“O lenei, ia aua neʻi outou popole mo le aso a taeao, auā e iai foʻi popolega o le aso a taeao. Auā e tofu lava le aso ma mea leaga e tutupu ai.”​—Mataio 6:34, Faaliliuga a le Lalolagi Fou.

 “O lenei, aua tou te popole i le aso a taeao; auā e popole le aso a taeao i ana lava mea. E tatau i le aso lona lava leaga.”​—Mataio 6:34, Tusi Paia Samoa​—Lomiga 1969.

 Ina ua fetalai Iesu i nei upu, na ia faamautinoa atu i lana ʻaufaalogologo, e lē tatau ona latou soona popole pe popolevale i faafitauli e tutupu i le lumanaʻi. Ae e latou te maua aogā pe a taulima na o faafitauli e tutupu i le aso.

 E leʻi uiga atu le fetalaiga a Iesu e tatau ona tatou ʻalofia le mafaufau i le aso a taeao po o le fai o ni fuafuaga mo le lumanaʻi. (Faataoto 21:5) Ae na fesoasoani mai o ia ina ia aua neʻi o tatou soona popole i mea e ono tutupu taeao. O lenā ituaiga popole e aveesea ai lo tatou olioli ma tosina ese ai mai i mea e tatau ona tatou faia. E lē mafai ona foʻia faafitauli o le aso a taeao pe a tatou popole i ai i le asō. O mea e tatou te popole i ai e masani lava e lē tutupu pe e lē taunuu foʻi, po o le uma ane foʻi e lē leaga lona taunuuga nai lo o mea na tatou popole i ai.

 O fetalaiga nei a Iesu o se vaega o lana Lauga taʻutaʻua i luga o le Mauga, lea o loo maua i le Mataio mataupu 5-7. I lana lauga, na faamatala ai e Iesu e lē mafai e le soona popole ona faaleleia pe faaumiumi ai o tatou ola. (Mataio 6:27) Na ia fetalai foʻi, pe a tatou faamuamua le Atua i o tatou olaga, o le a leai la se mea e tatou te soona popole ai fua mo a taeao. E tausia e Ieova laau ma manu, ma e na te tausia foʻi i latou e auauna iā te ia.​—Mataio 6:25, 26, 28-33.