“Ia e valaau mai iā te aʻu, ona ou tali atu ai lea iā te oe, ma ou nofosauni e taʻu atu iā te oe mea tetele ma mea faigatā e te leʻi iloaina.”—Ieremia 33:3, Faaliliuga a le Lalolagi Fou.

 “Ia e valaau mai iā te aʻu, ona ou tali atu ai lea iā te oe, ma ou faaali atu iā te oe o mea tetele ma le faigatā, o mea ua e lē iloa.”—Ieremia 33:3, Tusi Paia Samoa—Lomiga 1969.

 O nei upu, ua valaaulia ai e le Atua tagata ina ia valaau atu iā te ia e ala i le tatalo. Pe a talia e i latou e faalogo i na upu le valaaulia a le Atua ma tatalo atu iā te ia, o le a ia faailoa mai iā i latou mea o le a tutupu i le lumanaʻi.

 “Ia e valaau mai iā te aʻu, ona ou tali atu ai lea iā te oe.” O le faaupuga “valaau mai iā te aʻu,” e lē uiga atu i le tau ina valaau leotele pe taʻua leotele le suafa o le Atua. Nai lo o lea, o le valaau i le Atua i lenei mau, e aofia ai le saʻili atu mo lana fesoasoani ma lana taʻitaʻiga e ala i le tatalo.—Salamo 4:1; Ieremia 29:12.

 O lenei valaaulia na avatu patino i le nuu o Isaraelu anamua. E leʻi faamaoni lenei nuu i le Atua, ma na osofaʻia ai i latou e le ʻautau a Papelonia. (Ieremia 32:1, 2) Na valaaulia e Ieova a tagata Isaraelu e toe foʻi mai iā te ia, e ala i le valaau atu iā te ia i le tatalo.

 ʻOu te taʻu atu iā te oe mea tetele ma mea faigatā e te leʻi iloaina.’ O mea ua folafola mai e le Atua o le a ia faailoa mai, e “faigatā,” ona e lē mafai ona malamalama ai tagata i so latou lava atamai. O le faaupuga “mea faigatā,” e mafai foʻi ona uiga atu i “mea ua natia.”

 O ā “mea ua natia” na faailoa atu e le Atua? O mea na tutupu mulimuli ane e pei o le faaumatiaga ma le faatafunaina o le aai anamua o Ierusalema, ma lona toe fausiaina. (Ieremia 30:1-3; 33:4, 7, 8) Peitaʻi, na folafola mai foʻi e le Atua, o le a lē tafiesea atoatoa ona tagata tapuaʻi.—Ieremia 32:36-38.

 Na maua e le perofeta o Ieremia lenei feʻau mai iā Ieova i le 608 T.L.M., i le tausaga lona sefulu o le pulega a le tupu o Setekaia. Na valoia e Ieremia o le a faatoʻilaloina Ierusalema, ma o le a ave faapagota Setekaia. Talu ai e leʻi fiafia le tupu i lenā feʻau, na ia poloaʻi atu ai e taofia Ieremia.—Ieremia 32:1-5; 33:1; 37:21.

 O nei mea na tutupu, na aumaia ai e le Atua le valaaulia o loo i le Ieremia 33:3. Peitaʻi, na maumauaʻi le tupu o Setekaia ma le toʻatele o le nuu o Isaraelu e teena lenā valaaulia. (Ieremia 7:26; 25:4) E latou te leʻi valaau atu i le Atua ina ia saʻili mo lana taʻitaʻiga. I le tausaga na sosoo ai, na faatoʻilaloina ai Setekaia, faaumatia Ierusalema, ma o le toʻatele na faasaoina, na puʻea ma ave faapagota i Papelonia.—Ieremia 39:1-7.

 O upu o loo i le Ieremia 33:3 ua faamanatu mai ai iā i tatou i aso nei, e mafai e le Atua ona faailoa mai “mea loloto” ma le “poto saʻo i lona finagalo,” iā i latou e suʻesuʻe i lana Afioga le Tusi Paia faatasi ma le tatalo. (Kolose 1:9; 1 Korinito 2:10) O nei mea loloto e aofia ai mea ua folafola mai e le Atua o le a ia faia i le lumanaʻi lata mai.—Faaaliga 21:3, 4.

 Ia matamata i lenei vitiō puupuu o loo aumaia ai se aotelega o le tusi o Ieremia.