“Aua tou te mulimuli i lenei faiga o mea a le lalolagi, ae peitaʻi ia liliu e ala i le suia o o outou mafaufau, ina ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.”—Roma 12:2, Faaliliuga a le Lalolagi Fou.

 “Aua foi tou te amio faatasi ma lenei lalolagi, a e peitai ia liliuina i le toe fuataiina o outou loto, ina ia outou suesue pe se a le finagalo o le Atua, o mea ua lelei, ma le mālie, ma le atoatoa.”—Roma 12:2, Tusi Paia Samoa—Lomiga 1969.

 O ē e mananaʻo e faafiafia le Atua, e tatau ona latou teena taaʻiga lē lelei ma suia o latou uiga. E lē faamalosia e le Atua i latou ina ia faia na suiga, ae e latou te faia faapea ona e alolofa iā te ia, ma e latou te iloa foʻi o ana tapulaa e lelei ma talafeagai, ma e aogā iā i latou.—Isaia 48:17.

 “Aua tou te mulimuli i lenei faiga o mea a le lalolagi.” O “lenei faiga o mea a le lalolagi,” e faasino atu i tagata ma a latou tapulaa, amioga, ma uiga, ia e lē o faaatagia ai tapulaa ma mafaufauga o le Atua. (1 Ioane 2:15-17) E malolosi taaʻiga a le lalolagi i tagata, lea e mafai ona latou mulimuli i ai, ma aafia ai a latou amioga ma uiga. Ina ia talia e le Atua la latou tapuaʻiga, e tatau i tagata ona teena taaʻiga a le lalolagi. Afai e latou te lē faia faapea, o le a latou atiaʻe amioga e faaleagaina ai i latou ma lē fiafia i ai le Atua.—Efeso 2:1-3; 4:17-19.

 “Ia liliu e ala i le suia o o outou mafaufau.” E tatau foʻi ona galue se tasi ina ia sui ona uiga moni ma faalogona. O le tāua o lenei laasaga, ua faailoa mai i le upu Eleni ua faaliliuina “liliu,” lea e faatatau atu i se suiga e talitutusa ma le suia o se katepila e avea ma pepe lele. E tatau i ē e tapuaʻi i le Atua ona “oofu i le tagata fou.”—Efeso 4:23, 24; Kolose 3:9, 10.

 “Ia faamaonia e outou lava po o le ā le finagalo o le Atua, lea e lelei, e mālie, ma lelei atoatoa.” E finagalo le Atua ina ia mautinoa atoatoa ē e tapuaʻi iā te ia i mea ua latou talitonu i ai. E latou te faia faapea e ala i le suʻesuʻe i le Afioga a le Atua, faatatau i o latou olaga, ma latou tofo i aogā o le usiusitaʻi i tapulaa a le Atua. O lea, ua faamaonia ai e i latou lava o ala o le Atua e sili ona lelei.—Salamo 34:8.

 O loo faamatala i le Roma mataupu e 12 mea e aofia i le tapuaʻiga e talia e le Atua. O lenā tapuaʻiga e aafia ai so o se vala o le olaga, ma e manaʻomia ona faaaogā e tagata lo latou “mafaufau lelei,” nai lo o le faatuatua e aunoa ma se faavae po o le taaʻina i faalogona. (Roma 12:1, 3) O loo iai i lenā mataupu fautuaga aogā i le auala e faaalia ai uiga o le Atua, feutagaʻi ai ma isi, ma le auala e tali atu ai pe a faileagaina i tatou.—Roma 12:9-21.