“O le a e leoleoina i latou ua faalagolago atoatoa iā te oe, o le a e avatu iā i latou le filemu e faaauau pea, auā e latou te faatuatuaina oe.”—Isaia 26:3, Faaliliuga a le Lalolagi Fou.

 “E te leoleoina ia atoatoa le filemu o ē ua mausalī o latou loto; auā ua latou faatuatua iā te oe.”—Isaia 26:3, New International Version.

 O nei faaupuga, ua faamautinoa mai ai e le perofeta o Isaia, e puipuia e Ieova le Atua i latou e maufaatuatuaina atoatoa o Ia. E na te faia faapea, e ala i le fesoasoani iā i latou ia lagona le saogalemu ma le toʻafilemu.

 “O le a e leoleoina i latou ua faalagolago atoatoa iā te oe.” O lenei vaega o le fuaiupu, o loo faamatala mai ai i latou e matuā maumauaʻi e maufaatuatuaina Ieova a le Atua i taimi uma. E iloa e i latou e maufaatuatuaina le Atua, e manaʻomia ona latou faalagolago iā te ia. O se faataʻitaʻiga, pe a faia se filifiliga tāua, nai lo o le faalagolago i lo latou lava malamalama, e latou te faia filifiliga ma gaoioi i le auala e faafinagaloina e le Atua. (Faataoto 3:5, 6) E latou te saʻili le silafaga a le Atua i se mataupu, e ala i le faitau o lana Afioga le Tusi Paia, ma mafaufau loloto i mea na latou faitauina. (Salamo 1:2; 119:15) Pe a feagai ma tulaga faigatā, e latou te tatalo faatauanau iā Ieova ma talosagaina lana fesoasoani. (Salamo 37:5; 55:22) O le faia faapea, ua faaalia ai lo latou maufaatuatuaina o le Atua, ma o le iʻuga, e foaʻi atu e Ieova iā i latou le filemu.

 “O le a e avatu iā i latou le filemu e faaauau pea.” I uluaʻi tusitusiga Eperu, e faalua ona taʻua le upu “filemu” ina ia faamatilatila ai le manatu. O lea, ua faaliliuina ai lenei faaupuga e faapea, “filemu e faaauau pea” po o le “atoatoa le filemu.” I nisi faaupuga, e maua e i latou e maufaatuatuaina atoatoa Ieova le filemu, ma lagona ai pea le toʻafilemu lea e lē faalagolago i le tulaga o mea. (Salamo 112:7; 119:165) O lenei filemu e maua mai i le iai o se faiā vavalalata ma Ieova, ma le taumafai e fai le mea saʻo i lana silafaga.—Faataoto 3:32; Isaia 48:18.

 O le “filemu e faaauau pea” e lē uiga atu i le puipuia e le Atua o ona tagata tapuaʻi mai i tulaga faigatā, pe e lē oo foʻi iā i latou faalogona popole. (1 Samuelu 1:6, 7; Iopu 6:1, 2; Salamo 31:9) Peitaʻi, e fesoasoani o ia iā i latou e fesagaʻia na tulaga faigatā. (Isaia 41:10, 13) E talia e ia a latou tatalo, ma foaʻi atu iā i latou le atamai, le malosi ma faamāfanafanaga. (Salamo 94:19; Faataoto 2:6; Isaia 40:29) O le māfuaaga lenā e latou te toʻafilemu ai pea e ui i tulaga faigatā.—Filipi 4:6, 7.

 Na soifua le perofeta o Isaia i le pe ā ma le 2,800 tausaga ua mavae. I lenā taimi ma tausaga mulimuli ane ai, e toʻatele tagata Iutaia e leʻi auauna faamaoni iā Ieova le Atua. O lea, na faataga ai e Ieova le faaumatiaina o le aai o Ierusalema i le 607 T.L.M.

 Peitaʻi, i le silia ma le selau tausaga a o lumanaʻi le faaumatiaga, na tusia ai e Isaia le pese faavaloaga o viiga iā Ieova o loo faamauina i le Isaia mataupu 26. (Isaia 26:1-6) O loo faamatalaina i lenā pese se taimi i le lumanaʻi o le a toe faafoʻisia ai se aai o Iuta, lea e faasino atu iā Ierusalema.

 Na toe faafoʻisia Ierusalema i tausaga mulimuli ane ai, i le 537 T.L.M. Ina ua tupu lenā mea, na lagona ai e tagata Iutaia faamaoni na toe foʻi, le saogalemu ma faapea mai: “Ua iā i tatou le aai malosi.” (Isaia 26:1) E leʻi malosi le aai ona o ona pā malupuipuia, ae na faalagolago le saogalemu o le aai i le faamanuia ma le puipuiga a Ieova.—Isaia 26:2.

 E faapena foʻi aso nei. E lagona e i latou e maufaatuatuaina atoatoa Ieova le saogalemu, ona ua avea Ieova ma o latou “Papa,” po o lo latou sulufaʻiga.—Isaia 26:4.

 Ia matamata i lenei vitiō puupuu o loo aumaia ai se aotelega o le tusi o Isaia.