“A o ē e faamoemoe iā Ieova e toe malolosi i latou. E latou te ō aʻe e pei ua iā i latou ni apaʻau o aeto. E latou te taufetuli ae e lē vaivai; e latou te savavali foʻi ae e lē taitai lē lavavā ai.”—Isaia 40:31, Faaliliuga a le Lalolagi Fou.

 “A o e faatalitali i le ALII, e toe faafouina lo latou malosi; latou te sii ae apaau e pei o aeto; latou te femoei, a e le vaivai; latou te savavali, a e le tigaina.”—Isaia 40:31, Tusi Paia Samoa—Lomiga 1969.

 Ua faamautinoa atu e Ieova a le Atua i ona tagata tapuaʻi o le a ia foaʻi atu iā i latou le malosi e latou te manaʻomia, e onosaia ma tumau ai i so o se faafitauli e latou te ono fesagaʻia.

 “O ē e faamoemoe iā Ieova e toe malolosi i latou.” O i latou e faamoemoe pe maufaatuatuaina le mana o le Atua ma lona faanaunauga e fesoasoani i ona tagata, e mafai ona latou mautinoa e mauaina lana fesoasoani. (Faataoto 3:5, 6) O se tasi o auala e fesoasoani ai le Atua iā i latou e tapuaʻi iā te ia, e ala mai lea i lona agaga paia po o lona mana galue.—Luka 11:13.

 “E latou te ō aʻe e pei ua iā i latou ni apaʻau o aeto.” O lenei faaupuga ua mafai ona faaāta mai ai le mana o le Atua e fesoasoani ai i se tasi. E faalagolago se aeto i le faaputuga o ʻea māfanafana e ave aʻe ai o ia ma faaopeopea ai. Pe a maua e le aeto se nofoaga e iai nei faaputuga ʻea māfanafana, e na te faaloloa ona apaʻau ona faaopeopea faataamilo ai lea i inā seʻia oo ina ave aʻe o ia i luga e lenei ʻea māfanafana. Pe a lele ese mai le aeto i se nofoaga o loo iai faaputuga o ʻea māfanafana i se isi nofoaga faapena, e mafai ona ia faaopeopea i le ʻea mo le tele o itula e aunoa ma le vaivai ai.

 “E latou te taufetuli ae e lē vaivai.” O faafitauli i le olaga e mafai ona faavaivaia ai i tatou i le itu i le tino ma taufaalogona, ae e mafai ona tatou tumau ona o le mana ua foaʻi mai e le Atua. E mafai ona faamalosia ai i tatou e faia le mea saʻo e ui i faafitauli ogaoga. Na tusi le aposetolo o Paulo, o lē na tumau i tofotofoga faigatā: “O mea uma lava, ua ou maua le malosi mai iā te ia o lē na foaʻi maia iā te aʻu le mana.”—Filipi 4:13.

 Na faagaeeina e le Atua le perofeta o Isaia e tusia nei upu i le senituri lona valu T.L.M. E ui o loo faatatau atu lenei mau i auauna faamaoni uma a le Atua, ae atonu na saunia e Ieova nei upu e faalaeiau ai tagata Iutaia na ave faapagota i Papelonia mo le 70 tausaga. Ina ua toe foʻi ane la tagata Iutaia i lo latou atunuu, na latou iloa ai ua faataunuuina afioga a le Atua. (Isaia 40:1-3) Na foaʻi atu e le Atua iā i latou le malosi e savavali ai i se auala umī ma faigatā, b mai i Papelonia seʻia oo i Ierusalema i le 537 T.L.M.—Isaia 40:29.