“O aʻu o Ieova. O loʻu igoa lea; ou te lē avatua loʻu mamalu i se tasi, e lē avatua foʻi loʻu viiga i faatusa ua tā.”—Isaia 42:8, Faaliliuga a le Lalolagi Fou.

 “O aʻu o le ALII, o loʻu igoa lea; o loʻu mamalu foi ou te le avatua lea i se tasi, ma loʻu viiga ou te le avatua i tupua ua ta.”—Isaia 42:8, Tusi Paia Samoa—Lomiga 1969.

 Ua faailoa mai e le Atua iā i tatou lona suafa ma e na te lē avatua i tupua ua tā lona mamalu po o lona viiga.

 Ua faaigoa e le Atua o ia lava i le suafa lea ua taatele i le faa-Samoa o “Ieova.” a (Esoto 3:14, 15) E ui e toetoe 7,000 taimi o loo taʻua ai le suafa o le Atua i le Feagaiga Tuai (Tusitusiga Eperu ma le faa-Arama), ae o le tele o faaliliuga ua latou suia le suafa o le Atua i le taʻu “ALII” (i mataʻitusi lapopoʻa). O se faataʻitaʻiga o le Salamo 110:1, lea o loo taʻua ai Ieova ma Iesu. I le Tusi Paia Samoa—Lomiga 1969, o loo tusia ai e faapea: “Ua tulei mai le afioga a le ALII [Ieova] i loʻu Alii [Iesu].” (Galuega 2:34-36) Ua tuuina i le Faaliliuga a le Lalolagi Fou le suafa o le Atua i le tulaga e tatau ona iai, ina ia manino ai le eseesega o le upu “Alii” i lenā mau. Ua faapea lona tusiaina: “Ua fetalai mai Ieova i loʻu Alii: “Ia e nofo i loʻu itu taumatau, seʻia ou faia ou fili ma mea e tū ai ou vae.”

 E toʻatele tagata e suʻesuʻeina le Tusi Paia e talitonu o le uiga o le suafa o le Atua, “E Gaoioi o Ia e Tusa ai ma Tulaga Manaʻomia.” E na o le Atua moni e tatau ona ave i ai lenā suafa, ona e na o ia e mafai ona avea o ia lava ma mea e manaʻomia, ina ia faataunuu ai lona finagalo. E mafai foʻi ona ia faapogaia ana foafoaga e avea ma so o se mea e manaʻomia, ina ia faataunuu ai lana fuafuaga.

 Ua tatau ma onomea ona tatou tuutoina atu atoatoa iā Ieova, ona o ia o Lē na foafoaina i tatou ma e na o ia lava le Atua moni. E leai se tasi po o se isi lava mea e tatau ona tatou tapuaʻi i ai, e aofia ai tupua ma faatusa.—Esoto 20:2-6; 34:14; 1 Ioane 5:21.

 I uluaʻi fuaiupu o le Isaia 42, na valoia ai e Ieova galuega o le a faia e ‘⁠lē ua ia filifilia.’ Na fetalai le Atua e faatatau i lenei auauna ua ia filifilia, “o le a ia faailoa atu i nuu le faamasinotonu.” (Isaia 42:1) Na fetalai le Atua e faatatau i lenā folafolaga: “O loo oʻu taʻuina atu mea fou. Ou te faailoa atu iā te outou ia mea a o leʻi tutupu mai.” (Isaia 42:9) Na faailoa mai pe na faataunuuina le valoaga e faatatau i ‘⁠lē ua ia filifilia’ i le tele o senituri mulimuli ane, ina ua taunuu le Mesia po o le Keriso ma faatino lana faiva i le lalolagi.—Mataio 3:16, 17; 12:15-21.

 “O aʻu o Ieova, o loʻu igoa lea; o loʻu mamalu foi ou te le avatua lea i se tasi, ma loʻu viiga ou te le avatua i tupua ua ta.”—Tusi Paia Samoa Lomiga 1884.