“Le tagata e, ua ia fetalai mai iā te oe le mea lelei. O le ā foʻi se mea ua finagalo ai Ieova mai iā te oe, pe e lē o le faia o le mea ua tonu, ia fiafia i le agalelei, ma ia savavali ma lou Atua ma le faamaulalo?”—Mika 6:8, Faaliliuga a le Lalolagi Fou.

 “Sole, ua faaali atu e ia ia te oe le mea lelei; se a foi se mea e finagalo ai le ALII ia te oe, pe a le o ia mea, ia fai le amiotonu, ia naunau i le alofa, ma ia feooai ma lou Atua ma le loto faamaulalo?”—Mika 6:8, Tusi Paia Samoa—Lomiga 1969.

 Ua faamatala e le perofeta o Mika e lē faigatā i tagata ona faafiafia Ieova a le Atua. (1 Ioane 5:3) Ua taʻua i lenei mau mea e faatalitalia mai e le Atua iā i tatou, e ala i ni faaupuga uigā se tolu. O faaupuga muamua e lua o loo faasino atu i le auala e feutagaʻi ai ma isi, ae o le faaupuga lona tolu e faasino atu i le faiā ma le Atua.

 “Faia o le mea ua tonu.” E finagalo le Atua ia faia e ona tagata tapuaʻi le mea tonu. E aofia ai i lenei mea le mafaufau ma gaoioi e tusa ma tapulaa a le Atua, e faatatau i le mea saʻo ma le mea sesē. (Teuteronome 32:4) Mo se faataʻitaʻiga, o i latou e mulimuli i tapulaa a le Atua e latou te faia le mea sili e feutagaʻi ai ma tagata i le faamaoni, ma ia aua le faailoga tagata e ui i le eseese o latou talaaga, atunuu, po o tulaga tau tamaoaiga.—Levitiko 19:15; Isaia 1:17; Eperu 13:18.

 “Ia fiafia i le agalelei.” E mafai foʻi ona faaliliu lenei faaupuga i le “alofa faamaoni.” (Mika 6:8, fpl. nwt-E) I le gagana Eperu na tusia ai le Tusi Paia, o le upu “faamaoni” e lē gata e uiga atu i le faamaoni i se tasi, ae ia faaalia foʻi i ai le agalelei ma le alofa mutimutivale, po o le faia o se mea e sili atu i lo o le mea e faatalitalia. E faatalitalia e le Atua mai i ē e mananaʻo e faafiafiaina o ia, e lē gata latou te faaalia le agalelei ma le alofa mutimutivale, ae ia faatāua foʻi na uiga. O lona uiga e tatau ona fiafia ana auauna e fesoasoani i isi, aemaise i latou o loo manaʻomia le fesoasoani. E tatou te maua le fiafia i le foaʻi atu.—Galuega 20:35.

 “Ia savavali ma lou Atua ma le faamaulalo.” I le Tusi Paia o le faaupuga “ia savavali” e mafai ona uiga atu i le “mulimuli i se ala patino.” E savavali se tasi ma le Atua, e ala i le ola i se auala e faafiafiaina ai o Ia. O se faaaʻoaʻoga lelei o lenei vala, o Noa. “Na savavali Noa ma le Atua moni,” ona na amiotonu o ia i le silafaga a le Atua ma “e lē ponā o ia i ē na latou ola faatasi.” (Kenese 6:9) I aso nei, e tatou te savavali ma le Atua e ala i le ola e ōgatusa ma aʻoaʻoga o loo i lana Afioga le Tusi Paia. E manaʻomia ai ona tatou faamaulalo, ma amanaʻia e tatou te faalagolago i le Atua mo mea uma.—Ioane 17:3; Galuega 17:28; Faaaliga 4:11.

 Na avea Mika o se perofeta i Isaraelu anamua i le senituri lona valu T.L.M. I lenā taimi, na tumu le nuu i ifoga tupua, faiga faaalatua, ma sauāga. (Mika 1:7; 3:1-3, 9-11; 6:10-12) O le toʻatele na lē ano i tapulaa a le Atua ia na faatulagaina i le Tulafono a Mose. I le taimi e tasi, e toʻatele na talitonu e mafai ona latou faafiafiaina le Atua, e ala i le faatinoina o tū faalelotu ma ofoina atu taulaga.—Faataoto 21:3; Hosea 6:6; Mika 6:6, 7.

 I le faitau selau tausaga mulimuli ane, na toe taʻua ai e Iesu e fiafia le finagalo o lona Tamā i ē e faaalia le alofa, faamasinotonu, ma le alofa mutimutivale. Na ia taʻua foʻi e lē fiafia lona Tamā i ē e tau ina faia gaoioiga e foliga mai ai, o loo tapuaʻi i le Atua. (Mataio 9:13; 22:37-39; 23:23) Ua fesoasoani fetalaiga a Iesu e tatou te malamalama ai i mea e faatalitalia mai e le Atua i ana auauna i aso nei.

 Ia matamata i lenei vitiō puupuu o loo aumai ai se aotelega o le tusi o Mika.