“Auā o le totogi o le agasala o le oti lea, a o le meaalofa a le Atua o le ola e faavavau lea, e ala iā Keriso Iesu lo tatou Alii.”—Roma 6:23, O le Faaliliuga a le Lalolagi Fou.

 “Auā o le oti, o le totogi lea o le agasala; a o le ola faavavau, o le mea foaifuaina mai lea e le Atua, i lo tatou Alii o Keriso Iesu.”—Roma 6:23, New International Version.

 I lenei mau, o loo faamatalaina ai e le aposetolo o Paulo ua māfua ona feoti tagata, ona o le agasala. Peitaʻi, ua foaʻi mai e le Atua i ona tagata tapuaʻi faamaoni se meaalofa matagofie, o le ola e faavavau.

 “O le totogi o le agasala o le oti lea.” E fananau mai tagata uma lava ua aafia i le tulaga lē lelei atoatoa, ma o le māfuaaga lea e iai ai iā i latou le faanaunauga e faia le agasala. a (Salamo 51:5; Failauga 7:20) Talu ai e latou te fananau mai ua agasala, o le mea lea e faasolo ai ina matutua ma feoti.—Roma 5:12.

 Ina ia faataʻitaʻi lenei manatu, ua faatusaina e Paulo le agasala i se pule e na te totogiina ni tagata faigaluega. E pei lava ona faatalitalia e se tagata faigaluega sona totogi, e faapena foʻi ona faatalitalia e tagata le oo o le oti iā i latou, ona o lo latou tulaga agasala.

 Peitaʻi, ua faamatala foʻi e Paulo o le tagata ua oti “ua magalo o ia mai i lana agasala.” (Roma 6:7) Pe a oti se tagata, ua saʻoloto la o ia mai i so o se agasala na ia faia. O le mea lea e lē tatau ai ona manatu o loo faaauau pea ona faapuapuagatia se tasi ua maliu i se isi mea, ona o mea sesē na ia faia i le taimi ua mavae. O le mea moni, ua faailoa manino mai i le Tusi Paia e lē mafai e i latou ua maliliu ona toe gaoioi pe iloa se mea.—Failauga 9:5.

 “A o le meaalofa a le Atua o le ola e faavavau lea, e ala iā Keriso Iesu.” E ese mai i le “totogi” o le agasala, ua foaʻi mai e le Atua le meaalofa o le ola e faavavau. O le uluaʻi upu mo le “meaalofa,” e mafai foʻi ona faaliliuina i le “meaalofa foaʻifua,” lea e uiga atu i se mea e foaʻi atu i se tasi e tusa pe e lē tatau iā te ia. E lē mafai e se tagata agasala ona ia mauaina le faaolataga ma le ola e faavavau. (Salamo 49:7, 8) Peitaʻi, ua foaʻi mai e le Atua le meaalofa tautele o le ola e faavavau iā i latou e faatuatua iā Iesu.—Ioane 3:16; Roma 5:15, 18.

 Na tusia e Paulo lenei tusi i Kerisiano i Roma i le pe ā o le 56 T.A. E foliga mai na sesē le manatu sa iai i nisi o Kerisiano i lenā taimi e faatatau i le agalelei o le Atua. Na taaʻina i latou i filosofia a Eleni, ma manatu ai o le tele a e fai ai e se tasi le agasala o le tele foʻi lenā o lona mauaina o le faamagaloga a le Atua. (Roma 6:1) A o isi na manatu e lē tatau ona faasalaina i latou mo a latou mea sesē, ona e latou te lē o toe ola i le Tulafono a Mose. (Roma 6:15) O lea, na faamatilatila atu ai e Paulo i lana tusi i Kerisiano, e lē mafai ona latou maua le agalelei o le Atua pe afai e faaauau ona latou filifili e pulea i latou e le agasala.—Roma 6:12-14, 16.

 Ua faamautinoa mai e upu a Paulo i tagata tapuaʻi o le Atua i aso nei, e ui lava ua latou fananau mai ua agasala, ae o loo iai pea so latou faamoemoe. Ua folafola mai e le Atua o le a ia foaʻi mai le ola e faavavau iā i latou, pe afai e latou te usitaʻia ana tapulaa tauamio ma lē lolo atu i o latou tuʻinanauga sesē.—Roma 6:22.

 Ia matamata i lenei vitiō puupuu o loo aumaia ai se aotelega o le tusi o Roma.