“O le mea lea ou te fai atu ai iā te outou, o mea uma lava tou te talosaga atu ai i le tatalo, ia outou faatuatua e pei lava ua outou mauaina, ma o le a outou mauaina lava.”—Mareko 11:24, O le Faaliliuga a le Lalolagi Fou.

 E ala i nei upu, na faailoa atu ai e Iesu i ona soo le tāua o le iai o se faatuatua malosi i le mana o le tatalo. Na ia faamautinoa atu foʻi, e faafofoga ma tali mai le Atua i a latou tatalo. O se tasi e tatalo ma le faamaoni e ōgatusa ma le finagalo o le Atua, e mafai ona ia mautinoa o le a taunuu mea na ia tatalo ai, e tai pei ua uma ona taliina ana tatalo.

 Na faamatilatila mai e Iesu le tāua o le tatalo faatasi ma le faatuatua. Na ia faamatala o lē o loo tatalo e tatau ona “lē masalosalo lona loto,” ae e tatau ona ia “faatuatua o le a taunuu lava mea ua ia fai atu ai.” (Mareko 11:23)Aiseā? Talu ai o lē e masalosalo, e lē tatau ona ʻmanatu e na te maua se mea mai iā Ieova.’ a—Iakopo 1:5-8.

 O le tagata faatuatua e tatalo i so o se taimi. (Luka 11:9, 10; Roma 12:12) O le auala lea e faaalia ai o loo ia manaʻomia moni mea o loo ia tatalo atu ai, ma e talitonu e tali mai le Atua i ana tatalo. E na te faatalitalia foʻi o le a tali mai le Atua i le auala ma le taimi e na te leʻi mafaufauina.—Efeso 3:20; Eperu 11:6.

 Peitaʻi, o upu a Iesu e lē uiga atu o le a faatalitalia e so o se tagata o le a talia e le Atua so o se mea e tatalo atu ai. O loo talanoa Iesu i ona soo, o tane faatuatua o ē o loo taumafai malosi e tapuaʻi iā Ieova le Atua i le auala e na te talia. Ua taʻua i le Tusi Paia e na o tatalo e ōgatusa ma le finagalo o le Atua e faafofoga mai i ai o ia. (1 Ioane 5:14) E lē faafofoga o ia i tatalo a i latou e teena ma le loto i ai ana tapulaa, ma faia mea leaga e aunoa ma le salamō. (Isaia 1:15; Mika 3:4; Ioane 9:31) Ina ia aʻoaʻo atili e faatatau i tatalo e faafofoga i ai le Atua, ia maimoa i le vitiō puupuu lenei.

 A o lata ina faaiʻuina le faiva a Iesu i le lalolagi, na latou talatalanoa ai ma ona soo i le tāua o le faaalia o le faatuatua malosi i le Atua. Na ia faailoa atu le tāua o lenei manatu e ala i se talafaatusa. A o malaga atu i Ierusalema, na ia mātauina ai ua tutupu lau o se mati. Peitaʻi, na fetuu e Iesu le mati ona e leʻi iai ni ona fua. (Mareko 11:12-14) Ua faataʻitaʻi mai e foliga lauusiusi o le mati le auala na tapuaʻi ai le nuu o Isaraelu anamua i le Atua. O le mea moni, sa foliga atu e pei o loo latou tapuaʻi i le Atua ae na itiiti lo latou faatuatua. (Mataio 21:43) Mulimuli ane na mamae le mati, ma o se faaataga lea o le mea o le a tupu i tagata lē faatuatua o Isaraelu.—Mareko 11:19-21.

 I se faaeseesega, na mautinoa e Iesu e mafai e ona soo ona atiaʻe le faatuatua lea e manaʻomia, e manumalo ai i luʻi ma faataunuu ai mea mataʻina. (Mareko 11:22, 23) Na fetaui lelei le fautuaga a Iesu i ona soo e faatatau i le tatalo, auā o lea ua toeitiiti ona tofotofoina lea o lo latou faatuatua. E tatau ona latou onosaia le maliu o Iesu ma le faateteleina o teteega i la latou faiva. (Luka 24:17-20; Galuega 5:17, 18, 40) I aso nei, e mafai foʻi e soo o Iesu ona manumalo i so o se luʻi, pe a faaalia le faatuatua i le Atua ma le mana o le tatalo.—Iakopo 2:26.

 Ia matamata i lenei vitiō puupuu o loo aumaia ai se aotelega o le tusi o Mareko.