i ai i a tatou gaoioiga. (Salamo 19:14; Mareko 7:20-23) O lea, o i latou e mananaʻo e faafiafia le Atua, e latou te teena le mafaufau i mea e leaga i lana silafaga, ae mafaufau i mea e fiafia i ai lona finagalo.

 I lenei mau, o loo taʻua ai ni mea lelei se valu lea e tatau ona “faaauau ona manatunatu” i ai Kerisiano, pe e avea o se masaniga e mafaufau pea i ai.

•   “Moni.” O lenei upu ua faamatalaina ai mea e tonu ma maufaatuatuaina, e pei o faamatalaga o loo i le Afioga a le Atua, le Tusi Paia.—1 Timoteo 6:20.

•   “Ua matuā tāua.” O lenei faaupuga e faasino atu i mataupu e sili ona tāua ma e lē o ni mea faatauvaa. E fesoasoani i le faamalosia o le maumauaʻi o se Kerisiano e faia le mea saʻo.—Tito 2:6-8.

•   “Tonu.” O lenei upu e faasino atu i fuafuaga ma gaoioiga e ōgatusa ma tapulaa a le Atua i le mea saʻo, nai lo o tapulaa a tagata.—Faataoto 3:5, 6; 14:12.

•   “Mamā.” O lenei upu e aofia ai manatunatuga ma uunaʻiga o le loto e mamā ma paia, e lē gata i amioga taufeusuaʻiga ae i mea uma lava.—2 Korinito 11:3.

•   “E faatupu ai le alofa.” O lenei faaupuga e faasino atu i mea lelei lea e faatupu ai le alofa nai lo o le feitagaʻi, tigā o le loto, po o feeseeseaʻiga.—1 Peteru 4:8.

•   “Ua taʻuleleia.” O lenei faaupuga e faasino atu i isi mea e atili ai ona lelei le talaaga o se tasi, ma fiafia i ai tagata e matataʻu i le Atua.—Faataoto 22:1.

•   “Amioga lelei.” O lenei faaupuga e faasino atu i amioga e sili ona mamā e tusa ma tapulaa a le Atua. O na amioga e matuā lelei lava.—2 Peteru 1:5, 9.

•   “E viia ai.” O lenei faaupuga e faasino atu i se mea e ao ona faamālō i ai, aemaise lava i mea e talafeagai i le silafaga a le Atua. E aofia ai foʻi galuega e viia ai le Atua, lea e tāua ona manatunatu i ai tagata.—Salamo 78:4.

 Na tusi e le aposetolo o Paulo lana tusi i Kerisiano i Filipi a o saisaitia o ia i se fale i Roma. Peitaʻi, na faamatalaina e le ʻaufaitofā o le Tusi Paia lana tusi “o se tusi o le olioli,” ona na ia tusia ma le fiafia ma e tele faaupuga māfana ma alofa na faaaogā ai.—Filipi 1:3, 4, 7, 8, 18; 3:1; 4:1, 4, 10.

 Na alofa Paulo i ona uso ma tuafāfine faaleagaga i Filipi, ma na ia manaʻo ia latou maua le olioli ma le filemu na ia mauaina. (Filipi 2:17, 18) O lea, i le vaega faaiʻu o lana tusi, na ia faalaeiauina i latou ina ia atiaʻe le olioli, ia magafagafa, ia faalagolago pea i le Atua i le tatalo, ma ia taulaʻi o latou mafaufau i mea e maua ai le filemu o le mafaufau ma le loto faapea le filemu ma le Atua.—Filipi 4:4-9.

 Ia matamata i lenei vitiō puupuu o loo aumaia ai se aotelega o le tusi o Filipi.