“Tau ina ia faamanuia outou e Ieova ma tausia outou. Tau ina ia susulu atu le malamalama o fofoga o Ieova iā te outou ma ia finagalo malie iā te outou. Tau ina ia silasila atu fofoga o Ieova iā te outou ma tuuina atu le filemu iā te outou.”—Numera 6:24-26, Faaliliuga a le Lalolagi Fou.

 “Ia faamanuia oe e le ALII, ma ia na tausi ia te oe; ia faamalamalamaina e le ALII ona fofoga i luga ia te oe, ma alofa atu ia te oe; ia faasaga mai e le ALII ona fofoga ia te oe, ma tuuina atu ia te oe le manuia.”—Numera 6:24-26, Tusi Paia Samoa—Lomiga 1969.

 Ua taʻua nei upu o se faamanuiaga faaositaulaga po o le faa-Arona, ona o Arona o le uluaʻi ositaulaga sili lea i Isaraelu. (Esoto 28:1) E mai i le Atua lenā faamanuiaga. (Numera 6:22, 23) Na fetalai atu le Atua iā Mose: “Ia e fai atu iā Arona ma ona atalii e faapea, ʻO le auala lenei e tou te faamanuia ai i le fanauga a Isaraelu.’” Ona ia taʻua loa lea o upu o loo i le Numera 6:24-26. Na usiusitaʻi ositaulaga faamaoni i lenā poloaʻiga mai i le Atua. Na latou faamamaluina foʻi le suafa o le Atua o Ieova. a O loo taʻua i le fuaiupu e 27: “E latou te taʻu atu foʻi loʻu igoa i luga o le fanauga a Isaraelu, ina ia ou faamanuia atu ai iā i latou.”

 “Tau ina ia faamanuia outou e Ieova ma tausia outou.” E faamanuia e Ieova ona tagata tapuaʻi e ala i le puipuia, taʻitaʻia, ma fesoasoani iā i latou ia taulau manuia. (Faataoto 10:22) I le Numera 6:24-26, o le upu lea ua faaliliuina “outou,” e numera tasi le auala e faaaogā ai i le gagana Eperu. E faailoa mai ai, e lē gata e finagalo le Atua e faamanuia i le nuu atoa o Isaraelu, ae e faamanuia foʻi i tagata taʻitoʻatasi.

 “Tau ina ia susulu atu le malamalama o fofoga o Ieova iā te outou ma ia finagalo malie iā te outou.” O le talosaga atu i le Atua ina ʻsusulu atu le malamalama o ona fofoga’ i se tasi, o lona uiga o le faaalia e le Atua o lona finagalo malie ma lana faamaoniga i lenā tagata. b E mafai foʻi ona faaliliuina lenā faaupuga: “Tau ina ia faaalia e le ALII ona laufofoga fiafia iā te oe.” (Numera 6:25, New International Reader’s Version) E faaalia e Ieova lona finagalo malie i ona tagata, e ala i le feutagaʻi ma i latou i se auala agalelei, tigā alofa, ma alofa mutimutivale.—Isaia 30:18.

 “Tau ina ia susulu atu le malamalama o fofoga o Ieova c iā te outou ma ia finagalo malie iā te outou.” E ʻsusulu atu fofoga o Ieova’ i ona tagata tapuaʻi, e ala i le uaʻi atu ma le alofa iā i latou ma avatu i ai le filemu. E tusa ai o se tasi lomiga, “o le upu Eperu ua faaliliuina i le filemu, e lē na o le leai o ni feeseeseaʻiga ma isi e uiga atu i ai, ae e uiga atu foʻi i le mauaina o le malosi ma le faamalieina i le itu faaletino ma le itu faaleagaga.”

 Ina ia maua e tagata Isaraelu aogā mai i le faamanuiaga o loo taʻua i nei fuaiupu, na tatau ona latou usiusitaʻi iā Ieova. (Levitiko 26:3-6, 9) Ina ua latou faia faapea, na tausisi Ieova i ana folafolaga. Na faamaonia lenā manatu i taimi o nofoaiga a nisi o o latou tupu, e pei o Solomona ma Esekia.—1 Tupu 4:20, 25; 2 Nofoaiga a Tupu 31:9, 10.

 E ui e lē manaʻomia ona aʻo faatauloto e Kerisiano nei faamanuiaga, ae e mafai lava ona faailoa atu o latou faanaunauga faapena pe a tatalo atu i le Atua mo isi, pe faalaeiau foʻi i isi Kerisiano. (1 Tesalonia 5:11, 25) E lē suia Ieova. E finagalo o ia e faamanuia ma puipuia ona tagata tapuaʻi faamaoni. O lea, e lagona e Kerisiano moni le filemu i le iloaina o loo latou maua le finagalo malie o Ieova, i le susulu mai o ona “fofoga” iā i latou.

 O mataupu muamua e sefulu o le tusi o Numera, o loo faamauina ai faatonuga a le Atua i tagata Isaraelu i le taimi na tolauapi ai e latalata i le Mauga o Sinai, a o agaʻi atu i le Nuu Folafolaina. E pe ā ma le tausaga o tolauapi Isaraelu i inā, ma na faamaopoopo ai i latou e Ieova o se nuu, ma avatu i ai tulafono ia na faavae aʻe ai le feagaiga o le Tulafono.

 Na faailoa atu e Ieova iā Mose le auala e tatau ona faamanuia ai tagata Isaraelu e Arona ma ona atalii, ia ua tofia o ni ositaulaga. (Numera 6:22, 23) Mulimuli ane, na faaaogā e Arona ma ē na tupuga mai iā te ia upu o loo i le Numera 6:24-26 e faamanuia ai i le nuu. A o faagasolo taimi, na avea o se tū masani le tauloto e le ositaulaga o nei upu, pe a uma ona ofo atu le taulaga mulimuli i le malumalu i aso taʻitasi.

 Ia matamata i lenei vitiō puupuu o loo aumai ai se aotelega o le tusi o Numera.