“Ou te tuuina atu le filemu iā te outou, ma ou te avatu iā te outou loʻu filemu. Ou te lē avatua iā te outou e pei ona avatu e le lalolagi. Aua neʻi atuatuvale o outou loto pe faavaivai ona o le matataʻu.”—Ioane 14:27, Faaliliuga a le Lalolagi Fou.

 O nei upu faamāfanafanaloto na faamautinoa atu ai e Iesu i ona aposetolo, e lē tatau ona latou soona popole pe a feagai ma tulaga faigatā. E mafai foʻi ona latou maua pea le toʻafilemu, e ala i le fesoasoani a le Atua.

 O le ā le ituaiga o filemu na tuuina atu e Iesu i ona aposetolo? Na ia tuuina atu i ai lona filemu, o le filemu lava lea e tasi o loo ia lagonaina. E lē faapea ai la ua leai ni feeseeseaʻiga po o ni puapuaga. (Ioane 15:20; 16:33) E ui lava na feagai Iesu ma faiga lē tonu lea na iʻu ai i le fasiotia o ia, ae na ia lagona pea le filemu o le mafaufau ma le loto. (Luka 23:27, 28, 32-34; 1 Peteru 2:23) Na ia lagona le toʻafilemu talu ai na ia silafia e alofa ma e finagalo malie lona Tamā o Ieova a iā te ia.—Mataio 3:16, 17.

 Na tuuina atu e Iesu i ona aposetolo le filemu, e ala i le faamautinoa atu i ai e la te fiafia ma alolofa ma lona Tamā iā i latou. (Ioane 14:23; 15:9, 10; Roma 5:1) E faavae lenā filemu i lo latou faatuatua iā Iesu le Alo o le Atua, ma e fesoasoani e faatoʻafilemu ai o latou faalogona popole ma fefe. (Ioane 14:1) E ui lava e latou te lē o toe faatasi ma Iesu, ae na ia folafola atu o le a fesoasoani le agaga paia o le Atua iā i latou e maua le mautinoa ma le filemu o le loto ma le mafaufau. (Ioane 14:25-27) E mafai e soo o Iesu ona fesagaʻia ma le lototele tulaga faigatā, ona o loo latou mauaina le finagalo malie o Ieova ma lana lagolagosua.—Eperu 13:6.

 A o iai Iesu i le lalolagi, na fai ma masani a tagata le faafeiloaʻi o isi e ala i le faapea atu ia latou maua le filemu. (Mataio 10:12, 13) Ae e leʻi faapena Iesu. E lē gata sa ia faapea atu i ona aposetolo ia latou maua le filemu, ae na ia tuuina atu foʻi i ai le filemu. E lē tutusa foʻi lenā filemu ma le filemu e ono ofoina mai e le lalolagi, b e ala i faiā faaletagata, tamaoaiga, po o le tulaga taʻutaʻua. Peitaʻi o le filemu ua tuuina mai e Iesu, e lē faalagolago i mea e tutupu i le olaga, ae o se faalogona e tumau pea ona iai.

 Na fai atu e Iesu na upu i ona aposetolo faamaoni i le pō a o lumanaʻi lona maliu. I lenā pō, na ia faapea atu ai ua toeitiiti ona ia tuua lea o i latou. (Ioane 13:33, 36) O lenā faamatalaga na matuā faanoanoa ai ona aposetolo. (Ioane 16:6) O lea, na faamatala atu e Iesu iā i latou le māfuaaga e lē tatau ai ona latou soona popole pe a ia tuua i latou.

 E faalaeiauina foʻi Kerisiano i aso nei i fetalaiga a Iesu. E mafai foʻi ona tatou maua le filemu. (2 Tesalonia 3:16) Pe a avea i tatou ma soo o Iesu, e tatou te aʻoaʻoina ai e alolofa ma e finagalo malie Iesu ma lona Tamā o Ieova iā i tatou. (Kolose 3:15; 1 Ioane 4:16) O le iʻuga, e tatou te lē soona popole ai. Aiseā? Talu ai o loo ʻau le Atua ma i tatou.—Salamo 118:6; Filipi 4:6, 7; 2 Peteru 1:2.

 Ia matamata i lenei vitiō puupuu o loo aumaia ai se aotelega o le tusi o Ioane.