Ua leva ona faavaeina e Lē na foafoaina i tatou taʻiala mo faaipoipoga, a o leʻi taitai iai tulafono a malo. Ua taʻua i le uluaʻi tusi o le Tusi Paia: ‘E tuua e le tane lona tamā ma lona tinā, ma nonofo faatasi ma lana avā, ona avea ai lea o i laʻua ma tino e tasi.’ (Kenese 2:24) E tusa ai ma le lomifefiloi Vine’s Expository Dictionary of Biblical Words, o le upu Eperu mo le “avā” o loo faatatau i se “tamaʻitaʻi.” Na faamaonia e Iesu lenā tulaga ina ua ia faapea mai, o i laʻua e tuufaatasia i le faaipoipoga, o se ‘tane ma se fafine.’—Mataio 19:4.

 O lea, na fuafuaina e le Atua le faaipoipoga ia avea o se faatasiga e tumau ma māfana i le va o le tane ma le fafine. Ua faia le tane ma le fafine ina ia fesoasoani le tasi i le isi, ma mafai ai ona faamalieina o la manaʻoga taufaalogona, taufeusuaʻiga ma le faia o ni fanau.