UIGA O MAU

Mareko 1:15—“Ua Latalata Mai le Malo o le Atua”

PLAY

“Ua taunuu le taimi ua atofaina, ma ua latalata mai le malo o le Atua. O lea, ia outou salamō ai, ma ia faatuatua i le tala lelei.”—Mareko 1:15, Faaliliuga a le Lalolagi Fou.

“Ua oo mai ona po, ua latalata mai le malo o le Atua; ina salamo ia, ma faatuatua i le tala lelei.”—Mareko 1:15, Tusi Paia Samoa—Lomiga 1969.

Uiga o le Mareko 1:15

Na fetalai Iesu Keriso “ua latalata” mai le Malo o le Atua a talu ai o loo faatasi o ia, o lē o le a avea ma Tupu o lenā Malo ma i latou na ia fetalai i ai.

E leʻi uiga atu Iesu ua pule le Malo i lenā taimi. Mulimuli ane, na faailoa atu e Iesu i ona aposetolo o le a oo mai le Malo. (Galuega 1:6, 7) Na taunuu mai Iesu i le tausaga tonu na valoia i le Tusi Paia o le a aliaʻe mai ai lē o le a avea ma Tupu b o le Malo. O le māfuaaga lenā na fetalai ai Iesu: “Ua taunuu le taimi ua atofaina,” o le taimi e amata ai lana faiva i le lautele o le talaʻia o le feʻau po o le tala lelei e faatatau i le Malo.—Luka 4:16-21, 43.

Ina ia maua e tagata aogā mai i le tala lelei e faatatau i le Malo, e tatau ona latou salamō i agasala na latou faia i le taimi ua teʻa, ma ola e tusa ai ma tapulaa a le Atua. O i latou ua salamō, e faaalia le faatuatua i le tala lelei e faatatau i le Malo o le a oo mai.

Siʻomaga o le Mareko 1:15

Na fetalai Iesu i nei upu i le amataga o lana faiva i Kalilaia. O loo taʻua foʻi i le Mataio 4:17, “e mai lava i lenā taimi” na talaʻia ai e Iesu le Malo o le Atua. O le Malo, o le autū lea o le faiva a Iesu. O le mea moni, e silia i le 100 taimi o loo taʻua ai le Malo i Evagelia c e fā aemaise lava i fetalaiga a Iesu. I faamaumauga a le Tusi Paia, e tele atu taimi na fetalai ai Iesu i le Malo o le Atua nai lo o se isi lava mataupu.

Faitau le Mareko mataupu 1, faatasi ai ma faamatalaga pito i lalo, ma mau faasino.

a O le Malo o le Atua o se pulega i le lagi na faavaeina e le Atua ina ia faataunuu ai lona finagalo mo le lalolagi. (Tanielu 2:44; Mataio 6:10) Mo nisi faamatalaga, tagaʻi i le mataupu “O le ā le Malo o le Atua?”

b Na tatau ona avea Iesu ma tupu ina ia faataunuu ai se tasi o ana matafaioi o le Mesia na valoia po o le sui faapitoa o le Atua. Mo nisi faamatalaga e faatatau i valoaga o le Tusi Paia e faailoa mai ai o Iesu o le Mesia, tagaʻi i le “Pe e Faamaonia e Valoaga e Faatatau i le Mesia o Iesu o le Mesia?”

c O Evagelia o uluaʻi tusi e fā o Tusitusiga Paia Eleni lea e masani ona faaigoa o le Feagaiga Fou, o loo taʻua ai le talaaga o le soifuaga o Iesu ma lana faiva.