“Ia e matuā fiafia foʻi iā Ieova, ona foaʻi mai lea e ia o mea e manaʻo i ai lou loto.—Salamo 37:4, Faaliliuga a le Lalolagi Fou.

 “Ia e fiafia lava oe i le ALII, ona foaʻiina lea e ia iā te oe o mea e manaʻo i ai lou loto.”—Salamo 37:4, Tusi Paia Samoa—Lomiga 1969.

 Na uunaʻi e le faisalamo tagata tapuaʻi o le Atua, ina ia matuā fiafia i le iai o se faauōga māfana ma le Atua. O i latou uma o loo mauaina lenā faauōga, e latou te mautinoa o le a faamalieina e Ieova a le Atua o latou manaʻoga.

 “Ia e matuā fiafia foʻi iā Ieova.” O lenei faaupuga, e mafai foʻi ona faaliliuina i le “ia e matuā olioli iā Ieova,” “ia e fiafia e auauna i le ALII,” po o le “ia e fiafia i mea ua folafola mai e le ALII mo oe.” I nisi faaupuga, e tatau ona tatou “matuā fiafia” ona o loo tatou tapuaʻi i le Atua moni. (Salamo 37:4) Aiseā?

 O i latou e tapuaʻi iā Ieova, e latou te vaai i mea i le auala e silasila i ai Ieova, e pei ona faailoa mai i le Tusi Paia. E lē gata ua latou iloa le Atua, ae ua latou iloa foʻi o se gaoioiga atamai le usiusitaʻi iā te ia. O le iʻuga, ua latou maua ai se lotofuatiaifo lelei, ma ʻalofia le faia o le tele o filifiliga lē lelei. (Faataoto 3:5, 6) O se faaaʻoaʻoga, e latou te lē matauʻa pe a vāai atu i le taulau manuia o tagata lē faamaoni ma matapeʻapeʻa. (Salamo 37:1, 7-9) E fiafia tagata o le Atua i le iloaina, ua toeitiiti ona ia faaiʻuina lea o faiga lē tonu uma, ma tauia tagata faamaoni ona o a latou amioga lelei. (Salamo 37:34) E latou te maua foʻi le olioli i le mauaina o le finagalo malie o lo latou Tamā i le lagi.—Salamo 5:12; Faataoto 27:11.

 “Ona foaʻi mai lea e ia o mea e manaʻo i ai lou loto.” O lenei faaupuga, e mafai foʻi ona faaliliuina “o le a ia tali mai i au tatalo,” po o le “o le a ia foaʻi mai le mea e sili ona e manaʻomia.” Peitaʻi, e lē o mea uma e talosaga atu ai e foaʻi mai e Ieova. E pei ona iloa e mātua le mea e lelei mo a latou fanau, e silafia foʻi e Ieova le mea e sili ona lelei mo Lana fanau. E lē gata i lenā, o mea e tatou te talosaga atu ai ma le auala e tatou te ola ai, e tatau ona ōgatusa ma ana tapulaa ma lona finagalo. (Faataoto 28:9; Iakopo 4:3; 1 Ioane 5:14) O le faia faapea, o le a mafai ai ona tatou faalatalata atu i le “Faafofoga tatalo,” ma le mautinoa o le a ia tali mai.—Salamo 65:2; Mataio 21:22.

 O le Salamo e 37, na tusia e Tavita le tupu o Isaraelu anamua. Na ia tusia e fua i le faasologa o mataʻitusi o le alafapeta. b

 Na mafatia Tavita i le tele o faiga lē tonu. Na tuliloa o ia e le tupu o Saulo ma isi na mananaʻo e fasioti o ia. (2 Samuelu 22:1) Peitaʻi, na maufaatuatuaina atoatoa pea e Tavita lona Atua. Na ia iloa e iai le taimi o le a faaumatia ai e Ieova tagata amioleaga. (Salamo 37:10, 11) E tusa lava pe foliga mai o loo taulau manuia tagata amioleaga e pei o le “vao muʻa lauolaola,” ae e iai le taimi o le a aveesea ai.—Salamo 37:2, 20, 35, 36.

 Ua faailoa mai i le Salamo e 37 le eseesega o iʻuga e oo iā i latou e mulimuli i tapulaa a le Atua, ma i latou e teena na tapulaa. (Salamo 37:16, 17, 21, 22, 27, 28) O lea, ua fesoasoani lenei Salamo iā i tatou ina ia maua le atamai, ma avea ma ē e finagalo malie i ai le Atua.

 Ia matamata i lenei vitiō puupuu o loo aumai ai se aotelega o le tusi o Salamo.