“Ia avatu le viiga i le Atua i le lagi, ma le filemu i le lalolagi i tagata ua ia finagalo malie i ai.”—Luka 2:14, O le Faaliliuga a le Lalolagi Fou.

 “O le viiga i le Atua i le lagi! Ma ia iai le filemu i le lalolagi i tagata uma o loo faafiafiaina le Atua.”—Luka 2:14, Contemporary English Version.

 O nei viiga na faalauiloa e agelu i le taimi na fanau ai Iesu, e faailoa mai ai e mafai e i latou e faatuatua iā Iesu ona maua le filemu ma le finagalo malie o le Atua.

 “Ia avatu le viiga i le Atua i le lagi.” O lenei faaupuga ua faamatilatila ai e agelu, e talafeagai ona maua e le Atua le viiga uma. O lenei faaupuga ua faailoa mai ai foʻi, o le fanau mai o Iesu ma lana faiva i le lalolagi, o le a matuā saosaolaumea i le mauaina o le viiga o Ieova a le Atua. O se faataʻitaʻiga, e masani ona avatu e Iesu le viiga i le Atua i mea na ia aʻoaʻoina atu, e pei ona ia taʻua: “O mea ua ou aʻoaʻoina atu, e lē o ni oʻu manatu, a o manatu o lē na auina mai aʻu.” (Ioane 7:16-18) Pe a faia e Iesu vavega, na masani ʻona faamamaluina e tagata le Atua.’ (Luka 5:18, 24-26; Ioane 5:19) E oo lava i le maliu o Iesu na faamamaluina ai le Atua. Ua tatala ai le avanoa e faataunuu ai le finagalo o le Atua sa iai i le amataga, o le faatumu lea o le lalolagi i tagata amiotonu ma alolofa.—Kenese 1:28.

 “Ma le filemu i le lalolagi.” O lenei filemu e sili atu mea e aofia ai nai lo o le leai o ni taua. E aofia ai le filemu po o le toʻafilemu, lea e faatoʻā maua e se tagata pe a finagalo malie i ai Ieova. E tatou te lotofaafetai ona ua maua e tagata se faiā filemu ma le Atua e ala iā Iesu. (Iakopo 4:8) I le avea ai o Iesu ma Tupu o le Malo o le Atua, o le a ia aumaia le filemu atoatoa i le lalolagi aoao e faavavau.—Salamo 37:11; Luka 1:32, 33.

 “Tagata ua ia finagalo malie i ai.” O lenei faaupuga e faasino atu i tagata e finagalo malie i ai le Atua, ona o lo latou faatuatua moni iā te ia ma lē na ia auina mai, o Iesu. E lē uiga atu e faapea e finagalo malie le Atua i tagata uma e ui i a latou gaoioiga ma uiga, pe faasino atu foʻi i le alofa e faaalia e tagata. I nisi faaliliuga o le Tusi Paia, e pei o le King James Version, o loo faaliliuina ai lenei faaupuga i le “tagata ua alofagia e ia.” Peitaʻi, i manusikulipi Eleni tuai ua maufaatuatuaina, o loo lagolagoina ai le auala o loo faaliliuina ai lenei faaupuga i le Faaliliuga a le Lalolagi Fou ma isi faaliliuga lata mai, lea e uiga atu i le filemu e maua e tagata ua finagalo malie i ai le Atua.—Tagaʻi i “ Isi Faaliliuga o le Luka 2:14.”

 O loo faamatalaina i le Luka mataupu e 2 le amataga o le soifuaga o Iesu o se tagata. E leʻi leva talu ona fanau Iesu, ae faaali atu se agelu i leoleo mamoe sa “nonofo i fafo i le pō ma vaavaai a latou lafu.” b (Luka 2:4-8) Na faailoa atu e le agelu se “tala lelei e olioli ai,” ma faapea atu i leoleo mamoe: “Auā ua fanau mai i le asō i le aai o Tavita, le faaola, o Keriso le Alii.” (Luka 2:9-11) Ina ua uma ona faailoa atu i leoleo mamoe le nofoaga o le a fanau ai Iesu, ona latou molimauina lea o le tele o foafoaga agaga o loo vivii atu i le Atua. Ina ua taunuu atu i Peteleema, na maua ai e leoleo mamoe Maria ma Iosefa faatasi ai ma le pepe o Iesu. (Luka 2:12-16) Ina ua uma ona faamatala e leoleo mamoe mea mataʻina na tutupu, ona latou toe foʻi lea i a latou lafu, “ma ua latou faamamaluina ma viia le Atua ona o mea uma ua latou faalogo ma vāai i ai.”—Luka 2:17-20.

 “O le viiga i le Atua i mea aupitoaluga; ma le manuia i le lalolagi i tagata ua alofagia e ia!”—Luka 2:14, Tusi Paia Samoa—Lomiga 1969.

 “O le viiga i le Atua i mea aupitoaluga; ma le manuia i le lalolagi; o le finagalo alofa i tagata.”—Luka 2:14, Tusi Paia Samoa—Lomiga 1884.

 Ia matamata i lenei vitiō puupuu o loo aumai ai se aotelega o le tusi o Luka.