“Po ou te leʻi poloaʻi atu ea iā te oe? Ia lototele ma faamalosi. Aua le fefe pe mataʻu, auā e faatasi Ieova lou Atua ma oe i mea uma e te alu i ai.”—Iosua 1:9, Faaliliuga a le Lalolagi Fou.

 “Ou te leʻi fai atu ea ia te oe? Ia e faamalosi, ma loto tele; aua e te fefe, aua e te mataʻu; auā o le ALII lou Atua o loo ia te oe i mea uma e te alu i ai.”—Iosua 1:9, Tusi Paia Samoa-Lomiga 1969.

 O nei upu, na faamautinoa atu ai e Ieova a le Atua i lana tagata tapuaʻi faamaoni o Iosua, o le a “ia lototele ma faamalosi” e ui i le fesagaʻia o le tele o luʻi ma tulaga e sili ona faigatā. Sa leai se māfuaaga na ono fefe ai Iosua i mea o le a tutupu i le lumanaʻi pe a ia usitaʻia poloaʻiga a le Atua, auā sa pei ai o loo la faatasi ma Ieova e fesoasoani iā te ia ina ia taulau manuia. Sa faatasi le Atua ma Iosua e ala i le avatu i ai o faatonuga, ma tuuina atu iā te ia le manumalo mai i ona fili.

 Na faapefea ona “lototele ma faamalosi” Iosua? Sa ia maua le lototele ma le malosi mai i tusitusiga faagaeeina na saunia e Ieova i lenā taimi. Na aofia ai “mea uma o i le tulafono na poloaʻi atu ai laʻu [Ieova] auauna o Mose iā te oe [Iosua].” b (Iosua 1:7) Na fetalai Ieova iā Iosua ina ia “faitau lē leoa i ai [“manatunatu loloto i ai,” New International Version] i le ao ma le pō.”(Iosua 1:8) O le faitau ma le manatunatu loloto na fesoasoani iā Iosua ia maumauaʻi ai e faia le finagalo o le Atua. Mulimuli ane, na manaʻomia ona gaoioi Iosua e tusa ma mea na ia aʻoaʻoina mai le Afioga a le Atua, ia “faia e tusa ma mea uma ua tusia ai.” O lona faia faapea, na ia gaoioi ai ma le atamai ma manuia ai. E ui i luʻi na ia fesagaʻia, na ola Iosua i se olaga fiafia ma faamalieina o se tagata tapuaʻi faamaoni a Ieova.—Iosua 23:14; 24:15.

 O fetalaiga a Ieova iā Iosua o loo faaauau pea ona faalaeiauina ai i tatou i aso nei. Ua faaalia ai le matuā manatu mamafa mai o Ieova i ona tagata tapuaʻi, aemaise pe a latou fesagaʻia luʻi. O lona finagalo ia taulau manuia ona tagata e pei o Iosua. Ma i le pei o Iosua, o le a mafai ona latou ʻlototetele ma faamalolosi’ e ala i le faitau e lē aunoa ma manatunatu loloto i le Afioga a le Atua le Tusi Paia, ona gaoioi lea e ōgatusa ma lenā taʻitaʻiga.

 Ina ua mavae le maliu o Mose, na avatu ai e Ieova le faatonuga iā Iosua ia taʻitaʻi le nuu o Isaraelu. (Iosua 1:1, 2) I lenā taimi, ua sauni tagata Isaraelu e ulu atu i le Nuu Folafolaina, le nuu o Kanana. Peitaʻi, na manaʻomia ona latou tau faasaga i ni fili malolosi. O se faataʻitaʻiga, sa manaʻomia ona tau Iosua ma tagata Kanana, o ni tagata e matuā sili ona leaga. c (Teuteronome9:5; 20:17, 18) Sa sili foʻi ona toʻatele ma lelei ona faaauupegaina faavaegāʻau tagata Kanana nai lo tagata Isaraelu. (Iosua 9:1, 2; 17:18) Ae na lototele Iosua ma usitaʻi i faatonuga a Ieova. Sa ʻau le Atua ma ia, auā na faatoʻilalo e Isaraelu le toʻatele o o latou fili i le na o le ono tausaga.—Iosua 21:43, 44.