“E ui lava ina ou savali i le vanu e matuā pogisa, Ou te lē fefe lava i se mea leaga, Auā o oe e ta te faatasi ma aʻu; O lau laau ma lou tootoo e faamāfanafanaina ai aʻu.”​—Salamo 23:4, Faaliliuga a le Lalolagi Fou.

 “E ui lava ina ou savali i le vanu o le ata o le oti, ou te le fefe lava i se mea leaga; auā o oe ta te faatasi ma aʻu; o lau laau ma lou tootoo e faamafanafanaina ai aʻu.”​—Salamo 23:4, Tusi Paia Samoa—Lomiga 1969.

 E puipuia ma tausia e le Atua i latou e tapuaʻi atu iā te ia, e oo lava i taimi o loo latou onosaia ai tulaga faigatā. I lenei mau o loo faatusatusa mai ai le auala e puipuia ma tausia ai e Ieova ona tagata tapuaʻi, i le auala e tausia ai se mamoe e se leoleo mamoe. b E lē oo iā i latou lagona o le tuua toʻatasi pe a fesagaʻia tulaga faigatā, lea o loo faamatalaina i le mau e pei o se nofoaga e matuā pogisa ma e ono lamatia ai i le oti. Ae e latou te lagona le malupuipuia, e pei lava o loo faatasi le Atua ma i latou.

 I taimi o le Tusi Paia, e faaaogā ai e se leoleo mamoe lona tootoo e puipuia ai mamoe mai manufeʻai. E na te faaaogāina foʻi lona tootoo, o se laau umī e iai se lave i le isi pito, e taʻitaʻia pe aveese mai ai mamoe mai i ni lamatiaga. I se tulaga talitutusa, ua pei Ieova le Atua o se Leoleo Mamoe alofa o loo puipuia ma taʻitaʻia i latou o loo tapuaʻi atu iā te ia. E oo lava i taimi ma tulaga e sili ona faigatā i o latou olaga, e tausia pea i latou e Ieova i so o se auala.

•   E Na te faatonu ma faamāfanafana i latou e ala i lana Afioga tusia, le Tusi Paia.​—Roma 15:4.

•   E faafofoga o Ia i a latou tatalo, ma avatu iā i latou le filemu o le loto ma le mafaufau.​—Filipi 4:6, 7.

•   E Na te faaaogā uso ma tuafāfine ina ia faamalosia i latou.​—Eperu 10:24,25.

•   E Na te avatu iā i latou le faamoemoe mautinoa mo se lumanaʻi lelei, pe a ia aveesea so o se mea leaga o loo latou fesagaʻia i le taimi lenei.​—Salamo 37:29; Faaaliga 21:3-5.

 O le Salamo e 23 na tusia e Tavita, o se leoleo mamoe a o talavou, ma na mulimuli ane avea ma tupu o Isaraelu anamua. (1 Samuelu 17:34, 35; 2 Samuelu 7:8) Na amata le salamo i le faamatalaina o Ieova o se Leoleo Mamoe e taʻitaʻiina, fafagaina, ma faafouina ona tagata tapuaʻi, e pei lava ona faia e se leoleo mamoe i ana mamoe.​—Salamo 23:1-3.

 A o ia faamatilatila mai le puipuiga a le Atua i le Salamo 23:4, na suia le auala na tautala ai Tavita mai le faasino atu i le Atua (e na te) i le faapea atu (o oe). O lenā suiga tāua ua faamatilatila mai ai se faiā māfana na iai a Tavita ma Ieova. Na iloa e Tavita na tausia o ia e le Atua ma e sa ia silafia foʻi ona faafitauli. O le iʻuga, e leʻi fefe Tavita.

 I fuaiupu e lua o loo sosoo mai o le Salamo e 23, fuaiupu e 5 ma le 6, ua suia ai le faatusatusaga o le leoleo mamoe ma ana mamoe, i se tagata talimālō ma ana mālō. I le pei o se tagata talimālō lelei, na feutagaʻi Ieova ma Tavita e pei o sana mālō faaaloalogia. E oo lava i fili o Tavita, e leʻi mafai ona latou taofia o ia mai le mauaina o le puipuiga a le Atua. I le faaiʻuga o le salamo, ua faailoa mai ai e Tavita lona matuā talitonu o le a faaalia le agalelei ma le alofa o le Atua iā te ia i lona olaga atoa.

 O talafaatusa o loo faaaogāina i le Salamo e 23, ua faamatala mai ai le tausiga alofa o loo faaauau pea ona saunia e le Atua mo ona tagata tapuaʻi.​—1 Peteru 2:25.