UIGA O MAU

Roma 10:13—“Valaau i le suafa o le Alii”

PLAY

“E faaolaina i latou uma o ē e valaau i le suafa o Ieova.”—Roma 10:13, Faaliliuga a le Lalolagi Fou.

“E faaolaina i latou uma o e valaau i le suafa o le Alii.”—Roma 10:13, Tusi Paia Samoa—Lomiga 1969

Uiga o le Roma 10:13

E lē faailoga tagata le Atua ma e na te faasafua atu i tagata uma le avanoa e faasaoina ai, ma maua ai le ola e faavavau e tusa lava pe eseese atunuu, lanu po o latou tulaga. Ina ia maua aogā, e tatau ona tatou valaau i le suafa o Ieova, le suafa patino o le Atua o Lē e ona le malosi uma lava. a—Salamo 83:18.

I le Tusi Paia, o le faaupuga “valaau atu i le suafa o Ieova,” e tele mea e aofia ai nai lo le tau ina iloa o le suafa o le Atua ma faaaogā i tapuaʻiga. (Salamo 116:12-14) E aofia ai le maufaatuatuaina o le Atua ma saʻili le fesoasoani mai iā te ia.—Salamo 20:7; 99:6.

Na tāua iā Iesu Keriso le suafa o le Atua. O upu muamua o lana tatalo faaaʻoaʻo e faapea: “Lo matou Tamā e o i le lagi, ia faapaiaina lou suafa.” (Mataio 6:9) Na faailoa mai foʻi e Iesu e tatau ona faaauau pea ona iloa, usitaʻi, ma alofa i Lē e ona le suafa, ina ia tatou maua ai le ola e faavavau.—Ioane 17:3, 6, 26.

Aiseā e tatou te mautinoa ai o Ieova “o le Alii” o loo taʻua i le Roma 10:13 i le Tusi Paia Samoa—Lomiga 1969? Talu ai o lenei fuaiupu o loo sii mai i le Ioelu 2:32 lea o loo tusia ai le suafa o le Atua i le uluaʻi tusitusiga Eperu, b ae e lē o le faalupega “Alii.”

Siʻomaga o le Roma 10:13

I le Roma 10, o loo faaalia ai i inā o le iai o se faiā lelei a se tasi ma le Atua e faalagolago i lona faatuatua iā Iesu Keriso. (Roma 10:9) E lagolagoina lenei manatu e ni mau e sii mai i le Feagaiga Tuai. E faaalia e se tasi lona faatuatua e ala i le “faalauiloa atu i luma o le lautele,” e aofia ai le talaʻia o le tala lelei e faatatau i le faaolataga i ē e lē talitonu. O le iʻuga, o le a maua ai e isi le avanoa e atiaʻe ai lo latou faatuatua lea e iʻu ai i le ola.—Roma 10:10, 14, 15, 17.

Faitau le Roma mataupu 10, faatasi ai ma faamatalaga pito i lalo, ma mau faasino.

a E pe ā ma le 7,000 taimi o loo taʻua ai le suafa o le Atua i manusikulipi anamua o le Tusi Paia. I le gagana Eperu, o loo tusia le suafa o le Atua i ni mataʻitusi se fā e taʻua o le Tetakalamatone. I le faa-Peretania, e masani ona taʻua le suafa o le Atua o “Ieova,” ae e fiafia nisi tagata suʻesuʻe o le Tusi Paia e faaaogā le suafa “Yahweh.”

b E foliga mai na faaaogā e Kerisiano na tusia le Feagaiga Fou, le suafa o le Atua ina ua latou siiina mai i le “Feagaiga Tuai” mau o loo iai lenā suafa. Ua taʻua i le The Anchor Bible Dictionary “E iai faamaoniga, o le Tetakalamatone o le Suafa o le Atua Yahweh, na iai i nisi o mau po o mau uma o le Feagaiga Tuai na sii uma i le Feagaiga Fou, i le taimi muamua na tusia ai.” (Volume 6, itulau 392) Tagaʻi i le Faaopoopoga 2 “Ua Tusia le Suafa o le Atua (יהוה) i Tusitusiga Paia Eleni” i le Tusi Paia o le Faaliliuga a le Lalolagi Fou.