“Ia outou ō mai iā te aʻu o outou uma ua tigāina ma mafatia i avega, ona ou faafouina lea o outou. Ia outou amoina laʻu amo ma faaaʻoaʻo mai iā te aʻu, auā o aʻu o lē e agamalu ma lotomaulalo, ona faafouina ai lea o outou. Auā e avegofie laʻu amo, ma e māmā foʻi laʻu avega.”—Mataio 11:28-30.

 “Ia outou o mai ia te au, o outou uma o e tigaina ma mafatia i avega, o aʻu foi e malolo ai outou. Ia outou amoina laʻu amo, ma ia outou faaaʻoaʻo ia te au, auā o aʻu lē agamalu ma le loto maulalo; ona maua lea e outou o le malologa mo outou agaga. Auā e avegofie laʻu amo, o laʻu avega foi e māmā ia.”—Mataio 11:28-30, Tusi Paia Samoa—Lomiga 1969.

 Na valaaulia ma le māfana e Iesu lana ʻaufaalogologo ina ia ō atu iā te ia. Na ia faamautinoa atu iā i latou, e latou te maua le faafouina ma le mapusaga, pe a aʻoaʻoina mea mai iā te ia.

 “Ia outou ō mai iā te aʻu o outou uma ua tigāina ma mafatia i avega.” Na valaaulia ma le māfana e Iesu ē na “mafatia i avega,” ona o tulafono faapea tū ma aga na faamalosia i latou e taʻitaʻi lotu e mulimuli i ai. (Mataio 23:4; Mareko 7:7) Na mafatia foʻi tagata lautele i popolega ma avega mamafa, ona o le faigatā o galuega ma le uumi o taimi e galulue ai, auā le tausiga o o latou aiga.

 “Ona ou faafouina lea o outou.” Na folafola atu e Iesu, o le a maua e i latou e taliaina lenei valaaulia le mapusaga. Na ia faia faapea e ala i le fesoasoani iā i latou ina ia malamalama, i le mea e faafinagaloina e le Atua mai iā i latou. (Mataio 7:24, 25) O lo latou iloaina o lenā mea, na tuusaʻoloto ai i latou mai i le faapologaina i aʻoaʻoga sesē ma tū faalotu na mafatia ai tagata. (Ioane 8:31, 32) Peitaʻi, e ui e manaʻomia taumafaiga ina ia aʻoaʻoina ma faatatauina ai aʻoaʻoga a Iesu, ae e maua ai le faafouina.

 “Ia outou amoina laʻu amo ma faaaʻoaʻo mai iā te aʻu.” I taimi o le Tusi Paia, sa masani ona faaaogā e tagata galulue se amo, o se laau na tuu i luga o tauʻau ina ia amoina ai ni avega mamafa. O lea o le upu “amo,” na faasino atu i le gauaʻi i le pule ma le taʻitaʻiga a se isi tagata. (Levitiko 26:13; Isaia 14:25; Ieremia 28:4) O le faaupuga “faaaʻoaʻo mai iā te aʻu,” e mafai ona faaliliuina i le “avea ma oʻu soo (o ē e aʻoaʻoina).” O lea, sa faalaeiau e Iesu lana ʻaufaalogologo ina ia avea ma ona soo, e ala i le mulimuli ma faaaʻoaʻo iā te ia.—Ioane 13:13-15; 1 Peteru 2:21.

 “Ona faafouina ai lea o outou.” E leʻi folafola mai e Iesu o le a vave ona aveese tulaga faigatā uma. Peitaʻi, na ia fesoasoani i lana ʻaufaalogologo ina ia maua faamāfanafanaga ma se faamoemoe. (Mataio 6:25-32; 10:29-31) Na iloa e i latou na talia ana aʻoaʻoga ma avea ma ona soo, e lē o se avega mamafa le auauna i le Atua, ae na maua ai le faamalieina moni.—1 Ioane 5:3.

 “Auā e avegofie laʻu amo, ma e māmā foʻi laʻu avega.” E leʻi pei Iesu o taʻitaʻi lotu i ona aso. Na ia faaalia le lotomaulalo ma le agamalu. (Ioane 7:47-49) E lē o ia o sē e sauā pe pulepuletutū, ae sa ia faaalia le agalelei ma sa faigofie ona talanoa i ai tagata. Na magafagafa o ia i mea e na te faatalitalia mai i ona soo. (Mataio 7:12; Mareko 6:34; Luka 9:11) Na ia faailoa atu foʻi le auala e latou te maua ai aogā mai i le alofa mutimutivale o le Atua, ma le faafouina e latou te maua mai i le iai o se lotofuatiaifo lelei. (Mataio 5:23, 24; 6:14) O uiga matagofie o Iesu e lē gata na tosina atu ai tagata iā te ia, ae na uunaʻia ai foʻi i latou ina ia talia lana amo ma avea ma ona soo.

 Na taʻua e Iesu upu o loo i le Mataio 11:28-30, a o talaʻi o ia i Kalilaia i le 31 T.A. E na o le aposetolo o Mataio le tusitala o le Evagelia na faamauina le valaaulia māfana a Iesu. Talu ai o Mataio o se Iutaia ma sa avea foʻi o se aolafoga, na malamalama lelei la o ia i le auala na faileagaina ai tagata lautele, i le totogiina o lafoga ma faiga piʻopiʻo i le lotu Iutaia. E lē taumatea la na faalaeiauina o ia i le auala na faaaogā ai e Iesu le pule na tuuina atu e lona Tamā o Ieova, a e valaaulia ai tagata lotomaulalo ma lotomafatia ina ia mulimuli iā te ia.—Mataio 11:25-27.

 O loo faamatilatila mai i le tusi o le Evagelia a Mataio uiga mataʻina na faaalia e Iesu, i le avea ai ma Mesia na folafolaina ma pule o le Malo o le Atua i le lumanaʻi.—Mataio 1:20-23; Isaia 11:1-5.

 Ia matamata i lenei vitiō puupuu o loo aumaia ai se aotelega o le tusi o Mataio.