“A ua faaali mai e le Atua lona lava alofa iā i tatou, auā na maliu Keriso mo i tatou a o tatou agasala pea.”—Roma 5:8, Faaliliuga a le Lalolagi Fou.

 “A ua faaalitinoina mai e le Atua lona lava alofa ia te i tatou, ina ua maliu Keriso ma sui o i tatou, a o tatou agasala pea.”—Roma 5:8, Tusi Paia Samoa—Lomiga 1969.

 Na faaalia e Ieova a le Atua le tele o lona alofa ina ua ia auina mai lona Alo o Iesu Keriso e maliu mo tagata agasala. (Ioane 3:16) Ona o le tino agasala, e tele ina mafaufau ma gaoioi tagata i se auala e feteenaʻi ma tapulaa amiotonu a le Atua. (Kolose 1:21, 22) Peitaʻi, ua saunia e le Atua se auala e tatou te maua ai le leleiga ma ia e “ala i le maliu o lona Alo.” (Roma 5:10) O le iʻuga, ua tatou maua le avanoa e olioli ai i se faiā lelei ma le Atua i le taimi lenei, ma le faamoemoe e ola e faavavau i le lumanaʻi.—Roma 5:11; 1 Ioane 4:9, 10.

 Na tusia e le aposetolo o Paulo nei upu i Kerisiano i Roma. I le mataupu e 5 i lana tusi i Kerisiano i Roma, na faamatala ai e Paulo māfuaaga e olioli ai Kerisiano ma mautinoa i lo latou faamoemoe. (Roma 5:1, 2) O lenā faamoemoe ʻe lē iʻu i le faanoanoa,’ auā o loo faavae i le tele o le alofa o le Atua e ala iā Iesu. (Roma 5:5, 6) Na usiusitaʻi atoatoa Iesu i le Atua i taimi uma, o se mea e leʻi faia e le uluaʻi tagata o Atamu. (Roma 5:19) O le lē usiusitaʻi o Atamu ua iʻu ai ina agasala ma feoti tagata uma na tupuga mai iā te ia. (Roma 5:12) Peitaʻi, o le usiusitaʻi atoatoa o Iesu ma lona maliu, ua mafai ai e tagata usiusitaʻi ona maua le faamoemoe o le ola e faavavau.—Roma 5:21.